Украинанын өкмөтү бизнесмендер Игорь Коломойский, Вячеслав Богуслаев, Константин Жеваго жана Константин Григоришинге байланыштуу стратегиялык ишканаларды мамлекетке өткөрдү. Бул тууралуу Украинанын Улуттук коопсуздук кеңешинин катчысы Алексей Данилов кабарлады.
Мында учактар жана тик учактар үчүн моторлорду чыгарган "Мотор Сич" заводу жана "Укрнафта" мунай өндүрүүчү компаниялары жөнүндө кеп болуп жатат.
Польшанын бийлиги Орусиянын Калининград облусу жана Беларус менен чектешкен жерине АКШнын Куралдуу күчтөрүнүн аскерлери жана тик учактары үчүн база куруу чечимин кабыл алды. Бул тууралуу Польшанын WNP.pl басылмасы кабарлады.
Өлкөнүн вице-премьери жана коргоо министри Мариуш Блащак атайын брифингде кабарлагандай, мында Apache тик учактары менен жабдылган америкалык күжүрмөн авиациялык бригада жайгашат.
Украин президенти Владимир Зеленский бүткүл украиналыктарды Орусиянын жаңы чабуулдарына даяр болууга чакырды. Бул тууралуу ал соңку видео кайрылуусунда айтып, Украина энергетикалык инфратүзүмдөргө урулган соккуларга жооп берерин кошумчалады.
АКШ президентинин администрациясы Украинанын бийлигин Орусия менен сүйлөшүүгө ачык экенин көрсөтүүгө чакырып жатат. Бул тууралуу The Washington Post гезити Ак үйдөгү өз булактарына таянып жазды.
Гезит аты аталбаган булактарга шилтеме жасап, америкалык аткаминерлердин өтүнүчү Украинаны сүйлөшүүгө түртүү эмес, Киевдин башка мамлекеттердин колдоосуна ээ болушун камсыз кылуу үчүн жасалган аракет экенин жазган.