НАТОнун чабармандары Польшага Орусиянын ракеталары түшкөн деген кабарды талкуулайт.
Түндүк атлантикалык альянстын (НАТО) чабармандары 16-ноябрда чукул жыйынга чогулуп, Орусиянын Украинаны бутага алган эки ракетасы Польшага түшүп, эки адамды набыт кылганы тууралуу маалыматты талкуулашмакчы.
Жолугушуу альянстын 4-беренесинин негизинде өткөрүлөрүн Reuters эки анонимдүү европалык дипломатка шилтеме кылып билдирди.
Шейшембиде орус аскерлери Украинанын кеминде 12 чөлкөмүнө ракетадан сокку урду. Маанилүү инфраструктура бутага алынып, электр энергиясы жапырт өчүрүлүүдө.
Украинанын абадан коргонуу системасы Киевге багытталган төрт ракетаны атып түшүрдү. Аткылоодон баш калаада эки турак жай жабыркаганын шаар мэри Виталий Кличко билдирди. Бир кишинин каза тапканы маалымалды. Киевдин тургундарынын жарымы электр жарыгысыз калды.
Украинанын президенти Владимир Зеленский "Чоң жыйырманын" саммитине жасаган видео кайрылууда Орусияны согушту токтотууга, миңдеген кишинин өмүрүн бөөдө кыйбоого чакырды.
Ал урушка “адилет жана БУУнун уставынын жана эл аралык укуктун негизинде” чекит коюлууга тийиш экенине басым жасады. Зеленский башка өлкөлөрдү Киевден “ар-намысы, суверенитети, эгемендиги менен компромисске барууну талап кылбоого” үндөдү.
Дүйшөмбүдө БУУнун Башкы ассамблеясы Орусия Украинага репарация төлөшү керек деген резолюцияны кабыл алды. Бул тууралуу Reuters агенттиги кабарлады. Аткарылышы милдеттүү эмес документти 193 мүчөнүн 94ү колдоду. Каршы добуш берген 14 өлкөнүн арасында Беларус, Куба, Иран, Зимбабве бар.
73 мамлекет, анын ичинде Кыргызстандын өкүлү калыс позицияны карманды.