АКШ: орусиялык мунай баасын чектөө - "Путинге сокку"
АКШнын финансы министри Жанет Йеллен ЕБ өлкөлөрүнүн жана "Чоң жетинин" орус мунайынын бир баррелин баасын 60 доллардан ашырбоо Кремлге сокку урат жана аны Украинага каршы агрессивдүү согуштан киреше табууга жол бербейт" деп эсептейт. Йеллендин айтымында, чектөө орусиялык режимдин негизги киреше булагын кыскартат.
Евробиримдик бул чечимди Польша колдогондон кийин бекиткен. Польша ага чейин сунушталган 65 долларлык баага макул болбой, бул Москвага карата "берешендик" болорун билдирген.
Варшава жана Балтия өлкөлөрү орусиялык мунайдын баррелин 30 доллардан ашырбоо талабын коюшкан. Ушундай эле ойду ЕБга кирбеген Украина да карманган.
Макулдашылган 60 долларлык баа кийинки жумадан тарта иштей баштайт. Индия азыртадан эле орусиялык мунайды батыштын жаңы чектөөлөрү күчүнө киргенден кийин гана сатып аларын билдирди.
Херсондон элди эвакуация кылып жатат
Украин бийлиги Днепрдин сол жээгиндеги элди жана бул райондон чыгууга үлгүрбөй калгандарды эвакуация кылып жатканын билдирди. Буга чейинки дарыядан сүзүп өтүүгө кирген чектөө алынды. Облустук адиминистрациянын маалымдашынча бул багытта кармаштар болушу мүмкүн, андыктан жай тургундарга аймактан чыгып кетүү сунушталды.
Латвиянын тышкы иштер министри Эдгар Ринкевич Украинага Орусиянын аймагындагы буталарды аткылоого уруксат берүүгө чакырды. Бул тууралуу пикирин ал НАТОго мүчө мамлекеттердин министрлеринин Бухаресттеги жыйынында айтты.
Bloomberg басылмасы келтиргендей, министр "уюмдагы өлкөлөр жаңжалдын курчуп кетишинен коркпошу керек" деди.
“Биз украиндерге ракеталык куралдарын жана аэродромдорун ушул максат үчүн колдонуусуна уруксат беришибиз керек”, – деди Ринкевич кесиптештери менен кездешүүдө.
Орусиянын Украина менен чектешкен Брянск облусунун Сураж районунда мунай заттарды сактаган кампа өрттөндү. Бул тууралуу аймактын губернатору Александр Богомаз 30-ноябрда кабарлады.
Облус жетекчиси кырсыктын себептерин тактаган жок. Окуя болгон жерде өрт өчүрүүчү кызмат иштеп жатат. Жабыркагандар тууралуу маалымат жок.