- Михаил Подоляк: согуш башталгандан бери 13 миң украиналык аскер кызматкери каза болду;
- Херсон кайрадан аткылоого кабылып, электр энергиясын берүү үзгүлтүккө учурады;
- Украинанын аскер күчтөрү Орусия Запорожьедеги калктуу пункттардан айрым бөлүктөрүн алып кетип жатканын ырастады;
- Европадагы Украина элчиликтери канга боелгон жана жаныбарлардын көзү салынган баштыктарды алууда;
- Киев-Печердук лаврынын дин кызматкери "орусиялык ыры" үчүн жоопко тартылды.
Кременная-Сватово багытындагы кармаштар
Украиналык аскерлер Луганск облусундагы багытта жай жылууда. Муну украиналык да, орусиялык да булактар билдирүүдө.
Орусиялык аскердик блогдордо украиналык аскерлер орусиялык күчтөр Харьковдон чегингенден кийин таяныч пункттарына айланткан Кременая жана Сватово шаарларын бириктирген трассадагы Чернопавловка аймагына карай чыкканы тууралуу маалымат пайда болду.
Украинанын Башкы штабы Чернопавловкада орусиялык чабуулдардын мизи кайтканын билдирди.
Луганск администрациясынын башчысы Сергей Гайдай Сватово-Кременная фронтундагы участокто украиналык күчтөр жоону "жай, бирок ишенимдүү тебелеп" баратканын билдирди. "Уруш ар бир жүз метр сайын болуп жатат, алдыга карай секириктер бар деп айтууга болбойт". Аймакта орусиялык күчтөр коргонуучу позицияга өтүп, миңдеген согушкерди соттолгондорго кошуп алып барган.
Аяздын түшүшү менен жер тоңуп жатканы жана бул аскерлерге аракет жасоого жеңилдик берери кабарланды. Буга чейин күзгү жамгырдан улам баткак болгондуктан кыймылга тоскоолдук жаралган.
Бахмуттун кварталдары
Украиналык агенттик UNIAN Бахмут шаарынын бузулган кварталдарынын аэросъемкасын жарыялады. Акыркы айларда орусиялык армия шаарга чабуул коюп жатат.
Орусия оккупацияланган Мариполдо аскердик база курду
Мариполдун борборунда аскердик база пайда болду. Бул тууралуу Би-Би-Си космостук жана аэрофотосъемка менен алектенген Maxar компаниясынын спутниктен тартылган сүрөттөрүнө таянып билдирди. Имараттын чатырында орус армиясынын логотиби жана "Орусиянын армиясы Мариполдун жашоочулары үчүн" деген жазууну көрүүгө болот.
Шаар орусиялык армияга ушул жайдагы үч айга созулган айыгышкан кармаштан кийин өткөн. Уруштун жүрүшүндө жарандык объектилер артиллериялык жана ракета-бомбалык чабуулга кабылган. Курмандыктардын так саны белгисиз. Украина 25 миңдей жай тургун өлгөнүн кабарласа, БУУ 1348 адамдын өлгөнүн расмий каттаган, уюм бирок курмандыктардын саны мындан да көп болушу мүмкүн экенин билдирген.