Украинанын Бахмут шаары үчүн айыгышкан салгылашуулар уланып, жоокерлер орус армиясынын чабуулуна туш болуп жатат. Бул тууралуу президент Владимир Зеленский билдирди. Орусия Бахмутту курчоого алуу максатында көп сандагы жөө аскерлерди колдонуп, украин күчтөрүнө кысымын күчөтүүдө.
"Орусия адамдарды такыр эсепке албайт, аларды позицияларыбызга улам чабуул коюуга жөнөтөт. Уруш күчөп баратат", — деди Зеленский 28-февралдагы кечки кайрылуусунда.
Украин куралдуу күчтөрүнүн башчылары аскерлер Донецк облусунун чыгышындагы шаарга чабуулдарын дагы күчөткөнүн 1-мартта маалымдады.
Башкы штабдын күндөлүк бюллетенинде айтылгандай, соңку 24 саатта 85 чабуулдун мизи кайтарылды, анын алдыңкы күнү 60 чабуул тууралуу кабарланган. Маалыматка караганда, абадан коргонуу күчтөрү Иранда жасалган эки дронду атып түшүрдү, шейшембиде украин аймагына абадан 12 сокку урулду, бир нече карапайым киши жараат алды.
28-февралда CNN телеканалына берген интервьюда президенттин кеңешчиси Александр Роднянский украин күчтөрү Бахмуттан “стратегиялык максатта чегиниши ыктымал” деп айтты.
Шейшембиде АКШнын Коргоо министрлигинин расмий өкүлү фронт тилкесиндеги абалды оор деп сыпаттап, Орусия жакынкы аралыкта олуттуу ийгиликке жетишет деп күтпөгөнүн белгиледи.
Зеленский Батыш өнөктөштөрдү украин армиясынын коргонуу дареметин көтөрүү үчүн учактар менен камсыздоого чакырып келатат.
Орусия Бахмутка өткөн жайдан бери чабуул коюп келатат, бирок жыл башында ал жактагы аракеттерин күчөттү.
Талдоочулардын айтымында, дээрлик толугу менен талкаланган шаарды алуу Орусия үчүн стратегиялык мааниге ээ эмес, бирок Москва аскерлерге дем берүү максатында Бахмутту өзүнө кайтарууга аракеттенүүдө.
Евробиримдик Орусияга каршы онунчу экономикалык санцияларды жарыялады. Брюсселдин "кара тизмесине" жеке адамдар да илинди. Бул ирет санкцияга кабылган 96 уюмдун ичинде Украинага каршы колдонулуп келген дрондорду өндүргөн жети ирандык ишкана да бар.
Тизмеге Орусиянын RT Arabic жана Sputnik Arabic медиа мекемелери да кирди.
Буга чейин салынган санкцияларды кыйгап өтүүгө жол бербөө максатында бул ирет жаңы чектөөлөр "эки багытта колдонулчу" товарларды Орусиянын аймагынан транзит аркылуу ташып өтүүгө да тыюу салды. Буга жарандык да, аскердик да тармак үчүн зарыл болгон ар кандай электрондук товарлар кирет.
Жаңы санкциялар Орусиянын жарандарына Евробиримдиктин маанилүү органдарында жана инфратүзүмдөрүндө жогорку кызматтарды ээлөөгө тыюу салат.
Санкцияга кабылган банктардын катарын “Альфа-банк”, "Тинькофф" жана “Росбанк” толуктады.
Евробиримдиктин тышкы иштер боюнча башкы комиссары Жозеп Боррель санкциялардын “кара тизмесине” алты миңдей украин балдарын депортациялап, күчтөп асыроого берүүгө көмөктөшкөндөр да кирерин билдирди:
"Миңдеген украиналык балдарды мажбурлап депортациялоо жасалган кылмыштардын тизмесинде өзүнүн ыпластыгы менен өзгөчө айырмаланып турат. Бейкүнөө украиналык балдарды уурдоо, аларды орусиялык үй-бүлөлөргө асыроого берүү үчүн жарандыгынан жана улутунан ажыратуу адам укуктарын, эл аралык мыйзамдарды жана Женева конвенциясын ачык бузуу болуп саналат. Бул украиналык балдар тез арада Украинага кайтарылышы керек".
Ал арада Орусиянын президенти Владимир Путин НАТОнун мүчөлөрүн Украинага курал-жарак берүү менен "жаңжалга тартылып жатат" деп айыптады. Россия-1 телеканалына берген интервьюда Путин НАТОнун өзөктүк мүмкүнчүлүктөрүн эске алуудан башка аргасы жок экенин жана АКШ баштаган аскердик альянс Орусияны жеңүүгө умтулуп жатканын билдирди. Путин "Мындай шартта алардын өзөктүк мүмкүнчүлүктөрүн кантип көрмөксөнгө сала алабыз?" деп суроо салды.
"Алар Украинага ондогон миллиард долларлык курал-жарак жөнөтүп жатышат. Бул чындап эле согушка катышуу. Батыш өлкөлөрүнүн бир гана максаты мурдагы Советтер Союзун жана анын негизги бөлүгүн - Орусияны бөлүп-жаруу. Ошондо гана алар балким бизди цивилизациялуу элдердин катарына кошот. АКШнын Советтер Союзу ураган соң дүйнөнү өздөрү каалагандай калыпка салуу аракеттери мына ушул кырдаалга келип такады. Биз жооп кайтарууга милдеттүүбүз".
Иркутск облусунан мобилизациялангандар Орусиянын президенти Владимир Путинге видео кайрылуу жолдоду. Анда «ДНРдин 1-славян бригадасы аларды өлүмгө айдап жатат, ал эми чабуулга баруудан баш тарткандарды автомат жана артиллерия менен аткылашууда» деп айтышкан. Видео кайрылуу “Люди Байкала” Телеграм-каналына жарыяланган.
Видеодогу аскерлер 1439-полктон экенин билдиришкен. Буга чейин ушул эле полктун экинчи батальону да ушундай кайрылуу жаздырышкан. Видеодогулар азыр ал батальон толугу менен жок кылынганын айтышты.
“Биздин кол башчыларыбыз бизге ачык эле өлүмгө айдаларыбызды айтышууда”, - деген жоокерлер. Алар аймакты коргоого тартылабыз деп келгенин, бирок анын ордуна чабуул коюучу бригадага киргенин айтышып, эч кандай артиллерия, байланыш, саперлор жана чалгынчыларсыз Авдеевск багытына чабуул коюуга мажбур болуп жатканын айтып чыгышты.
“Үйгө кайтып баруунун жалгыз жолу - жарадар болуу деп бизге командирлер ачык эле айтып жатат”, - деген жоокерлер командирлеринин аты-жөнүн билбей турганын, алардын жалгыз үмүтү президент экенин билдиришти.
Мобилизациялангандардын мындай кайрылуулары кадыресе көрүнүшкө айланган. 2023-жылдын февраль айынын башында бир жуманын ичинде эле Интернетке үч кайрылуу жарыяланган. Анда аскерлер эбегейсиз жоготуулар болуп жатканына, шарттын начар экенине жана командирлерден ур-токмок жеп жатканына даттанышкан.
АКШнын Чалгын кызматынын директору Уильям Бернс Кытай бийлиги Орусияга Украинадагы согушта колдонула турган курал-жарак берүү мүмкүнчүлүгүн карап жаткандыгы тууралуу маалыматы бар экендигин билдирди. Бирок анын айтымында, Бээжин азырынча акыркы чечимди кабыл ала элек. Бул тууралуу ал CBS News телеканалынын эфиринде билдирди.
Буга чейин Кытай Орусияга курал-жарак берүү тууралуу келишим түзүшү мүмкүн экендигин CNN, Financial Times жана Spiegel сыяктуу абройлуу батыш медиа каражаттары жазып чыгышкан. Өткөн жумада АКШнын мамлекеттик катчысы Энтони Блинкен АКШ мындай келишимге каршы экенин жана Бээжин муну ишке ашыра турган болсо, кесепети оор болорун билдирген.
Бернстин айтымында, учурда АКШнын атайын кызматында Кытай Орусияга курал-жарак берип жаткандыгы тууралуу эч кандай дилил жок. АКШ бийлиги бул маселени утур-утур көтөрүү менен Кытай бийлигин Орусияга курал-жарак берүү ниетинен баш тарттырууга ынандыргысы келет.
Кытай жакында эле 12 пункттан турган тынчтык планын сунуштады. Анда мамлекеттердин аймактык бүтүндүгүн урматтоо, сүйлөшүүлөрдү алдын ала коюлган шарттары жок баштоо, "Кансыз согуш" менталитетинен баш тартуу, Орусияга каршы кабыл алынган санкцияларды айыптоо сыяктуу бир катар сунуштар камтылган. Бирок анда согушту токтотууга багытталган иш-аракеттер сунушталган эмес.
Батыш өлкөлөрүнүн лидерлеринин көбү Кытайдын сунушун салкын кабыл алып, ал Орусияга гана ыңгайлуу экенин ишарат кылышкан. Франциянын президенти Эммануэл Макрон Кытайдан Орусияга басым жасоого жардам берүүсүн өтүнүп, Бээжинди курал-жарак бербөөгө чакырган.