ЕБ жыл аягына чейин 11 миңдей украиналык аскерди окутат
Европалык дипломатиянын башчысы Жозеп Боррель Стокгольмдо өткөн Евробиримдиктин коргоо министрлеринин бейформал жолугушуусуна катышты. Жыйын соңунда ал европалык тынчтык фондуна Украинага курал-жарак үчүн 1 миллиард евро бөлүүнү сунуштады. Дагы 1 миллиард Европанын өзүнүн запастары үчүн бөлүнүшү керек. Мындан тышкары ал марттын аягында Евробиримдик 11 миң украиналык аскерди окута турганын билдирди. 2023-жылы Евробиримдик жалпысынан 30 миң украиналык аскерди окутат.
Боррель мындан тышкары өткөн жылдагы "Түндүк агым" газ куурундагы жарылуу тууралуу комментарий берди. Ал диверсия тууралуу кеп болуп жатканын белгилеп, иликтөө бүтө электигине байланыштуу бүтүм чыгарууга эрте экенин айтты. Бирок ал зарыл инфраструктураны коргоо чаралары керек экенине токтолуп, Евробиримдик жана НАТОго мүчө өлкөлөр буга кадам таштаганын билдирди.
Британиялык чалгын кызматы: Пригожинден популярдуулук жагынан утулуп жатканы Шойгуну ыза кылууда
Улуу Британиянын Коргоо министрлигине караштуу чалгын кызматынын аналитиктери жаңы билдирмесинде 4-мартта Орусиянын коргоо министри Сергей Шойгунун Украинага барганы тартылган видео тууралуу жазышты.
Аналитиктер бул Шойгунун "ЧВК Вагнердин" башчысы Евгений Пригожиндин уруш талаасына байма-бай каттаганына жообу болушу мүмкүн дешет. Британиянын чалгын кызматынын билдиришинче, Шойгу өзүн Пригожинге салыштырганды жана аброюн жоготууну безге тийгендей оор кабыл алат.
Видеодо Шойгудан башка чини жогору аскерлерден Рустам Мурадов гана тартылганы, ал орусиялык аскерлер көп жоготууга учураган Угледарга карата ийгиликсиз чабуулду жетектегени тууралуу сөз болот. Америкалык согушту изилдөө институту (ISW) Орусиянын Тынч океан флотундагы алдыңкы деңиз пехотасынын 155-бригадасынын Угледардын жанында талкаланганын туура эмес тактикага жана бригада курамында мобилизация болгондордун басымдуулугуна байланыштырат. Британ чалгын кызматы муну менен Орусиянын Угледар алдындагы фронттун алдыга жылышын келечекте ийгиликке жетүү учуру катары эсептей турган эске салган.
Билдирмеде Орусиянын Коргоо министрлигинин алдында азыр Угледарга дагы чабуул коюу керекпи же Бахмуттун жанындагы "вагнерчилерди" колдоо керекпи деген тандоо турганы жазылган.
НАТОнун башкы катчысы Йенс Столтенберг орусиялык күчтөр Бахмутту жакынкы күндөрү алышы мүмкүн экенин четке какпайт. Бул тууралуу ал Евробиримдикке кирген өлкөлөрдүн коргоо министрлери Стокгольмдо чогулганда билдирди.
"Орусия сапат жагынан жетпеген нерсени сан жагынан толуктагысы келет. Алар чоң жоготууга учурады. Бул биз Орусияны баалабай коюуга болбойт дегенди билдирет. Биз Украинаны колдоону улантышыбыз керек", - деди Столтенберг. Анын айтымында, украин армиясынын Бахмутта жеңилгени согуштун чечүүчү учуру болуп саналбайт.
Шейшембиде Украина президенти Владимир Зеленский Бахмутту коргоо украин командачылыгынын тактикалык чечими. Зеленский шаарды коргоп жаткан украин аскерлери курчоодо калышына жол берилбейт.
Ал арада Украинанын куралдуу күчтөрү орусиялык армия Бахмутка улам жаңы армияны тартып келип жатканын билдирди.
Орусиянын армиясы учурда Купянск, Лиман, Бахмут, Авдеевка жана Шахтер аймагында чабуул коюп жатканын Украинанын куралдуу күчтөрүнүн кечки сводкасында айтылат.
Sky News телеканалы Иран Орусияга тымызын ири өлчөмдө курал-жарак бериши мүмкүндүгү тууралуу иликтөө жарыялады. Анда Каспий деңизи аркылуу келген 100 миллион даана ок-дары жана 300 миң артиллериялык снаряд тууралуу сөз болгон.
Журналисттердин ырасташынча, быйыл январда Ирандын портторунан Астраханга эки жүк ташуучу кеме келген жана анда курал-жарак жүктөлгөн 200дөй контейнер болгон. Атайын кызматтагы булактар аталган телеканалга эки кеме тең Орусиянын желеги менен сүзүп келгенин жана Москва жүк үчүн накталай акча төлөгөнүн кабарлаган.
Кемелердин жүрүшүн каттаган электрондук система январда эки кеме Ирандан Астраханга келгенин көрсөткөн жана бул спутниктен тартылган сүрөттөргө да түшүп калган.
Кемелерде кандай жүк болгонун башка булактардан тактоо азырынча мүмкүн эмес. Орус бийлиги жана кемелердин кожоюндары комментарий берүүдөн баш тарткан.
Киев Москваны согушта жарандык объекттерге чабуул жасоодо Ирандын "Шахед" дрондорун колдонуп жатканын айтып айыптап келет. Буга чейин Тегеран Орусияга жүздөгөн дрон бергени тууралуу маалыматтар чыккан. Москва мындай маалыматтар негизсиз билдирген.
Былтыр ноябрда Иран Орусияга учкучсуз аппараттарды жөнөткөнүн биринчи жолу бышыктаган, бирок Орусия Украинага каршы согуш баштаганга чейин чакан өлчөмдө берилгенин айткан.