Украинанын куралдуу күчтөрүнүн Башкы штабы 28-мартка караган түнү өлкө аймагына абадан сокку уруу үчүн орусиялык армия 15 даана ирандык "Шахед-136-131" үлгүсүндөгү дрондорду колдонуп, алардын 14ү украин аскерлери тарабынан жок кылынганын билдирди.
"Украинанын бардык аймагында ракеталык жана абадан сокку уруу ыктымалдыгы жогору бойдон калууда", - деп айтылат расмий маалыматта.
Ошол эле маалда Киев шаардык аскер башкармалыгынын башчысы Сергей Попко Киевге жакын жерде 12 учкучсуз учак атып түшүрүлгөнүн кабарлады.
Украинанын Куралдуу күчтөрү 27-мартта кечинде 12 "Шахед", бир чалгындоочу учкучсуз учак атып түшүрүлгөнүн, орусиялыктар сокку урууда "Шахед 136/131" дрондору менен "Гранат-4" учкучсуз чалгындоочу системаны колдонгонун ырастады.
27-мартта саат 22:00 чамасында Киев, Чернигов, Сума, Днепропетровск, Запорожье жана Луганск облустарында абадан чабуул болушу мүмкүн экени эскертилди. Кийинчерээк аба коркунучу Херсон, Житомир жана Кировоград облустарында да жарыяланды.
Украинанын Аскер-аба күчтөрүнүн командачылыгынын басма сөз катчысы Юрий Игнаттын айтымында, орусиялык аскерлер түндүктөн жана түштүк-чыгыштагы Брянск облусу, Азов деңизинин чыгыш жээгинен чабуулга өткөн.
Киевдин мэри Виталий Кличко Телеграм каналына Орусия ирандык ("Шахид") дрондордон сокку ургандан кийин шаардын эки районунда жарылуулар болгонун жазды.
Украинанын президенти Владимир Зеленский дүйшөмбүдө түштүктөгү Запорожье аймагындагы аскерлердин позицияларына барып кетти.
Бул тууралуу мамлекет башчынын кеңсеси билдирди. Маалыматка ылайык, Зеленский жоокерлер менен баарлашып, мамлекеттик сыйлыктарды тапшырды. Президент фронттогу кырдаал, аскерлерди ок-дары, техника менен камсыздоо иштери жөнүндө маалымат алды.
Ал арада Донецк облусунун украин армиясынын көзөмөлүндөгү Славянск шаары аткылоого туш болгону кабарланды. Жергиликтүү бийлик орус аскерлери шаарга С-300 ракеталарын атканын билдирди. Бери дегенде бир кишинин мерт болгону, 25 кишинин жараат алып, кыйроолор катталганы маалымдалды.
Бахмуттун түштүк тарабындагы Дружковка шаарчасы да ракета соккусуна кабылган. Андан балдар үйү урап калганы, бирок жабыркагандар болбогону кабарланды.
Москва далилдерге карабай жарандык жайларды бутага албаганын айтып келет.
Украинанын Орусия басып алган Мелитополь шаарында жарылуу болду
Калааны сырттан башкарган мэри Иван Федоров орус коопсуздук күчтөрү жайгашкан имарат аткыланганын билдирди.
“Орусия менен биргебиз” кыймылынын төрагасы Владимир Рогов таңкы саат сегизден өткөндө артиллериялык куралдан аткылоо болгонун маалымдады. Анын белгилешинче, көп тармактуу коллеждин жанындагы имарат жарым-жартылай талкаланган, төрт адам жабыркаган.
Запорожье облусундагы Мелитополь шаары согуштун башында аннексияланган.
"Азаттык" радиосунун орус кызматы тактаган кабарларга ылайык, Орусиянын Херсондон чегинген түштүк фронттун командачылыгы Мелитополго жайгашкан.
Ростовдо депутат балдар эмгегин аскердик керектөө үчүн пайдаланууну сунуштады
Ростов облусунда ата-эненин уруксаты жок эле мектеп окуучуларын окоп үчүн шамдарды даярдоого тартууну сунуштады. Мындай демилгени Коммунисттер партиясынын (КПРФ) аймактык депутаты Татьяна Иващенко көтөргөнүн Кавказ.Реалии жазды.
Окоптук шамдарды жана маскировка үчүн торлорду жасоону Иващенко "коомдук мааниси чоң ыктыярдуу эмгек" деп атап, мындай ишке окуу жайларын тартууга ата-энелердин уруксаты кереги жок экенин айтты.