Орусиялык аскерлер Бахмут, Авдеевка и Марьинканы курчоого алып жатат
Украинанын куралдуу күчтөрүнүн Башкы штабынын билдирүүсүндө Орусиянын армиясы Бахмутка чабуул коюп толук көзөмөл орнотууга аракет кылууда. Киев 20 чабуулдун жана Ивановка шаарынын районундагы чабуулдун мизин кайтарганын билдирди.
Жекшембиде АКШ менен Орусиянын тышкы саясий мекемелеринин башчылары Энтони Блинкен менен Сергей Лавров телефондо сүйлөштү.
АКШнын мамлекеттик катчысы Энтони Блинкен Wall Street Journal (WSJ) басылмасынын журналисти, Орусияда тыңчылыкка шектелип камакка алынган Эван Гершковичти тезинен бошотууга чакырды.
Блинкен кабарчы менен байланышкан жагдайды "кабыл алынгыс" деп атаганын Мамлекеттик департаментке шилтеме берүү менен "Америка добушу" маалымдады.
Блинкен менен Лавров дипломатиялык өкүлчүлүктөргө өз ишин аткара турган шарттарды түзүүнүн маанисин да талкуулашты.
Орусиянын Тышкы иштер министрлигинин Телеграм-каналында маалымдалгандай, Сергей Лавров Блинкенге "орус бийлигинин чечимдерин урматтоо зарылдыгын" айткан.
"Вашингтондогу расмий өкүлдөрдүн жана батыштагы маалымат каражаттарынын бул ишке саясий боёк берип, чуу салышына жол берилбестиги белгиленди", - деп жазылган Москванын маалыматында.
Орусияда расмий аккредитациядан өткөн журналист Эван Гершкович 29-мартта Екатеринбургда Москванын Киевге каршы согушуна жана “вагнерчилерге” карата орусиялыктардын мамилеси тууралуу материал даярдап жүргөндө кармалган. Ал тыңчылыкка шектелүүдө.
32 жаштагы Эван 2017-жылдан бери Москвада жашап, соңку бир жылдан бери The Wall Street Journal гезитинин кабарчысы болуп иштеп аткан.
Аталган басылма кабарчыга коюлган айыптоону кескин четке каккан.
Орусиянын Тергөө комитети аскердик кабарчы делген Владлен Татарскийдин өлүмүн Кылмыш-жаза кодексинин "Киши өлтүрүү" беренеси менен иликтей баштады.
2-февралда Санкт-Петербургдун борборундагы кафеде жардыруу болуп, Владлен Татарский (өз аты Максим Фомин) мерт кеткен. Кафеде анын чыгармачыл кечеcи өтүп жатканы кабарланган. Жардырууда жабыркаган 30 адамдын 24ү ооруканага жаткырылганын жергиликтүү маалымат каражаттары жазышты.
Мамлекеттик каналдар жардырууну 26 жаштагы жергиликтүү тургун - Дарья Трепова жасаганын маалымдашты. Тергөө Владлен Татарский сүйлөп жаткан кафеге жардыргыч зат орнотулган статуэтка салынган кутуну Трепова алып келген деп эсептейт.
Ички иштер министрлиги Дарья Треповага издөө жарыялаганы белгилүү болду. Бирок ал кайсы кылмыш ишинин алкагында изделип жатканы белгисиз.
Baza Телеграм-каналы полиция Трепованын күйөөсү Дмитрий Рыловду да издеп жатканын, батири тинтүүгө алынганын жазды. Рылов кафедеги жардырууга катышкан деп шектелүүдө. Бирок ал Татарскийдин кечесине катышкан эмес.
Татарский буга чейин Донбасста орусиячыл күчтөрдүн катарында согушуп, ал жактан репортаж даярдап келген. Украин маалымат каражаттары аны кремлчил пропагандачы деп аташат.
Украинанын президенти Владимир Зеленский 5-апрелде Варшавага расмий сапар менен баруну пландап жатканын Польшанын президенти Анжей Дуданын кеңсеси билдирди.
Зеленский поляктар жана ал жакта жашаган украиндер менен Падышалык сарайда жолугушат.
Азырынча Киев бул тууралуу маалымат бере элек.
Орусия Украинага басып киргенден бери Польша Украинага ырааттуу каржылык, коргонуу жана гуманитардык колдоо көрсөтүп келүүдө. Польша - эң көп украин качкындарына баш калка берген өлкөлөрдүн бири.
Согуш башталганы Зеленский АКШга, Британияга, Францияга жана Бельгияга барып келди.