Крымды бошотуу планы жана Бахмуттагы катуу кармаш
Акыркы жумаларда аннексияланган Крымда орусиялыктар коргонуучу жайларды орнотуп, жарым аралды "бекем корголгон аймактын бирине айлантты" деп жазды The Washington Post. Басылма мындай бүтүмгө Крымдагы спутниктен тартылган жаңы сүрөттөрдү көргөндөн кийин келген. Украинанын президентинин кеңсесинин башчысынын кеңешчиси Михаил Подоляктын айтымында, Украина Крымды беш же жети ай аралыгында бошотуп алышы мүмкүн, согуш Украинанын бардык аймагы бошотулганда гана токтойт. Ал эми Бахмутта эвакуация ишин жүргүзүүгө мүмкүн боло элек. Шаарды орусиялык күчтөр бир нече айдан бери алууга аракет кылууда.
Москва Украина орусиялык коммуникациялык спутниктерге таасир этип жатканын билдирди
Орусиянын ТИМи Украина "башка өлкөдөгү адистер менен чогуу" орусиялык спутник байланыштарына таасир этип жатканын билдирди.
Орусиянын Тышкы иштер министрлиги кайсы спутниктер тууралуу кеп болуп жатканын тактаган жок Бирок орус ТИМ жооп чаралар болорун айтып коркутту. "Бул эл аралык укукту одоно бузуу. Орус тарап ошондой жол менен жооп кайтара алат. Бул үчүн бардык зарыл чаралар даяр", - деп айтылат Орусиянын тышкы иштер боюнча мекемеси.
Британ чалгын кызматы: Орусия Украинадагы согушту кыйыр каржылаш үчүн өз карызын сатыкка коюуда
Британиялык аскер чалгын кызматы "Орусия Украинадагы согушту каржылаш үчүн өзүнө "дос өлкөлөрдөн" финансылык жардам алууну көздөп жатат" деген тыянакка келди.
Чалгын кызматы "Орусиянын премьер-министри Михаил Мишустиндин 2023-жылдын 28-марттагы билдирүүсү бул өлкө карыз боюнча милдеттенмесин чет элдик валютага өткөрүү үстүндө иштеп жатканына ишарат кылуу" деп чечмелеген.
"Орусиялык расмий адамдар тышкы карыз тууралуу милдеттенмелерди финансылык брешти жабуунун бир жолу катары кароо менен Украинадагы согушту созууга аракет кылып жатат. Мындай кадам Орусиянын "дос" деп эсептеген өлкөлөрдөн каржылык колдоо күтүп жатканын билдирет. Милдеттенме толук иштелип бүтөрү менен башка өлкөдөгү инвесторлор Орусиянын тышкы карызын сатып алып, өлкөнүн бюджеттик тартыштыгын каржылайт. Акыркы айларда өлкөнүн тышкы карызынын негизги сатып алуучулары орус банктары болгон. Бирок алардын бюджет тартыштыгын толук жапканга кудрети жетпейт. Орусиянын тышкы карызын сатуу менен бюджет тартыштыгын жоюу чарасы иштеп кетери азырынча белгисиз", - деген бүтүм чыгарган чалгын кызматы.
Донецк облусунун башчысы Павел Кириленконун маалыматына ылайык, орус аскерлеринин аткылоосунан аймакта төрт киши мерт кетти. Бул тууралуу ал шаршембиде эртең менен Телеграм каналына жазды. Ал эми украин куралдуу күчтөрүнүн Башкы штабы акыркы 24 саатта ракетадан үч, абадан 47 сокку урулганын, анын 17синде ирандык “Шахед” дрондору колдонулганын билдирди. Штаб 14 дрон атып түшүрүлгөнүн тактады.
Ошондой эле украин жоокерлери каршы тараптын 60тан ашуун чабуулунун мизин кайтарганы маалымдалды. Бахмут, Авдеевка жана Марьинка шаарлары кармаштардын чордонунда кала берүүдө.
Херсон облусунда бомбалоодон үч киши, Сумыда бирөө жарадар болгонун жергиликтүү бийлик билдирди.
Ал арада Кошмо Штаттары Украинага 2,6 млрд. долларлык жаңы аскердик жардам берилерин жарыялады.
Пентагондун маалыматына караганда, жаңы жардам топтомуна HIMARS системалары үчүн ок-дары, Patriot абадан коргонуу системасы, артиллериялык снаряддар, 400 гранатомет, оор жабдууларды, күйүүчү май ташыган автоунаалар, транспорт каражаттары жана техникалык кызмат көрсөтүүгө 500 млн. доллар кирет.
НАТОнун баш катчысы Йенс Столтенберг бул “логистиканын кармашы”, "алсыратуучу согуш" болуп калганын, майданга ок-дары, курал-жарак жана жабдууларды жеткирүү маанилүү экенин "Эркин Европа/Азаттык" радиосуна берген маегинде белгилеген.