Бахмутту көзөмөлдөө үчүн болгон кармашта эки тараптан тең оор жоготуулар болду. "Азаттыктын" украин кызматы жөө аскерлердин Экинчи дүйнөлүк согуштан берки эң кандуу согушу деп атады. Орусиялык армия Бахмутка 2022-жылдын июлунан бери чабуул коюп жатат. Шаар талкаланды, бирок Украинанын күчтөрү каршылык көрсөтүп, коргонуусун улантууда.
Кытайдын лидери Си Цзинпин украин президенти Владимир Зеленский менен сүйлөшүүгө даярдыгын айтты. Бул тууралуу Еврокомиссиянын төрайымы бейшембиде билдиргенин Рейтер агенттиги маалымдады. Ушул эле күнү Урсула фон дер Ляйен жана француз президенти Эммануэл Макрон Бээжинде Си Цзинпин менен жолугушкан.
Макрондун айтымында, Батыш украин согушуна чекит коюу жана дүйнө державаларынын эки касташкан лагерге бөлүнүп калышын алдын алуу аракеттерине Кытайды тартыш керек.
Си Цзинпин Москва менен Киев мүмкүн болушунча тезирээк тынчтык сүйлөшүүлөрүн өткөрүшөт деп үмүттөнөрүн айтты. Кытай лидери Бээжинди жаңжалды жөнгө салууда ыктымал арачы кылып көргөзүүгө арактетенгени менен, Батыш ал Орусияны колдойт деп санайт.
“Президент Сиден Зеленский менен сүйлөшүүгө даярдыгын угуу кызыктуу болду”, - деп айткан фон дер Ляйен анын сөздөрүн “позитивдүү” деп сыпаттады.
Маалыматка караганда, Кытай жетекчиси сүйлөшүү “ыңгайлуу шартта жана убакытта өтөрүн” кошумчалады.
Си Цзинпин мартта орус президенти менен Москвада жолуккандан кийин Зеленский Кытайдын лидери менен кездешүү ниетин билдирип келатат.
Макрон менен фон дер Ляйенге чейин Бээжинге Германиянын канцлери жана Испаниянын өкмөт башчысы барып кетишкен.
Жакында Еврошаркеттин тышкы саясатынын жетекчиси Жозеп Боррелдин Бээжинге аттанары маалым болду.
Талдоочулар европалыктарды биримдиктин ири соода өнөктөшү болгон Кытайдын Орусия менен жакындашуусу сарсанаа кылып жатканын айтышат. Алар Си Цзинпинди Путинди согушта курал-жарак же каржылык жактан колдобоого көндүрүү аракетин көрүшүүдө.
21-мартта Кытай жана Орусиянын жетекчилери Москвада расмий жолугушкан. Анын жүрүшүндө Украина негизги талкууланган маселелердин арасында болчу. Ага чейин Бээжин согушту жөнгө салуу планын сунуш кылган. Бирок Батыш ал сунушту салкын кабыл алган
Reuters агенттиги ишенимдүү күбөлөргө таянып, Украина контрчалгын үчүн 40 миң адамдан турган куралчан топ чогултканын жазды.
Агенттик бул топ февраль айынан бери социалдык медиа жана көчөдөгү көрнөктөр аркылуу чыгып жаткан жарнаманын негизинде жыйналган ыктыярчылар экенин белгилеген.
Украинанын ички иштер министри Игорь Клименко агенттикке топто мурдагы полиция жана аскер кызматкерлеринен тартып аскердик тажрыйбасы жоктор, анын ичинде аялдар да тартылганын айткан. Ал аскердик тажрыйбасы барларды согушка даярдоого эки, тажрыйбасы жокторду даярдоого төрт ай кетерин айткан. Клименко Украинанын мобилизация болуучу потенциалы барын белгилеген. Жаңы адамдар "Азов", "Стальная граница", "Ураган", "Спартанец", "Червона Калина", "Рубеж", "Ярость" жана "Кара Даг" бөлүктөрүнө тартылууда.
Агенттик "Орусия басып алган аймактарды кайтаруу аракети ийгиликсиз аяктаса, Батыштагы өнөктөштөр Киевди Москва менен сүйлөшүү жүргүзүүгө түртүшү мүмкүн" деп жазган.
"Билборддор кармашы" - украиналыктар Беларус менен чек арага жакын жерде Бучадагы кадрларды көрсөткөн чоң проектор орнотту.
"Белсат" каналы күбөлөргө таянып, Житомир облусуна орнотулган проектордун үнү чек аралаш аймактарга угулуп жатканын жазды.
Экранда Лукашенконун Орусияны колдоого убада берген сөзүнөн үзүндү, Беларус аймагынан сокуу урулгандан кийинки украин шаарларынын абалы, Бучада каза болгон адамдар көрсөтүлөт. Андан тышкары украин президенти Владимира Зеленскийдин беларустарга кайрылып, согушка катышпоого чакырганын да көрсөтүшкөн.