Украина Херсон жана Харьков облустарынан Орусиянын аймагына чыгарылып кеткен 31 баланы кайтарып алды. Бул тууралуу Save Ukraine кайрымдуулук фонду билдирди.
“Орусиялыктар Херсон жана Харьков облустарынан уурдап кеткен балдар чек арадан өтүштү. Азыр алар коопсуз жайда. Бир нече айдан кийин алар кайра өз үй-бүлөлөрүнө кайтып келишет”, - деп жазды фонддун жетекчиси Николай Кулеба фейсбук баракчасына.
Бул аталган фонддун бешинчи куткаруу миссиясы.
“Ар бир кайтарылган бала алардын [орустардын] кылмыштарынын айныгыс далили болуп жатканын түшүнүп турат”, - деди Кулеба РБК-Украина басылмасына сүйлөп жатып.
17-мартта Гаагадагы Эл аралык кылмыш соту орус президенти Владимир Путинди жана Мария Львова-Белованы камоо ордерин чыгарган. Алар оккупацияланган украин аймактарынан балдарды Орусияга мыйзамсыз депортациялоого жооптуу деп айыпталган. Мындай аракет согуш кылмышы болуп эсептелет.
Орусия 2016-жылдан бери Рим статутуна кошулбагандыктан, Гаага сотунун юрисдикциясын тааныбайт. Өз дарегине айтылган айыптоону чекте кагып, Эл аралык кылмыш сотунун судьяларына кылмыш ишин козгогон.
Украинанын президенти Владимир Зеленский мусулман динин туткан аскерлер үчүн уюштурулган ооз ачыруу (ифтар) иш-чарасына катышты. Ага дипломаттар, Крым-татар элинин межилисинин өкүлдөрү да катышканын украин президентинин администрациясы билдирди. Зеленский мындай иш-чара мусулмандардын ыйык Рамазан айында эми салтка айлана турганын айтты. Ооз ачыруу 7-апрелде болгон.
Владимир Зеленский анда Украинадагы мусулмандарга ыраазычылык айткан.
Краматорскидеги каргашага бир жыл
Украина Краматорскиге орусиялык күчтөр сокку ургандан кийин каза болгондорду эскерүүдө. 2022-жылы 8-апрелде орусиялык аскерлер "Точка-У" ракеталык комплексинен Краматорскидеги темир жол вокзалына сокку урган. Ошол маалда вокзалда коопсуз аймактарга эвакуация болуу үчүн барган төрт миңдей адам болгон. Соккудан 61 адам өлүп, 120 адам жараат алган.
Украинанын президентинин кеңсесинин башчысынын кеңешчиси Михаил Подоляк жашыруун документтердин ачыкка чыгып кетишин орусиялык чалгын кызматынын оюну деп эсептейт.
"Жашыруун маалыматтарды чыгаруунун максаты 1) Көңүлдү башка жакка буруу, 2) Күмөн ой жаратып, ич ара шек саноого жол ачуу, 3) Ажырым жаратуу. Бул Орусиянын чалгын кызматынын адаттагы оюну. Ачык брифингдерди аласың, жалган маалыматтарды кошосуң, айрым элементтерди бөлүп алып, социалдык түйүндөргө жарыялайсың" деди Подоляк Твиттерде.
АКШнын жана НАТОнун жашыруун жүздөй документинин ачыкка чыгып кетиши боюнча "Агентство" мындай дейт:
Bellingcat интернет-басылмасынын журналисти Арик Толердин анализинде маалымат алгач 1-мартта пайда болгон. Жашыруун маалыматы бар сүрөттөр адегенде Minecraft оюнунун discord-серверинде пайда болгон (күйөрмандар уюмунун түйүнү). Атын атабаган америкалык кызмат адамдары ачыкка чыгып кетүү артында Орусия турат деп эсептейт.
Журналисттер Пентагондун документтериндеги фото сүрөттөр 4chan имиджбордуна, Твиттерде жана орусиялык Телеграм-каналдарда 6-7-апрелде пайда болгонун байкашкан. Бирок Арик Толер discord билдирүүлөрдү марттын башында бул жана башка сүрөттөр менен тапкан. Толердин маалыматында 30дан ашуун документ WowMao discord-серверде 1-2-мартта пайда болгон. Дагы 10 документ Minecraft оюнунун discord-серверинде 4-мартта чыккан. Сүрөттөрдүн жарымын Lucca деген колдонуучу жарыялаган. Толер discord-серверге мурда чыккан документтерди мисал кылып, Lucca ал документти башка колдонуучудан алышы мүмкүн деп эсептейт.
Бир айдан кийин, 5-апрелде discord-серверге чыккан үч файлды 4chan жарыялаган. Ошол күнү беш файл, ошол эле күнү тараптардын жоготуулары тууралуу редакциялаган беш документ орусиялык Телеграм-каналдарда тараган.
Эгер башында беш гана сүрөт социалдык медиага активдүү тарап жаткан болсо, 7-апрелдин кечинде чыккан документтердин саны жүзгө жеткенин The New York Times жазды. Жарыяланган документтердин көпчүлүгүндө февраль айы көрсөтүлгөн. Алар интернетке түзүлгөндөн тарта чыга башташы мүмкүн деп белгиледи басылма.