Орусия аннексиялап алган Севастополдогу мунай сактоочу жайга урулган сокку – Киевдин каршы чабуулга даярдыгынын бир бөлүгү. Бул тууралуу Украинанын коргоо күчтөрүнүн түштүктөгү өкүлү Наталья Гуменюк билдирди.
Гуменюктун айтымында, мунай базасындагы өрттөн кийин орус аскерлеринин кооптонуусу күчөп, алар үй-бүлөлөрүн эвакуациялап, мүмкүн болсо аннексияланган Крымды таштап кетүүгө ниеттенишүүдө.
"Бул иш бардыгы күткөн кеңири масштабдуу чабуулга даярдык болуп саналат", - деди коргоо күчтөрүнүн түштүктөгү басма сөз өкүлү.
29-апрелде Севастополь шаарындагы Казачья булуңунда мунай сактоочу жайда өрт чыккан. Төрт цистерна күйүп кеткен, эч ким жабыркаган эмес. Севастополдун орусиялык губернатору кампага эки дрон чабуул койгонун билдирген. Алардын бири атып түшүрүлгөн.
Ушул эле күнү Украинанын президенти Владимир Зеленский батыш басылмаларына маек куруп, көптөн бери айтылып келе жаткан контрчабуул ийгиликтүү болорун жана ал Орусия басып турган украин аймактарынын, анын ичинде Крымдын бошотулушуна алып келерин билдирген.
Украинанын Павлоград шаарына түн ичинде жасалган орусиялык күчтөрдүн ракета чабуулунан 25 адам жаракат алды, анын ичинде үч жаш бала бар. Бул тууралуу Днепропетровск облусунун башчысы Сергей Лысак Телеграм каналына жазды.
Анын маалыматына караганда, ракеталардын жетөө Украинанын абадан коргонуу күчтөрү тарабынан атып түшүрүлгөн. Ракеталардан 19 көп кабаттуу үй, 25 жер там, алты мектеп менен бала бакча, беш дүкөн жабыркаган. Ракеталардын бири өнөр жай ишканасына тийип, өрт чыккан. Аймакта жалпысы болуп 40 үй кыйраганы кабарланууда.
Украина аскерлери 1-майга оогон түнү Орусиянын канаттуу ракеталарынан чабуул болгонун билдирүүдө. Украинанын Куралдуу күчтөрүнүн кол башчысы Валерий Залужный Фейсбук баракчасына чабуулга Каспий деңизинин аймагынан “Ту-95” үлгүсүндөгү тогуз, “Ту-160” үлгүдөгү эки бомбалоочу учак тартылганын кабарлады. Анын айтымында, Украинанын абадан коргонуу күчтөрү 15 ракетаны атып түшүргөн.
Буга чейин Киевдин администрациясы борборго атылган бардык ракеталар атып түшүрүлгөнүн билдирген. Орусиянын Коргоо министрлиги Украинага жасалган ракеталык чабуул боюнча комментарий бере элек.
Мындай маалыматтарды бир нече көз карандысыз булактардан тактоо мүмкүн эмес экенин да эске салабыз.
Бурятиянын борбору Улан-Удэ шаарындагы орус драма театрынын артисти Артур Шувалов Орусиядан чыгып кетти. Бул тууралуу "Сибирь.Реалии" Телеграм каналына жазды. Маалыматта айтылгандай, актердун мындай кадамына бийликтин психикалык ооруканага жаткыруу аракети себеп болгон. Шувалов өлкөдөн кандай жол менен чыгып кеткени ачык айтылган эмес.
Артур Шувалов Орусиянын Украинага баскынчылыгын ачык сындап чыккан. Ал согуштан жарадар болгон орус аскерлеринин алдында сахнага чыгуудан баш тарткан. Ошондой эле өзү иштеген театрдан аскердик атайын операциянын энбелгиси болгон Z тамгасы жазылган желекти алып салган.
Быйыл мартта актер театр сахнасынан согушка каршылыгын билдирип, колунун кан тамырын кескен. Ал жетекчилик тарабынан басым болуп жатканын билдирген.
Орусия Украинага былтыр, 24-февралда кол салган. Орус бийлигинин бул кадамын сынга алган айрым маданият кызматкерлери өлкөдөн чыгып кетишкен.