Украинанын Чернигов облусундагы Лизуновка кыштагына абадан сокку урулганда бир бала набыт болду. Бул тууралуу өлкөнүн Куралдуу күчтөрүнүн Башкы штабы 2-майда билдирди. Павлоград шаарына урулган соккудан эки жарандын өмүрү кыйылды.
Президент Владимир Зеленский соңку чабуулдарды айыптады:
"Орусиянын аба бомбасы дагы бир украин мектебин талкалады. Тилекке каршы, соккудан 2009-жылы туулган украиналык бала мүрт кетти. Ал болгону 14 жашта эле. Мектепке жакын жерде жашайт болчу. Үй-бүлөсүнө жана жакындарын көңүл айтам. Днепропетровск облусунун Павлоград калаасында террорчулардын ракеталары эки жаш жигиттин өмүрүн алып кетти. Алардын да жакындарына көңүл айтам. Соңку чабуулдарда дагы 40 киши жараат алды. Аларга медициналык жардам көрсөтүлүүдө".
Украин армиясы ошондой эле акыркы суткада Орусиянын Лиман, Бахмут, Марьинка жана Авдеевка багыттарындагы чабуулдары ийгиликсиз болгонун маалымдады. Орус аскерлери Новоселовка, Белогоровка, Предтечино, Северный жана Первомайский шаар-кыштактарын аткылады.
Украин аскерлери каршылаш тараптын 41 чабуулунун мизин кайтарды. Айрыкча, Бахмут менен Марьинка салгылаштын очогу бойдон калууда.
Ал арада Орусия Кара деңиздеги аскердик топторун азайтып жатканын Украинанын Аскер-деңиз күчтөрү кабарлады. 2-майда түш ченде таратылган маалыматка ылайык, Кара деңизде Москванын сегиз кемеси турат. Арасында канаттуу ракеталарды алып жүргөн кеме да бар. Ошол эле учурда буга чейин ал жерде Орусиянын канча кемеси болгону айтылган жок.
1-майга караган түнү Орусиянын стратегиялык авиациясы Мурманск облусунан жана Каспий деңизинин аймагынан чабуулга өткөн. Украинанын Куралдуу күчтөрүнүн башкы командачысы Валерий Залужный 18 ракетанын 15инин мизи кайтарылганын билдирген.
Соңку беш айда эле Украинанын Бахмут шаарынын аймагында 20 миңге жакын орусиялык аскер жок кылынганын, дагы 80 миңдейи жараат алганын 1-майда АКШнын Улуттук коопсуздук кеңешинин стратегиялык коммуникациялар боюнча координатору Жон Кирби америкалык чалгын мекемесинин маалыматына таянып билдирди. Анын айтымында, Орусиянын бул аймактагы кыймылы азыр дээрлик токтоп калды.
Кирби каза болгондордун жарымы “Вагнер” жалданма аскердик компаниясынын өкүлдөрү экенин кошумчалады.
Орусия АКШнын бул билдирүүсүнө комментарий бере элек.
2022-жылдын февраль айында Украинага кол салган орусиялык бийлик каза болгон аскерлеринин санын акыркы жолу ошол жылдын сентябрында жарыялап, сөз 6 миң чамалуу адам жөнүндө гана болуп жатканын билдирген.
«Вагнердин» негиздөөчүсү Евгений Пригожин каза болгондор тууралуу так маалымат айткан эмес, бирок жоготуулар көп экенин моюнуна алган.
Ал эми Украинанын жоготуулары жөнүндө эч нерсе айтпаганын Кирби “контрчабуулга камданып жаткан союздашынын түйшүгүн татаалдаштыргысы келбегени” менен түшүндүрдү.
"Би-Би-Синин" ачык маалыматтарга таянып жазганына караганда, Украина согуш башталгандан бери кеминде 22 миңдей аскеринен айрылды.
Орусиянын ар кайсы аймактарында 1-май - Эмгекчилердин тилектештигинин эл аралык күнүнө арналган акцияларда согушту сындаган айрым жарандар кармалды.
Чита шаарынын бийлиги митингди шаардын четинде өткөрүүгө уруксат берди. Акцияга келген отуздан ашуун киши орус бийлигинин Украинага каршы согушун сындап, тынчтыкка чакыргандар репрессияга кабылып жатканын айтышты.
Новосибирискиде шаар мэри катышкан майрамдык жүрүш болду, ал эми калаанын четинде согушка каршы акция уюштурулду. Doxa каналы мэр катышкан жүрүшкө 200дөй, согушка каршы акцияга 50 чамалуу киши катышканын жазды.
Санкт-Петербургда "Мир! Труд! Май!" жана Украинадагы согуштун символу саналган Z тамгасынын үстү чийилген плакат көтөрүп чыккан активист Сергей Тужиловду полиция кармап кетти.
Екатеринбургда тынчтыкка чакырган пикет уюштурган эже-сиңдини да полиция алып кеткенин "Свобода" радиосу кабарлады.
Казанда согушту токтотуп, саясий туткундарды камактан чыгаруу талабы менен пикет өткөргөн Наил Мухаметшинди полиция алып кетти.
Кармалгандар протокол түзүлүп, "түшүндүрүү иштери" жүргүзүлгөндөн кийин бошотулган.
Орусиянын Либералдык Демократиялык партиясы (ЛДПР) Minecraft компьютер оюну аркылуу онлайн митинг уюштурду. Партиянын маалыматына ылайык, виртуалдык акцияга кеминде 12 миң адам чогулду. Бирок алардын митингинин мазмуну тууралуу маалымат жок.
Орусиядагы “Вагнер” менчик аскердик компаниясынын жетекчиси Евгений Пригожин эгер курал-жарак менен жабдуу маселеси чечилбесе өзүнүн жоочуларын Украинанын Бахмут шаарынан чыгарып кетерин айтып коркутту.
29-апрелде жарыяланган интервьюсунда Пригожин жакын арада жетиштүү көлөмдөгү курал-жабдык жеткирилбесе, "айрым бөлүктөрүн" Бахмуттан чыгарууга мажбур болорун айткан. Жеке менчик компаниянын жетекчиси буга чейин да бир нече жолу ок-дарынын жетишсиздигин айтып, ал үчүн Москвадагы генералдарды күнөөлөгөн.
Донецк облусундагы дөңсөлөрдө жайгашкан Бахмут шаары 10 айга чукул майдандын очогуна айланып, жаатташкан эки тарап тең чоң жоготууларга учурады.
23-апрелде Орусиянын Коргоо министрлиги Бахмуттун батыш бөлүгүндөгү эки районду басып алганын билдирген. Ал эми Пригожин "вагнерчилер" шаарды дээрлик толугу менен көзөмөлгө аларын утур-утур айтып келет. Бирок жогорудагы маалыматтарды көз карандысыз булактардан бышыктоо мүмкүн эмес.
Украин президенти Владимир Зеленский Умандагы көп кабат үйгө тийген орустардын ракетадан сокку урулгандан кийин Батыштагы өнөктөштөрүнөн заманбап абадан коргонуу системасын берүүнү суранды.
BBC жана "Медиазона" басылмалары Украинадагы согушта өлгөн орусиялык 21 миң 700 жоокердин тек-жайын тактады. Алардын 3041и элиталык бөлүктөрдүн аскерлери.
Журналисттер согушта өлгөндөрдүн эсеби орус армиясынын Украинадагы жоготуусунун реалдуу санын билдирбей турганын, иш жүзүндө адам өлүмү мындан да көп адам болушу мүмкүн экенин белгилешет.