Украинанын Херсон шаарында иштеп жаткан жалгыз гипермаркетке урулган соккуда үч киши каза болуп, бешөө жарадар болду. Бул тууралуу 3-майда Украинанын Ички иштер министрлиги билдирди. Расмий маалыматка ылайык, каза болгондор жана жабыркагандар дүкөндүн кардарлары жана ошол жерде иштеген кишилер.
Сокку урулган "Эпицентр" гипермаркети Днепр дарыясына жакын жайгашкан. Азыр Днепрдин бою фронт линиясы деп саналат.
Украина бийлиги Херсондо 5-майдын кечинен 8-майдын таңына чейин 58 саат комменданттык саат жарыялады. Херсон администрациясынын башчысы Александр Прокудин бул укук коргоо органдарынын ишинде жардам берүү максатындагы чечим экенин билдирди.
Украина Херсон шаарын жана Херсон облусунун Днепр дарыясындагы оң жээк бөлүгүн былтыр ноябрда орус күчтөрүнөн бошотуп алган. Андан бери орустар облустун борборун жана башка калктуу аймактарды такай аткылап келет.
Видео жана сүрөттөр бышыктап турганына карабай, Орусия карапайым калк жашаган жерлерге сокку урганын четке кагат.
Украинанын Херсон шаарына 5-майдан 8-майга чейин коменданттык саат киргизилип жатат. Кечки саат сегизден таңкы алтыга чейин калаага кирип-чыгуу, көчөдө жүрүүгө тыюу салынарын облустук аскердик администрациясынын башчысы Александр Прокудин билдирди.
Анын айтымында, убактылуу чектөөлөр укук коргоо органдарынын кызматкерлери жергиликтүү тургундарга коркунуч жаратпай өз ишин аткарышы үчүн зарыл.
"Чыккынчыларга жана зөөкүрлөргө биздин жерибизде мыкаачылык кылууга жол бербейбиз. Укук коргоо органдарынын тоскоолдуксуз иштешин жеңилдетүү үчүн коменданттык саат киргизип жатабыз", - деп түшүндүрдү Прокудин.
Ал Херсондун калкын азык-түлүк жана дары-дармектерди камдап алууга чакырды.
Украина Херсон шаарын жана Херсон облусунун Днепр дарыясындагы оң жээк бөлүгүн былтыр ноябрда орус күчтөрүнөн бошотуп алган. Андан бери орустар облустун борборун жана башка калктуу аймактарды такай аткылап келет.
Видео жана сүрөттөр бышыктап турганына карабай, Орусия карапайым калк жашаган жерлерге сокку урганын четке кагат.
Брянск облусундагы аскердик аэродромго чабуул
Орусиялык Телеграм-каналдардын маалыматында, Брянск облусундагы аскердик аэродромго дрон менен сокку урулду. Беш дрондун экөө бутага тийип, колдонулбай турган "Руслан" Ан-124 учагына зыян келтирген.
Сокку Орусиянын Коргоо министрлигинин аскердик жүктөрдү ташыган 224-учуучу отряды жайгашкан Сеща аэродромуна урулганы айтылууда.
2-майда орусиялык Телеграм-каналдар бул облустагы темир жол түйүнүндөгү Снежетьская-Белые Берега станцияларынын аралыгында жарылуу болгонун жазышкан. Аймактын губернатору Александр Богомаз поезд рельстен жарылуучу жабдыктын ишке киргенинен улам чыгып кеткенин билдирген.
1-майда Брянск облусундагы Унеча шаарына жакын жерде жүк ташыган поезд рельстен чыгып кеткен. Күйүүчү май жүктөгөн бир канча цистерна күйүп кеткен. Кырсыкка диверсия себеп болушу мүмкүн экени айтылган.
3-майга караган түнү Украинанын борбору Киев учкучсуз учуучу аппараттардын чабуулуна кабылды. Шаарда жана ага жакын жайгашкан облустарда абадан коркунуч жаралганы тууралуу эскертүү берилди.
Киевдин аскердик администрациясы билдиргендей, соңку апта ичинде шаар ушуну менен үчүнчү жолу аба чабуулуна кабылууда, бул жолу Орусия Иранда өндүрүлгөн кезектеги Shahed дрондорун колдонду. Дрондордун баарын атып түшүрүүгө үлгүрүшкөнүн билдирген мекеме алардын саны канча болгону азыр такталып жатканын маалымдады.
Ал арада Кошмо Штаттар Украинага кезектеги аскердик жардамын көрсөтүү үчүн 300 миллион доллар бөлгөнү маалым болду. Америкалык аскерлердин маалыматына караганда, курал-жарак украин аскерлери пландап жаткан контрчабуулда керектелет.
Орусия Украинага 2022-жылдын февралында басып кирген, муну ал атайын аскердик операция деп атоодо. Дүйнөнүн алдыңкы өлкөлөрү Кремлди агрессор деп айыптоодо.