Орусиянын президенти Владимир Путин 12-майда Мамлекеттик миграциялык саясат концепциясына өзгөртүүлөрдү киргизген жарлыкка кол койду. Анда калктын өлкөдөн чыгып кетишинин алдын алуу боюнча чараларды көрүү каралган.
Документте айтылгандай, "2022-жылы социалдык-экономикалык шарттардын өзгөрүшүнүн таасири астында Орусиянын калкынын чет өлкөлөргө миграциялык агымы көбөйгөн". Мындай шарттарга эмне кирери түшүндүрүлгөн эмес.
2022-жылдын 24-февралында Путиндин буйругу менен Орусия Украинага бастырып кирген. Ошол эле жылдын сентябрь айында мобилизация жарыялаган. Ушундан кийин Орусиядан жүз миңдеген адамдар чыгып кеткен. Орусиялыктар өлкөдөн чыгып кеткен учурлар башка айларда дагы катталган, бирок алардын саны мобилизация жарыяланган кездегидей көп эмес.
Концепцияда Орусия аннексиялап алган Украинанын төрт облусунун, Донецк, Луганск, Запорожье жана Херсондун тургундарынын кайтып келүүсүнө шарт түзүү пункту дагы киргизилген. Шарттар же көрүлчү чаралар боюнча маалымат берилген эмес. Мында кеп Украинанын жарандары жөнүндө болуп жатат. Орус бийлиги алардын Орусия көзөмөлдөгөн аймактарга кайтып келиши үчүн кандай шарт түзүүнү көздөй турганы түшүнүксүз.
Жарлыктын дагы бир пунктунда Орусиянын аймагында "чет элдик жарандарды эмгекке уюшкандыкта тартууну күчөтүү" тууралуу да жазылган.
Украин президенти Владимир Зеленский апрелде Пасха майрамына карата жолдогон кайрылуусунда Киев орус күчтөрү ээлеп турган аймактарды бошоторун белгилеген.
Буга чейин Эл аралык кылмыш сотунун кармоо ордерине туш болгон Владимир Путин орус армиясына Украинанын Донецк, Луганск, Запорожье жана Херсон облустарын толук көзөмөлгө алуу буйругун берген. Москва бул аймактарды аннексиялаганын жарыялаган, бирок ал аймактардын бир тобу Украинанын көзөмөлүндө. Эл аралык коомчулук Кремлдин украин аймактарынын аннексиясы тууралуу чечимин тааныбайт.
Украинанын президенти Владимир Зеленский Орусия менен Беларустун коргонуу тармагындагы 200 ишканасына, ошондой эле алар менен байланышы бар жүздөгөн адамдарга каршы санкцияларды киргизди. Бул тууралуу Украина президентинин расмий сайтында жарыяланган документтерде айтылат.
Ага ылайык, чектөөлөргө "Роскосмос", орус Коргоо министрлигинин Борбордук илимий-изилдөө институту, "ГЛОНАСС", "Технолог" атайын конструктордук-технологиялык бюросунун федералдык ишканасы кирген.
Бул тизмеге Беларустун "Дисплей" конструктордук бюросу, "Локомотив-сервис", "БелАЗ", "Пеленг" жана "Гомсельмаш" баштаган 17 ишканасы киргизилди.
Зеленский бекиткен санкциялык пакеттин биринде, Кипрде жана Британиянын Виргин аралдарында жайгашкан Орусия менен байланышы бар оффшордук компанияларга чектөөлөр бар.
Украинанын президенти Орусиянын 13 жаранына жана өлкөнүн алдыңкы металлургиялык ишканаларынын бири болгон "Запорожстальды" көзөмөлдөгөн 28 юридикалык фирмага чектөө койду.
Санкциялар 5-10 жылга киргизилүүдө. Ал активдерге жана соода операцияларына бөгөт коюуну, Украинанын аймагы аркылуу транзиттик жана жүк ташууну токтотууну, лицензияларды жокко чыгарууну, келишимдерди жана бүтүмдөрдү түзүүгө тыюу салууну, ошондой эле технологияларды жана интеллектуалдык менчик укуктарын өткөрүп берүүнү карайт.
Украинанын коргоо министринин орун басары Анна Маляр 12-майда Телеграм-каналы аркылуу украин армиясы калаада эки чакырымдай алдыга жылганын билдирди.
"Курал-жарагы болсо дагы душман өз планын ишке ашыра алган жок жана көп аскерин жоготту. Бул аптадагы реалдуу кырдаал ушундай. Биздин коргоочулар Бахмут багытында эки чакырымдай алдыга жылды жана бир да позициясын жоготкон жок", - деп жазды Маляр.
Москва 11-майда украин күчтөрү айрым райондордо, анын ичинде Бахмутта алга жылганы тууралуу кабарларды четке каккан. Орусиянын Коргоо министрлиги "аскердик операция жүрүп жаткан райондогу жалпы кырдаал көзөмөлдө экенин" билдирди.
Эки тараптын тең маалыматтарын көз карандысыз булактардан ырастоо мүмкүн эмес.
Орусиялык "Вагнер" менчик аскердик компаниясынын башчысы Евгений Пригожин Украина контрчабуулун баштаганын билдирди.
11-майда Телеграм-каналы аркылуу жарыялаган аудиосунда украин күчтөрү даярдыктан өткөнүн жана тиешелүү курал-жарак менен жабдылганын айткан.
Андан бир аз мурда эле украин президенти Владимир Зеленский Би-Би-Сиге курган маегинде контрчабуулга өтүү үчүн куралдуу күчтөргө дагы көбүрөөк даярдык зарыл экенин билдирген.
"Биз бир аз күтө турушубуз керек. Бир аз убакыт керек", - деди Зеленский.
Пригожин Зеленскийди анткорлукка айыптап, учурда контрчабуул толук жүрүп, украин күчтөрү Бахмут аймагында соккуларды уруп жатканын кошумчалады.
Ал эми Орусиянын Коргоо министрлиги бул маалыматты четке кагып, "аймактагы жалпы кырдаал көзөмөлдө экенин" билдирди.
Украина Куралдуу күчтөрүнүн башкы штабы билдиргендей, орус армиясы Бахмут-Авдеевка-Марьинка согуш тилкесинде сокку урууну улантып жатат.
Ушул тапта Бахмут калаасынын 75% орус күчтөрүнүн көзөмөлүндө.