АКШнын Түштүк Африка республикасындагы (ТАР) элчиси Рубен Бриджети бул өлкөнү нейтралдуу позицияны карманганына карабай Орусияга курал-жарак жөнөткөнүн айыптады.
Ал жергиликтүү басылмаларга курган маегинде, былтыр декабрда Кейптаундун жанындагы базадан орусиялык кемеге курал-жарак, ок-дары жүктөлгөнүнө ишенерин айтты.
Өлкөнүн президенти Сирил Рамафоса комментарий берип жатып, өкмөт бул маалыматты териштирерин билдирди.
Рубен Бриджети Преторияда басма сөз жыйынында ТАРдын Орусиянын Украинага каршы согуш ачканына байланыштуу позициясы Вашингтондун камтамачылыгын жаратарын билдирди. Америкалык дипломат Lady R жүк ташыган кеме Саймонстаундагы аскер-деңиз базасында былтыр 6-декабрдан 8-декабрга чейин турганына, анда Орусияга кайтканда кемеге курал-жарак жүктөлгөнүнө көзү жетерин айтты.
Кошмо Штаттары бир канча айдан бери ТАР бийлигин Орусия менен "ыңгайлуу" мамилесин сактап алганын сынга алып келген. Вашингтон анда аталган өлкө Украинага каршы согуштун бир жылдыгында Москва менен Бээжиндин аскердик машыгууларына катышканына байланыштуу тынчсыздануу билдирген.
Бириккен Улуттар Уюмунда (БУУ) Москванын Киевге каршы согушун айыптаган резолюцияга добуш берүүдө Претория добуш берүүдөн карманган. Андан сырткары өлкө АКШ баштаган бир катар өлкөлөрдүн Москвага каршы санкциясына дагы кошулган эмес.
Ушул айдын башында бул өлкөнүн бийлиги Орусиянын президенти Владимир Путиндин жайында ТАРда өтө турган БРИКСтин саммитине келбөөсүн өтүнгөнү белгилүү болгон. Буга Путиндин Украинадагы согуш кылмыштарга айыпталып, эл аралык кылмыш сотунун аны камакка алуу боюнча чыгарган ордери себеп болгон.
Европа Биримдигиндеги Польшанын өкүлчүлүгү Украинага контрчабуул үчүн өнөктөштөрү 575 танк, 28 учак бергенин билдирди. Анда танктардын басымдуу бөлүгүн, тактап айтканда 325ин Варшава жөнөткөнү жазылган. Андан сырткары Нидерланд 85, Германия 80, ал эми АКШ 76 танк берген.
Киев кыргын салуучу Миг-29 үлгүсүндөгү 14 учакты дагы Польшадан алган.
Мунун алдында Британия Украинага узак аралыкка уча алган Storm Shadow канаттуу ракеталарын жөнөткөнү белгилүү болгон. Өлкөнүн коргоо министри Бен Уоллес 11-майда парламент депутаттарынын суроолоруна жооп берип жатып, ракеталардын санын тактаган эмес.
"Storm Shadow ракеталары Киевге Украинанын суверендүү аймагына кирип алган орусиялык күчтөрдү сүрүп чыгарууга жардам берет", - деген Уоллес.
Аталган ракеталар 250 чакырымга чейин уча алат. Салыштыруу иретинде караганда, АКШ Украинага жөнөткөн HIMARS ракеталарынын учуу мүмкүнчүлүгү 80 чакырымды гана түзөт.
Британ маалымат каражаттары жазгандай, Киев бул ракеталарды Орусиянын аймагына сокку урууда колдонбоого убада берген.
Москва Лондондун бул кадамына "тиешелүү жооп кайтарарын" эскертти, ал эми Кремлдин басма сөз катчысы Дмитрий Песков Орусия бул маалыматты "оор кабыл алганын" журналисттерге 11-майда айтты.
Бул жаңылык Украинанын Бахмут шаарында орус күчтөрү эки чакырымга артка чегингени кабарланган маалда чыкты. Москва тескерисинче орус армиясы алдыга баратканын билдирүүдө.
Бахмутта бир нече айдан бери салгылашуулар уланып келет. Ушул тапта калаанын 75% орус күчтөрүнүн көзөмөлүндө.
2022-жылы Евробиримдиктин курамындагы мамлекеттерден Армения, Казакстан жана Кыргызстанга жөнөтүлгөн, жалпы баасы бир миллиард доллардан ашкан товарлар "Орусиядан транзит аркылуу өтүп жатканда жоголуп кеткен". Бул тууралуу Financial Times басылмасы жазды.
Маалыматтарга караганда, Орусия Украинага согуш ачканы Евробиримдиктен Орусияга транзит деген шылтоо менен эки миллиард долларлык товар кирген. Алардын арасында санкцияга кирген буюм-тайымдар, анын ичинде аскердик өндүрүштө колдонула турган учактардын компоненттери, оптикалык буюм-тайымдар, газ түтүктөрү бар. Бул товарлардын айрымдары андан ары Армения, Казакстан жана Кыргызстандагы компанияларга жөнөтүлмөк.
"Эмнеге бул мамлекеттерге дал ушул маалда бул товарлар керек болуп калды? Аймакта бул товарлар азыр кимге керек? Албетте, Орусияга", - деп билдирген аталган басылмага Эстониянын санкциялар боюнча министри Эрки Кодар.
Ошол эле маалда Орусия менен чектешкен, санкцияларды колдобогон мамлекеттерде дагы айрым товарлардын импорту кескин жогорулаган. Бул товарлар андан ары Орусияга жөнөтүлөрү кабарланган.
Евробиримдик Орусиянын санкцияларды айланып өтүүсүнө каршы күрөшөрүн билдирип келет.
Учурда шаркеттин лидерлери Орусияга каршы санкциялардын 11-айлампасын талкуулап жатышат. Бул жолу Москвага санкцияларды айланып өтүүгө көмөктөшкөн үчүнчү мамлекеттерге да чаралар көрүлүшү мүмкүн. Ага Борбор Азиядагы айрым мамлекеттер дагы кириши ыктымал экени кабарланууда.