Орусиянын президенти Владимир Путин Коргоо министрлиги менен келишим түзгөн жана Украинада согушуп жаткан чет элдиктерди орус жарандыгына кабыл алуунун жөнөкөйлөштүрүлгөн тартиби жөнүндө жарлыкка кол койду.
Документте орус армиясы менен келишим түзгөндөрдүн үй-бүлө мүчөлөрүнө да жарандык жеңилдик менен берилери жазылган.
Муну менен Путин 2022-жылдын 30-сентябрындагы “Келишимдик негизде аскердик кызматта жүргөн чет элдик жарандарды жана жарандыгы жок адамдарды кабыл алуунун жөнөкөйлөштүрүлгөн тартиби жөнүндө” жарлыгына өзгөртүүлөрдү киргизди. Анда негизинен аскердик кызмат өтөө келишимин бир жылдан кем эмес мөөнөткө түзгөн жана согуштук аракеттерге кеминде алты ай катышкан чет элдиктерге орус паспорттору жөнөкөйлөштүрүлгөн тартипте бериле тургандыгы белгиленген.
Мурда чет элдиктер беш жылга келишим түзүп, жарандык алуу үчүн кеминде үч жыл иштеши керек эле.
Орус бийлигинин бул чечими армияга эң ириде Борбор Азия өлкөлөрүнөн көбүрөөк сандагы эмгек мигранттарды тартууга багытталганын "Свобода" радиосу жазды.
Акыркы кезде мигранттар арасында - жатаканаларда, миграция кызматтарында, мечиттерде жана көчөлөрдө армияга келишимдик кызматка чакырган баракчалар көп таратыла баштаган. Аскердик кызмат өтөө келишимине кол койгондорго Орусиянын жарандыгы жана жогорку маяна берилери убада кылынган.
Буга чейин Украинанын Орусия басып алган айрым аймактарына ишке тартылган борбор азиялык мигранттардын арасында айлык берилет деген убада аткарылбады деген нааразылыктар айтылган.
Орусиядагы "Победа" авиакомпаниясы Украинадагы согушту кылмышка теңеген учкучту жумуштан бошотту. Бул тууралуу "Проект.Медиа" басылмасы компаниянын иши менен тааныш булак берген каржылык документтерге таянып жазды.
Украинага каршы согуштун алгачкы күндөрүндө "Победа" учагынын Владимир аттуу командири Түркиянын Анталия шаарына конгондон кийин жүргүнчүлөргө кайрылып, согушту айыптаган.
"Согуш бул - кылмыш. Менимче, ар бир акыл-эси соо жаран мени колдойт жана аны токтотуу үчүн колунан келгендин баарын жасайт, аны азыр жасаганы жакшы. Бизге согуштун кереги жок", - деген ал.
Учактын жүргүнчүлөрү командирдин сөзүн кубаттап, кол чабышкан. Көп өтпөй учкучтун согушка каршы сүйлөгөн сөзү тартылган видео интернетке жарыяланган.
"Победа" - Орусиянын мамлекеттик авиакомпаниясы, "Аэрофлот" тобуна кирет.
Европа биримдиги Орусиянын 21 авиакомпаниясын учууга кооптуу деген жүйө менен былтыр апрелде кара тизмеге киргизген. Алардын арасында "Аэрофлот", "Победа", S7, "Россия", "Ютейр" жана "Урал авиакаттамдары" бар.
"Проект.Медиа" басылмасы орусиялык авиакомпаниялардын учактарында тетиктерге байланыштуу көйгөй жаралып жатканын жазды. Маалыматка караганда, санкцияларга байланыштуу авиакомпаниялар тийиштүү жабдууларды сырттан алып келе албай жатат. Компаниялар буга комментарий берген жок.
Улуу Британия Украинага 200 километрден ашык аралыкка уча турган жаңы чабуулчу учкучсуз учактарды берет. Ошондой эле украиналык учкучтарга F-16 учактарын башкарууну үйрөтөт. Бул тууралуу британ өкмөтүнүн Украинанын президенти Владимир Зеленскийдин 15-майдагы сапарына байланыштуу билдирүүсүндө айтылат.
Мурдараак премьер-министр Риши Сунак Зеленский менен бул жааттагы кызматташууну талкуулай турганы кабарланган.
Билдирүүдө бул визит Украинага колдоо көрсөтүү боюнча жаңы чечимдерди кабыл алуу күтүлүп жаткан Чоң жетиликтин Жапониядагы саммитинин алдында ишке ашырылганы белгиленди.
Өткөн аптада Лондон Киевге узак аралыкка уча алган Storm Shadow канаттуу ракеталарын жөнөткөнү белгилүү болгон. Буга чейин Батыш өлкөлөрү 80 километрге чейинки аралыктагы буталарга сокку урууга жөндөмдүү курал-жарактарды берген.
Британиядан мурун Зеленский Италияга, Францияга жана Германияга барып, бийлик өкүлдөрү менен аскердик жана саясий кызматташтыкты талкуулаган.
Украинанын Коргоо министринин орун басары Анна Маляр Украинанын Куралдуу күчтөрү Бахмуттун четинде Орусиянын аскерлери ээлеп турган ондон ашык позицияны кайтарып алганын билдирди. Ал украин аскерлери Ивановск районундагы токойдун бир топ бөлүгүн тазалашканын кошумчалады.
Украин президентинин кеңсесинин кеңешчиси Михаил Подоляк BILD басылмасына берген маегинде Бахмутта башталган контрчабуул бул башталышы гана экенин, Украина үчүн ал каршы чабуулга өтүүдө чоң мүмкүнчүлүк болорун айтты.
“Донецк облусунун ар кайсы аймактарында жылыш бар. Контрачабуул – бул белгилүү бир убакыттын ичинде ишке ашырылуучу иш-аракеттердин сериясы”, - деди ал.
12-майда Орусиялык “Вагнер” менчик аскердик компаниясынын башчысы Евгений Пригожин да Украина контрчабуулун баштаганын билдирген. Ал украин күчтөрү даярдыктан өткөнүн жана тиешелүү курал-жарак менен жабдылганын айткан.
Андан бир аз мурда эле украин президенти Владимир Зеленский Би-Би-Сиге курган маегинде контрчабуулга өтүү үчүн куралдуу күчтөргө дагы көбүрөөк даярдык зарыл экенин кабарлаган.