АКШ Украинага кезектеги аскердик жардам берүү үчүн 357 миллион доллар бөлөрүн президент Жо Байден "Чоң жети" саммитинин алкагында, украин президенти Владимир Зеленский менен жолугушуу учурунда билдирди.
Бул сумманын ичинде артиллерия жана курал-жарактар, HIMARS ракета комплекстери жана аскердик техника каралган. Ошондой эле украин учкучтарын машыктыруу да кирет.
Жолугушуу учурунда Байден Зеленскийге АКШ күрөшүп жаткан Украинаны колдоо үчүн бардыгын жасап келе жатканын жана муну улантарын айтты. АКШ президенти Украинанын "адилет тынчтыкка" умтулуусун билдирип, ал эми анын эгемендиги жана аймактык бүтүндүгү боюнча маселе "талкууга жатпасын" белгиледи.
Украин президенти Владимир Зеленский жекшембиде "Чоң жетинин" дагы бир мүчөсү - Түштүк Кореянын мамлекет башчысы Юн Сок Ёль менен жолугуп, Украинадагы согушту талкуулады. Эки президент алгачкы ирет жолугушканын белгилеген Зеленский Твиттердеги баракчасына расмий Сеулга согуш учурунда көрсөткөн колдоосу үчүн ыраазычылык билдиргенин жазды.
Буга чейин Зеленский саммит алкагында уюмга мүчө өлкөлөрдүн дээрлик бардыгынын лидерлери менен жолугушкан.
"Чоң жети" жыйынында сүйлөгөн сөзүндө Зеленский батыштагы өнөктөштөрүнө көрсөткөн көмөгү жана "миңдеген украиналыктардын өмүрүн орусиялык ракеталардын соккусунан коргоп калган" абадан коргонуусун бекемдөөгө жардамдашканы үчүн ыраазычылык айтты.
Андан мурдараак Жапонияда өтүп жаткан G7 жыйынынын катышуучулары Орусиянын Украинага баскынчылыгын айыптаган билдирүү менен чыгышты. Алар Орусияны аскерлерин Украина аймагынан чыгарып кетүүгө чакырышты жана Киевге мындан ары да жардам берүүнү улантарын билдиришти.
Британиянын премьер-министри Риши Сунак Лондон украин учкучтарын F-16 истребителдери менен машыктырууну ушул жайында баштай турганын билдирди.
"Украинанын коопсуздугу - биздин коопсуздук", - деди ал.
Сунак Жапонияда өткөн G7 саммитинде Украинага колдоо көрсөтүү боюнча прогресске жетишилгенин кубаттай турганын айтты.
Украинанын президенти Владимир Зеленский, Жапониядагы "Чоң жетинин" саммитинде сүйлөп жатып, Бахмутту алдырганын ырастады. Ал журналисттердин "Бахмутка Киев көзөмөл кылып жатабы?" деген суроосуна:
"Менимче, жок. Бүгүнкү күнү ал биздин жүрөгүбүздө гана", - деп жооп берди.
Украин президенти Владимир Зеленскийдин Бахмутту алдырганы тууралуу сөзү анын АКШ президенти Жо Байден менен 21-майга белгиленген жолугушуусунун алдында айтылды. Жо Байден Украинага жаңы аскердик жардам - курал-жарак жана техника берилерин маалымдады. АКШ учурда Украинага ири өлчөмдө курал-жарак жана техника берип жаткан өлкө болуп саналат.
Бахмуттун оккупацияланганы тууралуу билдирүүлөр Украина Луганск облусунан Херсон багытындагы 1000 чакырымдык фронт линиясында ири контрчабуулга даярданып жатканы айтылып аткан учурга туш келди.
Орусия Бахмутту алууга көп күчүн сарптап, чоң жоготууларга учурады. Орус аскерлери былтыр жайдан бери Украинада чоңураак жеңишке жетишкен эмес. Бул аралыкта Украинанын аскерлери былтыр күзүндө орусиялык аскерлерди Харьков облусунан жана Херсон облусунун айрым аймактарынан толук сүрүп чыккан.
Бахмут шаарын ээлегени тууралуу Орусиянын Коргоо министрлиги жана "Вагнер" менчик аскер компаниясы 20-майда кабарлаган. Ага удаа орус президенти Владимир Путиндин куттуктоосу чыкты.
Украинанын Башкы штабы орустардын билдирүүсүн четке кагып, Бахмут үчүн күрөш уланып жатканын кабарлаган болчу.
Украинанын коргоо министри Алексей Резников Твиттердеги баракчасына украиналык учкучтар заманбап аскер учагы менен машыгууну чыдамсыздык менен күтүп жатышканын жазды.
"Эми алар бул согушта жеңишке жетиш үчүн кургактагы жана деңиздеги куралчан бир туугандарына колдоо көрсөтө алышат. F-16 жамандарды жеңүү үчүн жасалган," - деп жазды Резников.
Маалымат каражаттарынын билдиришинче, АКШ президенти Жо Байден Жапониядагы "Чоң жети" саммитинде украин учкучтарынын заманбап аскердик учактар менен машыгуусун колдой турганын айткан. Байдендин билдирүүсүн Британиянын премьер-министри Риши Сунак кубаттады.
The New York Times басылмасы украиналык аткаминерге шилтеме кылып, бир катар Батыш өлкөлөрү Киевге F-16 учагын берүүгө даяр экенин жазды.
Украинанын президенти Владимир Зеленскийдин Лондонго сапары учурунда британ өкмөтү украиналык учкучтарды үйрөтө баштай турганын билдирген.