Жапония Украинадагы согушка байланыштуу Орусияга каршы санкцияларды күчөтүүдө. Жапон Тышкы иштер министрлиги кабарлагандай, жаңыланган санкция тизмесине 17 адам жана 78 уюм кошулду. Алардын Жапониядагы активдери камакка алынат. Ошондой эле 80 мекемеге экспортко чектөө киргизилип жатат.
Санкция салынгандардын ичинде орус армиясынын командачыларынан Михаил Зусько, Сергей Каракаев, Николай Паршин жана Михаил Теплинский, "Россия 1" телеканалынын алып баруучусу Ольга Скабеева да бар. Активдери токтотулган компаниялардын арасына "Связь" АЭСи, "Метеор" заводу жана башка авиация, коргонуу өнөр жай ишканалары кирди.
Токио Украинадагы согуштан улам буга чейин да Орусияга каршы санкцияларды киргизген.
Мурдараак Киодо агенттиги жапон өкмөтүндөгү булакка таянуу менен G7 өлкөлөрү 19-21-майда Хиросимадагы саммиттин алдында Орусиянын экспортуна дээрлик толук тыюу салуу мүмкүнчүлүгүн карап жатканын жазган. Ошол эле учурда Евробиримдик өлкөлөрү жана Жапония АКШнын Орусияга экспортту дээрлик толук тыюу тууралуу сунушуна макул эместиги кабарланган.
Украинанын Днепр шаарында 26-майда орус аскерлеринин ракеталык чабуулунан набыт болгон адамдардын саны төрт кишиге жетти. Днепропетровск облусунун аскердик администрациясынын башчысы Сергей Лысак буга чейин дайыны чыкпай жаткан үч адамдын сөөгүнүн бөлүктөрү табылганын кабарлады. Алар кыйраган медициналык жайдын жана ветеринардык клиниканын кызматкерлери болгонун билдирди.
Буга чейин Днепрге жасалган ракеталык чабуулдан бери дегенде эки адам мерт болуп, 32 киши жараат алганын, алардын ичинен бешөөнүн абалы оор экенин маалымдаган.
Башкы прокуратуранын маалыматына караганда, 26-майда атылган ракета медициналык мекеме менен ветеринардык клиниканын имаратына тийген. Катуу соккудан өрт чыгып, жер тамдар, көп батирлүү үйлөр, автоунаалар зыян тарткан.
Киев жумага караган түнү Орусия Украинага ракета жана учкучсуз учактар менен кайрадан жапырт сокку урганын маалымдаган.
Москва буга комментарий берген эмес. Орусия Украинадагы жарандык объектилерге сокку урулганын дайыма четке кагып келет.
Украинада Киев шаарынын мэри Виталий Кличко 28-майга караган түнү орус аскерлери соңку кездери болуп көрбөгөндөй дрондон чабуул жасаганын кабарлады. Анын ырасташынча, Печерск районунда тогуз кабат үйдүн чатырында өрт чыкты. Соломенскиде жети кабат имараттын үчүнчү кабаты жабыркады, ошондой эле, ишканалардын биринде тутанган өрттү өчүрүү уланып жатат. Голосеевск районунда үч кабаттуу кампанын чатыры өрттөндү.
Шаардын аскердик администрациясынын кабарлашынча, чабуулда бир адам мерт болду. Кличко жалпысынан 20 дрон атып түшүрүлгөнүн билдирди.
Ушул маалда Украинанын Киев шаарында жардыруулар токтой элек, абадан коргоо системасы иштеп жатканы кабарланды. Өлкөнүн башка аймактарында дагы абадан эскертүү берилди.
Орусия бул тууралуу маалымат бере элек. Согуш маалында тараптардын маалыматтарынын чын-төгүнүн ырастоо мүмкүн эмес.
Брянскиде Орусиянын эки аскер кызматкери жанкечти дрондордун чабуулунан каза болгонун орусиялык Телеграм-каналдар кабарлады.
Маалыматка ылайык, дрон Бровничи - Сушаны жолундагы Орусияга таандык “Нива” машинесин аткылаган. Орусиянын Коргоо министрлиги бул боюнча расмий билдирүү берген жок.
Телеграм-каналдар чек арага жакын Сушаныга украиналык диверсиялык-чалгындоо тобу киргенге аракет кылганы тууралуу маалымат тараткан. Бирок аны облустун губернатору Александр Богомаз ырастаган жок. Ал бир катар калктуу конуштар Украина тараптан атыланганын гана белгиледи.
Сушаны - Украина армиясына кошулган Орусиялык ыктыярчылар корпусунун согушчандары март айында кыска убакытка кирип келген айылдын бири.
Украина тараптан бул өлкө менен чектеш дагы эки аймак Курск жана Белгород аткыланганы белгилүү болду. Курск облусундагы Плехово айылында чек араны бекемдөө үчүн курулуш ишине тартылган бир жумушчу каза тапты. Телеграм-каналдар Белгород облусунда Шебекино шаары аткылоого кабылганын жазышты. Облус губернатору Вячеслав Гладков бир адам каза таап, эки өспүрүм жараат алганын билдирди.
Украинага таандык Запорожье облусунун Орусия басып алган бөлүгүндөгү Бердянск шаары да аткылоого кабылды. Украиналык жана орусиялык Телеграм-каналдар шаардын үстүнөн кара түтүн уюлгуп жатканы тартылган видеону таратышты.
Бердянскинин аймагынан тыш иштеп аткан украиналык шаардык администрация орусиялык аскерлердин позициясы талкаланганын, көптөгөн аскерлер набыт болгонун билдирди. Украиналык "Суспiльне" порталы шаарда беш жарылуу болуп, орусиялык аскерлер жайгашкан "Азовкабель" заводунун аймагына сокку урулганын билдирди. Маалыматты көз карандысыз булактар ырастай элек.
Бердянск майдан тилкесинен алыс жайгашкан. Акыркы күндөрү анда жана Орусия басып алган Мариуполдо бир канча жолу жарылуу болгон. Алдын ала маалыматта объекттерге Британия Украинага берген Storm Shadow ракетасы менен сокку урулган.
Ишемби күнү эртең менен Псков жана Тверь облустарынын (Украина менен чек арадан жүздөгөн километр алыс) бийликтери учкучсуз учактар мунай тармагына чабуул койгонун билдирген. Тверь облусунун облустук администрациясы дрон Андреапольск аймагындагы Ерохино кыштагына жакын жерге түшкөнүн билдирди. Ал жерде мунайды кайра иштетүүчү станция бар. "База" Телеграм-каналы соккудан улам станция бүлгүнгө учураганын жазды. Псков облусунда учкучсуз учактар Невельск районундагы мунай өткөрүүчү жайдын имаратына чабуул койгон.
Орусиянын аймактарына соккулар күчөгөнү Украинанын чабуулга даярданып жатканынын белгиси болушу ыктымал. Украинанын Улуттук коопсуздук жана коргонуу кеңешинин катчысы Алексей Данилов Би-Би-Сиге чабуул жакын арада башталышы мүмкүн экенин кыйыткан.