Индонезия Украина үчүн тынчтык планын сунуштады
Индонезиянын коргоо министри Прабово Субианто Сингапурда өтүп жаткан"Шангри-Ла Диалогу" форумунда Орусия менен Украинанын согушун токтотуу планын сунуштады.
Субиантонун сунушу ок атууну тезинен токтотуу, эл аралык тынчтык күчтөрү кайтарган демилитаризация зонасын түзүү жана БУУнун көзөмөлү астында "талаштуу аймактарда" жаңы референдум өткөрүүнү камтыйт. Субианто "талаштуу аймактар" дегенине түшүндүрмө берген жок.
Демилитаризация болгон аймакты түзүү үчүн эки тарапка тең ортодогу зонадан 15 чакырым артка чегинүү сунушталган. Индонезия ортодогу зонага эл аралык көзөмөлдү орнотуу зарыл деп эсептейт.
Субианто Жакарта бардык процесске катышууга даяр экенин билдирди. Министрдин айтымында, ушуга окшош чаралар Корей жарым аралында 50 жылдан бери тынчтыкты сактоого өбөлгө түзүп келет.
Украинанын Тышкы иштер министрлигинин өкүлү Олег Николенко Индонезияга согушту токтотууга көңүл бурганы үчүн ыраазычылык билдирди. Украина менен Орусиянын ортосунда референдум өткөргүдөй талаштуу аймактар жок экенин да белгиледи.
Николенконун айтымында, ок атышууну токтотуу үчүн демилитаризация зонасын түзүү ишке ашпайт, анткени Орусия мындай учурда жаңы күч топтошу мүмкүн. Ал Индонезияны Украина сунуштаган тынчтык формуласына кошулууга чакырды.
Киев буга чейин бир канча жолу территориалдык маселеде артка чегинбесин, Орусия басып турган өзүнө таандык аймактарды, анын ичинде 2014-жылы аннексияланган Крымды кайтарып аларын бир канча жолу билдирген.
Запорожьеде оккупациялык бийлик менен кызматташкан адам каза болду
Бул тууралуу "Украин чындыгы" басылмасы Украинанын коопсуздук кызматындагы булактарына таянып билдирди. Маркумдун аты-жөнү – Сергей Дидовидюк. Анын машинеси 2-июнда өзү жашаган Михайловка кыштагында жарылган. Бул тууралуу кечээ оккупацияланган Мелитополдун украиналык мэри Иван Федоров билдирди.
Жергиликтүү кафенин ээси Дидовидюк орусиялык бийликтер менен кызматташып келген. "Биз Орусия менен биргебиз" штабынын жетекчиси болгон.
"Украин чындыгы" Дидовидюк менен анын аялы жана 33 жаштагы кызы болгонун жазды. Жарылууда аялы жараат алып, кызы каза тапкан.
Украинанын Улуттук коопсуздук жана коргоо кеңешинин жетекчиси Алексей Данилов украиналык телеканалга берген интервьюсунда Украинада атып түшүрүлгөн ирандык "Шахед" дрондорунан Батышта жасалган тетиктер табылып жатканын айтты. Орусия бул дрондорду украин аймагын атуу үчүн колдонууда.
Даниловдун айтымында, Иранга каршы эл аралык санкциялардан улам тетиктердин ал жакка жетиши кыйын, андыктан алар бул санкцияларды кантип кыйгап өтүп жатат деген суроо туулат. Данилов тетиктер Иранга Орусия Украинага согуш ачканга чейин барышы мүмкүн деген пикирде. Буга ал "Шахеддердин" көбү 2019-2021-жылдары жасалганын мисал келтирди.
Буга чейин "Азаттыктын" украин кызматы атып түшүрүлгөн учкучсуз учакты аскерлер ажыратып жатканын көргөзгөн. Анда адистер дрондун ичинен канадалык тетиктерди тапкан.
Зеленский: Биз контрчабуулга даярбыз
Украинанын президенти Владимир Зеленский америкалык Wall Street Journal басылмасына Украинанын куралдуу күчтөрү контрчабуулга көптөн бери даярданып келгенин билдирди. Бирок чабуул качан башталарын айтуудан баш тартты.
Зеленскийдин айтымында, Украина "дагы кандайдыр бир жабдыктарды алууну" каалайт (муну менен ал батыштагы өнөктөштөрдөн аскердик-техникалык жардамды күтүп жатканын билдирген). Украина президенти өз өлкөсүнүн куралдуу күчтөрүнө ишенерин билдирип, ошол эле маалда украин армиясы бул чабуул маалында жоготууга учурашы мүмкүн экенин эскерткен.
Владимир Зеленский дүйнө коомчулугун дагы бир жолу анын өлкөсүнө жардам берүүгө жана Орусияны эл аралык изоляцияда калтыруу үчүн колдон келгенин жасоого чакырды.