Жекшембиге караган түнү Украинанын бардык аймактагында абадан эскертүү жаңырып турду. Киевдин абадан коргонуу системасы баш калааны бутага алган бардык ракеталар жана дрондор атып түшүргөнүн кабарланды. 4-июнда эртең менен Днепрде ракетадан кыйраган үйдөн эки жашар наристенин сөөгүн куткаруучулар таап чыкты. Согуштун Орусия тарабында болсо “Вагнер” жеке компаниясынын жетекчиси менен чечен жалданмаларынын тиреши президент Путин катышкан коопсуздук кеңешинде талкууланганы тууралуу маалымат тарады.
Днепропетровский облусундагы орус армиясынын ракетасы тийген үйдүн урандыларынын алдынан эки жашар наристенин сөөгү табылды. Жергиликтүү бийлик каргашада 22 киши жабыр тартканын, алардын бешөө балдар экенин билдирди. Ишембиде эки кабат эки үйдүн ортосуна ракета тийип, үйлөр жарым- жартылай бузулган. Үйдүн алдындагы машине, дүкөн, газ түтүктөрү жараксыз болуп калган.
Облустун администрациянын башчысы Сергей Лысак аймак түнкүсүн да чабуулга кабылганын билдирип, украин аскерлери эки канаттуу ракетаны, дронду атып түшүргөнүн маалымдады.
Украинанын президенти Владимир Зеленский социалдык медиага жарыялаган видеодо куткаруучулар кыйрап калган жерде урандыларды тазалап жатканы көрүнөт.
«Азаттык» радиосу согуш маалында маалыматы башка булактардан бышыктай албай турганын эскертебиз. Орусия Украинадагы жарандык жайларга, турак үйлөргө сокку урулганын мойнуна албайт.
Киевдеги дүрбөлөң
Жекшембиде Орусиянын чабуулу уланды. Киевдин абадан коргонуу системасы башкалааны бутага алган бардык ракеталарды жана дрондорду атып түшүргөнүн шаардык аскердик администрациянын башчысы Сергей Попко билдирди. "Алдын ала маалыматтарга ылайык бир дагы дрон жана ракета Киевге жеткен жок", - деди ал.
Жума күнү президент Зеленский өлкөнүн бардык шаарларындагы бомбадан башкалкалоочу жайларды текшерүүгө буйрук берди. "Тилекке каршы, бүгүн киевдиктер башкалкалоочу жайлар жетишсиз экени тууралуу маалымат таратууда. Башкалкалоочу жайлар жабык гана эмес, алардын эшиктери чапталып турганы же шаардын айрым бөлүктөрүндө такыр эле андай жайлардын жоктугу айтылууда. Шаардагы мындай көңүл коштукту актоого эч кандай шылтоо жок”
Бейшембидеги орус армиясынын чабуулунда жашынганга жай издеп жүрүп тогуз жаштагы кыз энеси менен ракетанын сыныгы тийип набыт болгон. Карагашадан кийин полиция төрт кишини кармады, алардын үчөө тагылган милдетти так аткарбаганы үчүн жоопко тартылышы мүмкүн.
Баш калаада өспүрүм кызын ээрчиткен аялдын башкалка издеп жүрүп мерт болгону элдин нааразылыгын жаратты. Зеленский Киевдин мэри Виталий Кличкого "катуу чара көрүлөт" деп убада берди. Шаар башчы өзү дагы жоопкерчиликти сезерин айтты.
"Вагнер" vs "Ахмат"
Согуштун Орусия тарабында болсо "Вагнер" менчик аскердик компаниянын башчысы Евгений Пригожин менен Чеченстандын лидери Рамзан Кадыровго жакын кишилердин тиреши президент Владимир Путиндин жетекчилиги менен өткөн Коопсуздук кеңешинде талкууланды. Бул тууралуу Пригожиндин комментарийинен маалым болду. Кремлдин сайтындагы стенограммага ылайык, Путин ал жыйында "Орусия Федерациясындагы ички кырдаалды олку-солку кылууга" багытталышы мүмкүн болгон "улуттар аралык мамилелерди" талкуулоону сунуштаган.
Украинадагы согушта орус күчтөрүнүн авангардына айланган Пригожин Кремлдеги кайсы бир топтор “вагнерчилер” менен чечен жоочуларынын ортосуна от жагып жатат” деп айыптаган "Азыр жаңжал жайгарылды. Мен ошол эле күнү Рамзан менен сүйлөштүм. Ал телефон чалып, ушунчада демди басалы деп сүйлөштүк" - деди Пригожин. Ал чечендердин “келсең, эркекче сүйлөшөбүз” деп өкүм эскерткенин 1990-жылдардагы уюшкан кылмыштуу топтордун бири-бирине жиберген салам-дубайындай кабыл алганын да айтты.
1-июнда Кадыровдун жакын тууганы, Мамлекеттик думанын депутаты Адам Делимханов, Чеченстандын парламент төрагасы Магомед Даудов жана "Ахмат" атайын күчтөрүнүн командири Апти Алаудинов согуш талаасындагы көп жоготуулары үчүн, ошондой эле Москадагы аткаминерлерге асыла бергени үчүн Пригожиндин өзүн сындашкан.
Делимханов менен Даудов "вагнерчилердин" анабашын "жигитче көзмө-көз сүйлөшүүгө" чакырган. Ошол эле күнү "Вагнердин" кол башчысы Дмитрий Уткин билдирүү жасап, "эркектер менен эркекче сүйлөшүүгө" даяр экенин айтты.
Бир жыл мурун Орусия Украинага согуш ачып, басып киргенден кийин Киевди көздөй "кадыровчулар" бет алганын Чеченстандын лидери Кадыров өзү жар салган. Анда ал чечен жоочулары Орусиянын куралдуу күчтөрүнүн курамында Украинанын аймагына чабуулга катышарын бышыктайт. Ал өз каналында Украинанын аймактарында согушкан жоочуларынын видеолорун жарыялап, "баарыбыз ыктыярчыбыз" деп айтып келет.
Орусиядагы "Вагнер" менчик аскердик компаниянын башчысы Евгений Пригожин менен Чеченстандын башчысы Рамзан Кадыровдун айланасындагы адамдардын жаңжалы президент Владимир Путиндин жетекчилиги менен өткөн Коопсуздук кеңешинде талкууланды. Бул тууралуу Пригожиндин өзүнүн комментарийинде айтылат. Тийиштүү маалыматты 3-июнда анын басма сөз кызматы Телеграм канал аркылуу таратты.
1-июнда Рамзан Кадыровдун жакын тууганы, Мамлекеттик думанын депутаты Адам Делимханов, Чеченстандын парламент төрагасы Магомед Даудов жана "Ахмат" атайын күчтөрүнүн командири Апти Алаудинов Евгений Пригожин тууралуу пикирин айтышкан.
Алар согуш талаасындагы көп жоготуулары үчүн, ошондой эле чиновниктерди сындай бергени үчүн Пригожиндин өзүн сындашкан. Адам Делимханов ЧВКнын башчысына "бир убакыт жана жерди" белгилөөнү сунуштап, ал жерде "ага түшүнүксүз нерселерди түшүндүрүүгө" даярдыгын белгилеген. Магомед Даудов болсо Пригожинди "жеке жолугушууга", ал жерде "жигитче сүйлөшүүгө" чакырган.
Ошол эле күнү "Вагнердин" кол башчысы Дмитрий Уткин билдирүү жасап, "эркектер менен эркекче сүйлөшүүгө" даяр экенин айтты. Ал Делимхановду жана Даудовду "Чеченстандагы биринчи жана экинчи согуштан бери" тааный турганын билдирген (кыязы алар сепаратисттер тарапта согушкан болушу ыктымал).
Пригожиндин өзү 1-июндун кечинде билдирүү жасады. Ал Рамзан Кадыров телефон чалып, "жаңжалды басууну макулдашканын" жарыялады. Ал Владимир Путин жаңжалга кийлигишип, кийлигишпегенин ачыктаган жок, болгону Делимханов менен Даудовдун сөздөрүнө комментарий бербестигин, анткени "менин кандай гана жообум болбосун ал улут аралык кастыкты козутуу катары чечмелениши мүмкүн" деп белгиледи.
Пригожиндин пикири боюнча Кадыровдор менен жаңжал "эмне кылып жатканын түшүнбөй", "кооптуу оюндарды ойноп", "орус мамлекетин талкалап" жаткан "Кремлдин мунараларынын бири" тарабынан тутанган. Ал Кадыровдор менен "эсептешүүсү" кан төгүүгө алып келиши мүмкүн, бирок барып-келип "жеңүүчү аныкталып калмак" деди.
"Вагнердин" башчысы Кадыровдун тегерегиндегилер ага укук коргоо органдарындагы кылмыштар боюнча жазган катын жогорку аскер жетекчилигине жибергенден кийин асыла баштаганын билдирди.
Владимир Пригожин коргоо министри Сергей Шойгу менен Башкы штабдын башчысы Валерий Герасимовду сынга алуусун уланта берерин айтууда, аларды ал "орус жерин душманга өткөрүп берди" деп айыптоодо.
Кремл бул кырдаал боюнча комментарий бере элек. Владимир Путин 2-июнда Коопсуздук кеңешинин мүчөлөрү менен жыйын өткөрдү. Бирок, "Вагнер" менен Чеченстандын жетекчилигинин тиреши талкууланганы же талкууланбаганы ачыкталган жок.
Кремлдин сайтындагы стенограммага ылайык, Путин "Орусия Федерациясындагы ички кырдаалды олку-солку кылууга" багытталышы мүмкүн болгон "улуттар аралык мамилелерди" талкуулоону сунуштаган.
Киев 4-июнда Орусиянын аба күчтөрүнүн Украинанын борбордук бөлүгүндөгү Днепр шаарына жакын аймакка жасаган соккусунан эки жашар наристе каза болгонун ырастады.
Украин абадан коргонуу күчтөрү башкалаа Киевге атылган дрон менен ракеталарды атып түшүрдү.
Днепропетровск облустук аскердик администрациясынын башчысы Сергей Лисактын айтымында, 3-июндун кечинде орус аскерлеринин Днепрдин калк жашаган аймагына урган соккусунан 22 адам, анын ичинде беш бала жараат алды.
Телеграм каналдагы билдирүүсүндө Лисак кол салуудан көп кабаттуу эки үй, 10 турак жак, дүкөн жана газ түтүгүнө зыян келтирилгенин маалымдады.
Орусия Днепрдеги чабуул тууралуу комментарий бере элек. Согуш маалында тараптардын маалыматтарынын чын-төгүнүн тактоо мүмкүн болбой турат.
Украинанын күчтөрү контрчабуулга даяр экени ушул аптада жарыялангандан кийин Орусиянын Украинага аба соккулары күчөдү.
Ишембиде Днепрдин чет жакасында Орусиянын ракеталык соккусунун натыйжасында бир нече үй кыйрап, 20дан ашык адам жараат алды. Урандылардын алдынан эки жашар кыздын сөөгү табылды.