Украинанын президенти Владимир Зеленский бейшемби күнү Херсон облусунун суу каптаган түштүк аймагына барып, куткаруу операциясын талкуулады. Президент жергиликтүү бийлик өкүлдөрү менен жолугуп, кырсыктын кесепеттерин жоюу иштерин, суу каптоо коркунучу сакталып жаткан аймактардан калкты коопсуз жерлерге чыгаруу, жабыркаган аймактарды эң зарыл нерселер менен камсыздоо маселелерин талкуулады. Бул тууралуу украин мамлекет башчысы Телеграм-каналына жазды.
Зеленский ошондой эле аймактын экосистемасын калыбына келтирүү жана техногендик кырсык зонасындагы аскердик кырдаал кеп болгонун кошумчалады. Президент эл эвакуацияланган пунктка да барган.
Мунун алдында Херсон облусунун аскердик администрациясынын башчысы Александр Прокудин 600 чарчы километр аянт суу астында калганын, 8-июндун таңына карай кооптуу аймактардан дээрлик 2000 адам чыгарылганын билдирген.
Орусиянын Өзгөчө кырдаалдар министрлиги өткөн суткада кызматкерлери суу каптаган аймактардан 300дөн ашык адамды, анын ичинде 70 баланы эвакуациялашканын маалымдады. Буга чейин оккупациялык бийликтер сол жээктен жалпысынан 4000 адам көчүрүлгөнүн билдирген.
Кахов ГЭСинин дамбасы 6-июнга караган түнү жардырылган. Киев менен Москва буга байланыштуу бири-бирин күнөөлөп жатат.
Украин бийлиги дамбанын бузулушун иликтөө өтүнүчү менен Гаагадагы Эл аралык кылмыш сотуна кайрылды.
Орусия ачкан согушта Украинаны колдогон Батыштын көптөгөн лидерлери ГЭСтин кыйрашы үчүн Москваны күнөөлөштү. НАТОнун башкатчысы Йенс Столтенберг бул окуяны “Орусиянын Украинадагы согушунун ырайымсыздыгын дагы бир жолу көрсөткөн чектен чыккан жорук” деп атады.
Украинанын чукул кырдаал кызматтары Херсон облусундагы Кахов ГЭСинин дамбасынын жарылуусунан кийин суу каптаган аймактарда калган миңдеген кишини куткаруу аракеттерин улантууда.
Куткаруучулардын ишине орус аскерлеринин Днепр дарыясынын сол жээгин аткылоосу жана миналар коркунчу кыйындатып жатат.
Херсон облусунун аскердик администрациясынын башчысы Александр Прокудин бейшемби күнү Telegram каналынан билдиргендей, эртең менен суунун орточо деңгээли 5,5 метрден ашты. Аймактын 600 чарчы километр аянты суу астында калды. Жетекчи 8-июндун таңына карай кооптуу аймактардан дээрлик 2000 адам чыгарылганын билдирди.
Орусиянын Өзгөчө кырдаалдар министрлиги өткөн суткада кызматкерлери суу каптаган аймактардан 300дөн ашык адамды, анын ичинде 70 баланы эвакуациялашканын маалымдады. Буга чейин оккупациялык бийликтер сол жээктен жалпысынан 4000 адам көчүрүлгөнүн билдирген.
Украинанын Өзгөчө кырдаалдар мамлекеттик кызматынын маалыматына ылайык, Кахов ГЭСинин дамбасы кыйрагандан кийин суу каптаган аймактарында дарыянын деңгээли мурункуга караганда жайырак көтөрүлүп жатат. Днепрдин эки жээгинде 50дөн ашык калктуу пункт толугу менен же жарым-жартылай суу астында калган.
Орусиянын армиясы Украинанын Донецк облусуна караштуу Украинск аймагын 8-июнга караган түнү аткылап, анда үч адам, анын ичинде бир бала набыт болду. Селидов шаардык аскердик администрациясы чабуулда дагы беш киши жараат алганын, алардын төртөө балдар экенин билдирди.
ГВА агенттиги эки жер там жана 14 көп кабаттуу үй жабыркаганын жазды.
Жарадарлар ооруканага жеткирилип, учурда медициналык жардам көрсөтүлүүдө. Буга байланыштуу Кремль азырынча комментарий бере элек.
Украинанын Ювеналдык прокуратурасы 4-июнга карата Москванын Киевге каршы согушу маалында 485 миң бала мерт болуп, дагы 1005и жараат алганын билдирген. Бул документтештирилген гана учурлар экенин, чынында бул сан мындан дагы көп болушу мүмкүндүгүн белгилеген.
Украинадагы Кахов ГЭСинин дамбасындагы жардыруудан кийинки экинчи күн: спутниктен алынган сүрөттөрдө суу каптаган зоопарк жана башка аймактар тартылган. Новокахов (Новая Каховка) шаарындагы жергиликтүү зоопарктагы жүздөгөн жаныбарлар сууга чөгүп өлгөнү айтылган.