Канаданын премьер-министри Жастин Трюдо алдын ала жарыяланбаган сапар менен ишембиде Киевге барды. Аны өлкөнүн каржы министри Христя Фриланд коштоп жүрдү. Бул тууралуу Reuters агенттиги жазды. Трюдо сапарын Украинаны коргоочулардын элесине арналган мемориал турган Михайлов аянтына барып, гүл чамбар коюу менен баштады.
Ал украин президенти Владимир Зеленский менен жолугушуп, Киевди колдоо, Украинаны калыбына келтирүү маселелерин талкуулады. Зеленский "Украинада коргонуу жана контрчабуул аракеттери болуп жатканын, ал азыр кайсы деңгээлде экенин толук айпай турганын" Трюдо менен сүйлөшүүлөрдөн кийинки маалымат жыйында айтты.
Зеленский контрчабуул аракеттери кайсы аймактарда жүрүп жатканын тактаган жок. Акыркы күндөрү орусиялык маалымат булактары, ошондой эле Батыштын маалымат каражаттары Запорожье облусунда катуу кармаш жүрүп жатканын жазып жатышат. Москва муну украиналык контрчабуул деп атап, ал ишке ашпай турганын жарыялады. Бул темада орус коргоо министри Сергей Шойгу эки жолу, жума күнү президент Владимир Путин бир жолу комментарий берди. Адатта ал согуштук аракеттердин жүрүшүнө комментарий бербейт.
Бул Трюдонун Орусия Украинага басып киргенден берки экинчи сапары. Канаданын премьер-министри Киевге өткөн жылы май айында барган. Өткөн айда Трюдо менен Зеленский Хиросимада "Чоң жетинин" саммитинин алкагында жолугушкан.
Украин диаспораларынын эң көбү Канадада. Согуш башталгандан бери Оттава Киевге курал-жарак жана каржылык, гуманитардык жактан жардам берип келет.
Одессада орус армиясы учкучсуз аппараттар менен чабуул коюп, үч киши набыт болду. 20дан ашык адам жараат алды. Бул тууралуу Украинанын “Түштүк” ыкчам командачылыгы билдирди. Маалыматка караганда, Орусия түндө Одесса облусуна "Шахед" дрондору менен сокку урган. Алардын баарын украин абадан коргонуу күчтөрү атып түшүргөн. Учкучсуз учактардын бири көп кабаттуу турак жайдын жанына түшүп, айрым үйлөрдүн айнектери күбүлүп түшкөнү кабарланды. Дрондун сыныгы тийген батирден өрт чыкты.
Украин ыкчам командачылыгы Николаев облусуна да дрондон чабуул болгонун кабарлады. Түнү башкалаа Киевде жана өлкөнүн ондон ашуун облусунда коркунуч тууралуу бир нече саатка абадан айгай салынып турду.
Орусия Украинага 2022-жылдын 24-февралында бастырып кирген. БУУнун маалыматына караганда, 2023-жылдын июнь айына карата аскердик аракеттерден улам 8983 жайкын тургун каза болуп, 15 442си жараат алды. Бул маалыматтар толук эмес болушу ыктымал.
Согуш маалында эки тараптын тең билдирүүлөрүн көз карандысыз булактардан ырастоо мүмкүн эмес.
Херсондо суунун деңгээли ылдыйлап баратканы кабарланды
Кахов ГЭСиндеги дамба жарылганда Украинанын түштүгүндөгү Херсон облусун суу каптады. Соңку маалыматтарда суунун деңгээли төмөндөп баратканы айтылды. Бул тууралуу облус губернатору Александр Прокудин 9-июндун таңында билдирди.
"Түндө суу 20 см ылдыйлаганын көрдүк. Херсон шаарында суунун деңгээли 5,3 метр бойдон турат",-деген Прокудин.
Ал Херсон облусундагы 32 калктуу конушта үч миңден көп турак-жай суу алдында калганын кошумчалады. Анын айтымында, жабыркаган аймактардан 2300дөн ашык киши коопсуз жактарга көчүрүлдү. Орус армиясы Днепр дарыясынын аркы өйүзүнөн аткылап, куткаруучулардын ишине тоскоолдук жаратууда.
Облуска украин президенти Владимир Зеленский келип кетери менен 8-июнда орус армиясы Херсонго чабуулун улантты. Ал эми аймактын Орусия аннексиялап алган бөлүгүндөгү Новокаховка шаарынын мэри Владимир Леонтьев суу ташкындан беш киши набыт болуп, кырктан ашууну жабыркаганын айтты.
Орусиянын мамлекеттик ТАСС агенттиги коопсуздук кызматтарына таянып, 8-июнда 14 миңдей турак-жай суу алдында калып, төрт миңден ашуун киши көчүрүлгөнүн билдирген.
Анткен менен расмий Киев Орусия аннексиялап алган аймакта кырдаал оор экенин, тургундар каралбай калганын билдирүүдө.
Согуш маалында эки тараптын тең маалыматын көз карандысыз булактардан ырастоо мүмкүн эмес.
Bloomberg: АКШ Украинага дагы 2 млрд долларлык жардам берет
Кошмо Штаттардын Коргоо министрлиги Украинага дагы эки миллиард долларлык жардам көрсөтөрүн жарыялаганы турат. Бул тууралуу Bloomberg Ак үйдөгү өз булактарына таянып жазды.
Киев ал акчаны Hawk ракеталарын, ракета учуруучу техника жана абадан коргоочу Patriot системаларына эки түрдүү ракета сатып алууга сарптайт. Украина ошондой эле тактикалык баллистикалык, канаттуу ракеталарды атып түшүрүүгө ылайыкташкан системаларды алмакчы.
Басылманын маалыматына ылайык, Украина контрчабуул баштаганын расмий жарыялаганда АКШ жаңы жардам тууралуу билдирет.
Абадан коргонуу системасын бекемдөө Киев үчүн маанилүү маселелердин бири. Орусия Украинанын бардык аймактарын авиациядан сокку урууну улантып жатат. 9-июнга караган түнү орус армиясы 16 «Шахед» дрону, алты канаттуу ракета менен чабуул койгон. Укриананын абадан коргонуу системасы тогуз дронду жана төрт ракетаны атып түшүргөн.