"Вагнер" жеке аскердик тобунун башчысы Евгений Пригожин түнкү саат бирге жакын анын колоннасы Ростов-на-Дону аймагына киргенин билдирди. Бирок расмий органдар бул маалыматты ырастай элек.
Пригожиндин айтымында, чек арачылар жана аскерде кызмат өтөгөндөр ага тоскоол болгон эмес, тескерисинче "кучак жайып" тосуп алган.
Пригожин Орусиянын Башкы штабы аба күчтөрүнө "Вагнердин" колоннасына сокку урууга буйрук бергенин, бирок учкучтар бул тапшырманы аткаруудан баш тартканын айтты. 23-июндун кечинде Пригожин колоннага ок аткан бир тик учак атып түшүрүлгөнүн кабарлаган. Андан кийин ишемби, таңкы саат 5ке жакын "Москва трассасындагы" колоннага сокку ургусу келген дагы бир тик учак атып түшүрүлгөнүн айтты.
Согуштук кырдаалга байланыштуу маалыматты текшерүүгө мүмкүн болбой жатат.
Ал арада Ростов-на-Донуда көчөдөгү камералар иштебей калганы тууралуу кабар түшүүдө. Жергиликтүү басылмалар аймакка кирүүгө мүмкүн болбой калганын, абага тик учактар көтөрүлүп, аскердик техника тартылганын жазышты. Андан тышкары М-4 "Дон" федералдык трассасы жабылганы маалым болду.
Ростов облусунун губернатору Василий Голубев жума күнү кечинде өзүнүн Телеграм-каналына "Учурдагы кырдаал тартипти сактоо үчүн максималдуу күчтү талап кылат. Күч органдары облус жашоочуларынын коопсуздугу үчүн чара көрүүдө. Баарыңардан тынчтыкты сактап, үйдөн чыкпоону суранабыз" деп жазды.
Москва убактысы боюнча таңкы саат 5ке жакын Воронеж облусунун өкмөтү жашоочуларга М-4 "Дон" трассасында аскердик техниканын колоннасы өтүп жатканын кабарлап, жарандарды шоссеге чыгуудан кармана турууга чакырды. Воронеждин бийлиги колонна кимге таандык экенин айткан жок.
Ростовдогу 161.ru каналы камфуляж кийген белгисиз адамдар Түштүк аскердик аймагы боюнча штабдын, шаардын ортосундагы полиция бөлүмүнүн имараты, ИИМдин жана Федералдык коопсуздук кызматынын аймактык башкармалыктары курчоого алганын билдирди.
OSINT долбоорунун негиздөөчүсү Руслан Левиев Ростовдогу Түштүк аскердик аймагында тартылган видеодо "вагнерчилер" эмес, орус армиясынын аскерлери көргөзүлгөнүн айтууда. Жергиликтүү бийликтер бул билдирүүнү азырынча комментарийлей элек.
Орусиянын Коргоо министрлиги: Пригожиндин чагымы украин куралдуу күчтөрүнө чабуул коюуга мүмкүнчүлүк берди
"Пригожиндин чагымынан пайдаланып киевдик режим Бахмут багытында 35-деңиз пехотасын жана 36-механикалык бригадаларын чабуул коюуга даярдай баштады", - деп билдирди Орусиянын Коргоо министрлиги.
Украинанын чыгышындагы фронттогу абал
Орусиянын Федералдык Коопсуздук комитети “Вагнер” жеке аскердик тобунунун негиздөөчүсү Евгений Пригожинге “аскердик төңкөрүшкө чакырык” фактысы боюнча кылмыш ишин козгоду.
Бул тууралуу 24-июнга караган түнү Орусиянын Башкы прокуратурасы маалымат таратты. Анын алдында Пригожин өзүнүн Телеграм каналдары аркылуу орус күчтөрү “Вагнердин” позицияларына ракетадан сокку урганын жана жалданма аскерлер арасында көптөгөн жоготуулар бар экенин билдирген. Бул үчүн орус армиясынын жетекчилигин айыптаган.
Евгений Пригожин Коргоо министрлигинин жетекчилигинен өч алууну убада кылды.
“Бул аскердик төңкөрүш эмес, акыйкаттык маршы”, - деген Пригожиндикине окшош үн орусиялыктарды, анын ичинде аскерлерди “Вагнердин” катарына кошулууга чакырган.
Орусиянын Коргоо министрлиги Пригожиндин жоочуларга байланыштуу маалыматын төгүндөдү.
Башкы штабдын башчысы Валерий Герасимов жана аскер башчыларынын бири Сергей Суровокиндин билдирүүсү жарыяланып, алар “Вагнердин” жасалма аскерлерин армияга каршы чыкпоого жана өз позицияларына кайтууга үндөштү.
Кремлдин маалымат катчысы Дмитрий Песков президент Владимир Путин соңку кырдаалдан кабары бар экенин жана керектүү чаралар көрүлүп жатканын билдирди. Орус маалымат каражаттары учурда Москва жана башка аймактарда коопсуздук чаралары күчөтүлгөнүн жазууда.
“Вагнер” (“ЧВК Вагнер” же "Вагнердин" жеке аскердик компаниясы) – компаниясы бейрасмий аскердик түзүм. Аны орус президенти Владимир Путинге жакын ишкер Евгений Пригожин түзгөнү айтылып келет. Анын жалданма аскерлери Сирияда жана Африка өлкөлөрүндөгү аскердик аракеттерге катышып келсе, Орусия Украинага кол салганы ачыкка чыгып, орус армиясына көмөк көрсөткөн.
“Вагнердин” катарында жалданма аскерлер менен катар орус түрмөлөрүндө жаза өтөгөн оор кылмыш үчүн соттолгондор бар.
“Вагнерчилер" бир катар аскердик кылмыштарга айыпталган. Соңку мезгилде Пригожин ачык билдирүүлөрдү жасап, орус Коргоо министрлигинин жетекчилиги менен тирешип жатканы белгилүү болгон.
23-июнга караган түнү орус армиясы Украинанын аймагын канаттуу ракеталар менен аткылоону улантты.
Алардын бардыгы абадан атып түшүрүлгөнүн Украин куралдуу күчтөрү билдирди.
Маалыматка караганда, чабуул Хмельницк облусундагы аскердик аэродромго багытталган. Ракеталар Каспий деңизинин аймагындагы ТУ-95МС төрт стратегиялык бомбалоочу учактан учурулган.
Өлкө чыгышында жана түштүгүндө айыгышкан кармаш уланууда. Украинанын коргоо министринин орун басары Анна Маляр украин күчтөрү түштүктө, Мелитополь жана Бердянск багыттарында алдыга жылып баратканын билдирди.
"Акырындап алдыга жылып баратабыз, жарым-жартылай ийгиликтер бар", -деди Маляр.
Орусиялык аскерий блогерлер Серебрянский токоюндагы салгылаш тууралуу жазып, орус күчтөрү алдыга жылып баратканда украин армиясынын катуу артиллериялык аткылоосуна кабылганын белгиледи.
Эки тараптын тең билдирүүлөрүн согуш маалында көз карандысыз булактардан ырастоо мүмкүн эмес.