Санкт-Петербургдагы "Фонтанка" басылмасы ишемби күнү "Вагнер" жеке аскердик компаниясынын башчысы Евгений Пригожиндин болжолдуу штабында тинтүү болуп жатканын жазган. Анда аты-жөнү башка, бирок Пригожиндин сүрөтү менен чет элдик паспорттор табылган. Кийин бул маалымат белгисиз себептер менен өчүрүлгөн.
Тинтүү "Вагнер" жеке аскердин компаниясынын "куралдуу козголоңунан" кийин жүргүзүлдү. Бул аракеттер ишембинин кечинде Пригожин жана орус бийлигинин расмий эмес макулдашуулары менен аяктады.
"Пригожиндин кеңсесинде алтын куймасы, ак порошок, доллар салынга баштыктар жана мылтыктар, Пригожинге окшош адамдардын паспорттору табылды", - деп жазды "Фонтанка" Телеграм-каналына.
Санкт-Петербургдагы "Трезини" мейманканасынын имаратын текшерүүдө 4 миллиард рубль гана эмес, беш килограмм алтын куймасы, алты тапанча жана “ар бири бир килограммдан болгон беш брикет ак порошок” табылганы айтылган. Ошондой эле "Евгений Пригожинге куюп койгондой окшош кишинин сүрөтү, бирок аттары башка" төрт паспорт табылганы белгиленген. "Фонтанка" булар Пригожинге окшош адамдар үчүн жасалган документтер экенин божомолдогон.
"Фонтанка" жарыялаган сүрөттөрдүн арасында, Евгений Пригожинге куюп койгондой окшош адамдын 2020-жылы Литвага баргандагы паспорту дагы бар. Ал учурда Европа биримдиги Пригожинди санкциялык тизмеге киргизген болчу. Экинчи паспортко Пригожиндин өзүнүн сүрөтү чапталып, бирок ага Владимир Бобров деп жазылган. Аталган басылма чындыгында ушундай адам бар экенин, ал ЛДПРден бир нече жолу жергиликтүү шайлоого талапкер болгон Осташков шаарындагы инженер экенин жазган. Анын Пригожин менен кандай байланышы бар экени белгисиз.
Пригожиндин сүрөтү менен табылган дагы бир паспорт Дмитрий Гейлердин атында. 2021-жылы "Свобода" радиосу Санкт-Петербургдагы "Согаз" клиникасы Владимир Путиндин жакын адамдарын дарылаганын жазган. Гейлер да бейтаптардын арасында болгон. Кардарлардын базасында анын аты-жөнүнүн тушуна "супер VIP" деп белгиленген. Бул бейтап чындыгында "Вагнер" жеке аскердик компаниясынын жетекчиси болгон деп болжолдоого болот.
Пригожиндин кеңсесин тинтүү боюнча укук коргоо органдары расмий комментарий бере элек. Ишембинин кечинде Кремлдин басма сөз катчысы Дмитрий Песков ага каршы козголгон кылмыш иши жабыларын айткан. Кылмыш иши эмненин негизинде токтотулары азырынча белгисиз.
Кремлдин басма сөз катчысы Дмитрий Песков "Вагнер" жеке аскердик компаниясынын башчысы Евгений Пригожин менен жалданма отрядынын "куралдуу козголоңун" токтотуу боюнча келишим болгонун ырастады. Анын айтымында, сүйлөшүүлөргө "Пригожин менен 20 жылдан ашуун убактан бери жеке тааныштыгы бар" беларус лидери Александр Лукашенко катышкан. "Куралдуу козголоң" боюнча кылмыш иши эмненин негизинде жабыларын Песков айткан жок. Анын айтымында, Пригожин "Беларуска кетет".
Кремлдин өкүлүнүн айтымында, "Вагнердин" аскерлери куугунтукталбайт. Алардын Москвага бет алган "акыйкаттык маршы" деп аталган жүрүшкө катышпаган бөлүгү Орусиянын Коргоо министрлиги менен келишим түзө алышат. Песков орус аскерлеринин Украинадагы аскердик аракеттери уланарын, соңку окуялар ага таасир этпей турганын белгиледи.
Пригожин жалданма аскерлеринин колоннасы Москвага 200 километр жетпей токтогонун жана артка кайтканын билдирген. Ал "кан төгүүнү" каалабай турганын айткан. Сүйлөшүүлөр тууралуу эч нерсе айткан эмес. Бул маалыматты биринчилерден болуп Лукашенконун басма сөз кызматы кабарлаган.
Кремлчил "Ридовка" басылмасы ишемби күнү "Вагнер" менен кагылышууда 15 орус аскери каза болгонун жазды. Кеп негизинен учкучтар жөнүндө болуп жатат — Ил-18 учагы жана бир нече тик учак атып түшүрүлгөн. "Вагнердин" жалданма аскерлеринин арасындагы жоготуулар тууралуу маалымат айтылган жок.
Пригожиндин негизги талабы - Коргоо министрлигинин жетекчилигинин кызматтан кетиши. Песковдун айтымында, 24-июндагы сүйлөшүүлөрдө кадр маселеси талкууланган эмес.
Буга чейин “Вагнердин” жалданма жоочулары Ростов-на-Дону шаарын басып алып, Москва тарапты көздөй багыт алганы кабарланып жаткан. Алардын лидери Евгений Пригожин Украинадагы ийгиликсиз согуш үчүн коррупциялашкан, компетентсиз командирлерди айтыптап, аларды алуу максатын көздөп жатканын билдирген.
Орус президенти Владимир Путин "Вагнердин" аракеттерин “куралдуу козголоң” деп мүнөздөп, Пригожинди Орусиянын аскерий жетекчилигин кулатуу үчүн “жеке амбициясынан улам чыккынчылык кылды" деп айыптаган. Бир катар өлкөлөр Орусиядагы кырдаалга көз салып турат.
Пригожин "колоннаны артка кайтарды"
"Вагнердин" башчысы Евгений Пригожин аудио билдирүүсүндө аскердик топтун колоннасы Москвадан 200 чакырым аралыкта артка кайтканын, кайра "талаа лагерлерине" барышарын кабарлады. Мунун себебин ал кан төгүлүшүн каалабаганы менен түшүндүрдү. Лукашенко менен сүйлөшүү болгону тууралуу ооз ачкан жок.
Ага чейин Беларустун лидери Лукашенконун басма сөз кызматы Путин жана Евгений Пригожин менен сүйлөшүү жүргүзгөнүн билдирген. Анда "Орусиянын аймагында кан төгүүгө жол бербөө" макулдашылганы айтылган.
Белгилүү болгондой Пригожин менен Лукашенко аймагында чыңалууну күчөтпөш үчүн "Вагнердин" алдыга жылуусун токтотууну макулдашкан.
"Учурда кырдаалды жөнгө салуу үчүн өтө пайдалуу жана ийкемдүү вариант кабыл алынды, бул "Вагнердин" коопсуздугуна да кепилдик берет", - деп билдирди басма сөз кызматы.
"Рейтер": "Вагнердин" 5 миңдей жоочусу Москвага баратат
Москваны карай "Вагнердин" 5 миң жоочусу баратканын Рейтер агенттиги "ДЭРдеги" атын атабаган, ишенимдүү булактарына таянып билдирди.
Маалыматта бул бөлүктү "вагнерчилердин" негиздөөчүлөрүнүн бири жана командир Дмитрий Уткин баштап баратат.
"Вагнердин" жетекчиси Евгений Пригожин 25 миңдей жоочусу бар экенин жарыялаган. Бирок Рейтердин булагынын билдиришинче, алардын саны кыйла аз. 5 миңдей жоочу Ростов-на-Донуну алуу үчүн түштүк тарапка кеткен.
"Вагнердин" планы боюнча жоочулар Москвага баргандан кийин бийик кабат үйлөрдүн арасына кирип, "бекем курулуш" позициясын ээлешет.