Литванын президенти Гитанас Науседа "Вагнер" жеке менчик аскердик компаниясынын башчысы Евгений Пригожин Беларуска келе турган болсо, НАТО Европанын чыгышындагы позицияларын күчтөндүрүшү керек экенин эскертти. Науседа мындай пикирин 25-июнда Литванын мамлекеттик коопсуздук кеңеши Орусиядагы "вагнерчилердин" токтотулган козголоңун талкуулаган соң журналисттерге айтты.
"Эгер Пригожин же "Вагнер" тобунун бир бөлүгү так эмес пландары жана белгисиз ниеттери менен Беларуста пайда боло турган болсо, бул жагдай биз чыгыштагы чек араларыбыздын коопсуздугун мындан ары бекемдешибиз керек дегенди билдирет", - деп айтты Науседа.
Кийинки айда Литвада Түндүк атлантикалык аскердик альянстын (НАТО) саммити өтөт.
Орус президенти Владимир Путиндин узактан берки жакын санаалаштарынын бири деп саналып келген Евгений Пригожиндин күчтөрүнүн армия жетекчилерине каршы Москвага багытталган жүрүшү 24-июнда кечке маал токтотулган. Беларустун авторитардык жетекчиси Александр Лукашенко аралашкан сүйлөшүүлөрдөн кийин "вагнерчилерге" ачылган кылмыш иштери токтотулуп, Пригожинге Беларуска чыгып кетүүгө уруксат берилгени кабарланган. Азырынча Пригожин жана "вагнерчилер" кайсы тарапка бет алганы так белгисиз.
Британиянын Башкы штабынын мурдагы жетекчиси, отставкадагы генерал Ричард Даннатт Sky News телеканалы менен маегинде Пригожин Беларустан Украинанын баш калаасына кол салышы мүмкүндүгүн айтып, украин күчтөрү буга даяр турушу керек экенин эскерткен.
"Вагнерчилердин" Орусиядагы орто жолдо токтотулган козголоңун улай расмий Бээжин Москванын туруктуулукту камсыз кылуу боюнча аракеттерин колдой турганын жарыялады. Бул тууралуу Кытайдын Тышкы иштер министрлиги 25-июнда билдиргенин Reuters жаңылыктар агенттиги жазды. Маалыматка ылайык, Кытай тарап Орусиядагы соңку чыңалууну өлкөнүн "ички иши" деп сыпаттады.
Мындай билдирүү Орусиянын тышкы иштер министринин орун басары Андрей Руденко Кытайдын башкы дипломаты Цинь Ган менен жекшемби күнү Бээжинде жолуккандан кийин жарыяланды.
Руденко Бээжинге качан барганы, анын бул сапарынын "Вагнер" жеке менчик аскердик компаниясынын башчысы Евгений Пригожиндин козголоңуна канчалык байланышы бар экени белгисиз.
"Кытай тарап Орусия Федерациясынын жетекчилигинин 24-июндагы окуяларга байланыштуу өлкөдөгү кырдаалды жөнгө салуу аракеттерин колдой турганын билдирди жана Орусиянын биримдигинин бекемделишине жана мындан аркы өнүгүүсүнө кызыкдар экенин бышыктады", - деп айтылат Орусиянын тышкы иштер министрлигинин расмий билдирүүсүндө.
Расмий Бээжин ишемби күнү Орусиядагы чыңалуу тууралуу үн каткан эмес.
Орус президенти Владимир Путиндин узактан берки жакын санаалаштарынын бири деп сыпатталып келген Евгений Пригожиндин күчтөрүнүн армия жетекчилерине каршы Москвага багытталган жүрүшү 24-июнда кечке маал токтотулду. Беларустун авторитардык жетекчиси Александр Лукашенко аралашкан сүйлөшүүлөрдөн кийин "вагнерчилерге" ачылган кылмыш иштери токтотулуп, Пригожинге Беларуска чыгып кетүүгө уруксат берилгени белгилүү болду.
Интернетте "вагнерчилердин" Орусиянын аймактарынан кетип жатканы тартылган видеолор тынбай жарыяланып жатат.
Орусиянын 24-июндун түнүндө Киевге жасаган соккусунан беш кишинин өмүрү кыйылды. Куткаруучулар ракетанын сыныгы түшкөн турак үйдүн урандыларынын астынан дагы эки кишини сөөгүн алып чыкты. Бул тууралуу Киевдин мэри Виталий Кличко кабарлады. Буга чейин үч киши каза болгону кабарланган.
Орус армиясынын соккусунан баш калаа Киевдин Соломенск районундагы 25 кабаттуу үй зыян тартты. Украин бийлигинин маалыматына караганда, 24-июндун түнү орус армиясы ТУ-95МС төрт стратегиялык бомбалоочу учактан учурулган Х-101/555 ракеталары менен сокку урган. Киевде алардын 20дайы атып түшүрүлгөн.
25-июнга караган түнү Украинаны көздөй ири ракеталык аткылоо катталган жок, бирок айрым облустарда атышуулар уланды. Херсон облусунун бийлиги жекшемби эртең менен калктуу конуштарды аткылоо болгонун кабарлашты. Шаарда бир жайкын тургун набыт болгон.
"Снаряддын бири бөлмөнүн ортосунда жарылган", - деди облустук аскердик администрациянын башчысы Александр Прокудин.