Украинанын Куралдуу күчтөрү 30-июндун түнү орус армиясы аткан 13 "Шахед" дронунун ону атып түшүрүлгөнүн билдирди.
Түндө Орусия Азов деңизи тараптан ирандык дрондор менен чабуул койгон.
Запорожье аймагынан да төрт ракета атылып, аскердик жана инфраструктуралык объектилерге чабуул жасалды. Кыйроо жана курмандыктар тууралуу азырынча маалымат бериле элек.
Согуш шартында тараптардын маалыматтарын көз карандысыз булактардан тактоо мүмкүн болбой турат.
Украина жарандарынын 78% согушта каза тапкан же жарадар болгон жакыны бар. Киев эл аралык социология институтунун Украинанын бардык аймагында жүргүзгөн изилдөөсү ушундай жыйынтык көрсөткөн.
Сурамжылоого катышкандардын 63% согушта жакын тууганы же досу каза болгонун айтып беришкен. Бери дегенде согуштан кайтпай калган үч адамды жакындан тааный турганын билдиришкен.
Сурамжылоо 26-майдан 5-июнга чейин телефон аркылуу жүргүзүлгөн. Ушундай ыкма менен социологдор 18 жаштан жогору 2013 респонденттен суроо-жооп алган. Изилдөөгө Крымдын, Севастополдун жана украин бийлиги тарабынан көзөмөлдөнбөгөн Донецк, Луганск облустарынын айрым райондорунун тургундары катышкан эмес. Ошондой эле орус баскынчылыгы башталгандан кийин чет өлкөгө чыгып кеткен жарандар да катышкан жок.
Украинанын да, Орусиянын да бийликтери согуш маалында канча аскерин жоготконун так маалымдай элек.
Бириккен Улуттар Уюмунун маалыматына ылайык, 2022-жылдын соңунан бери Украинада тогуз миңден ашуун жай тургун каза болгон, 16 миңден ашууну ар кандай деңгээлдеги жараат алган.
БУУ мындай сандар документтештирилген учурларга гана таянып эсептелгенин, мерт кеткендер менен жабыр тарткандардын чыныгы саны мындан алда канча көп болушу мүмкүндүгүн белгилейт.
Украинадагы биргелешкен орус күчтөрүнүн кол башчысынын орун басары, генерал Сергей Суровикин үй-бүлөсү менен үч күндөн бери байланыша элек.
Бул тууралуу "Эхо Москвы" радиосунун мурдагы башкы редактору Алексей Венедиктов ишенимдүү маалыматтарга таянып билдирди.
Анын айтымында, Суровикиндин сакчылары менен байланышуу мүмкүн болбой жатат.
Күч органдарында көптөгөн булактары бар Венедиктов ал камакка алынган болушу ыктымалдыгын, буга өткөн аптадагы "Вагнер" жеке аскер компаниясынын козголоңу себеп болушу мүмкүндүгүн белгиледи.
The Moscow Times басылмасы да Коргоо министрлигиндеги булагына таянып, Суровикин кармалганын жазды. Бул маалыматка расмий комментарий бериле элек.
Суровикин акыркы жолу 23-июнда видеокайрылуу жасап, "Вагнерчилерди" козголоңду токтотууга чакырган.
Шаршембиде New York Times жана Wall Street Journal басылмалары чалгындоо булактарына таянып, Суровикин Евгений Пригожиндин армиянын жетекчилигине каршылык көрсөтүү планынан кабардар болушу мүмкүн экенин жазышты. Ал өзү козголоңду колдогонбу же жокпу, беймаалым.
29-июнда эртең менен орус аскерлери Украинанын Херсон облусун аткылаганда 71 жаштагы аял каза болуп, экөө жараат алды. Облустук аскердик админстрациянын басма сөз кызматы билдиргендей, Белозёрка кыштагы чабуулга кабылып, бери дегенде 12 үй зыянга учурады.
Облус башчысы Александр Прокудин өткөн суткада аймак 64 жолу соккуга туш болгонун айтты.
Түндө Чугуев калаасына ракетадан чабуул жасады. Харьков облусунун аскердик администрациясынын башчысы Олег Синегубов турак жайлар жана автоунаалар зыян тартканын, киши өмүрү кыйылбаганын Телеграмга жазды.
Донецк облусундагы Краматорск калаасында 27-июндагы ракета соккусунан кийинки издөө-куткаруу иштери бейшембиде аяктады. Бийлик бул калаада орус армиясынын чабуулунан 12 киши каза тапканын, үчөө бала экенин маалымдады.
Кремлдин расмий өкүлү Дмитрий Песков бул жолку кол салууга Орусия бир гана "аскердик түзүмдөргө тиешеси бар объектилерге" сокку урат деп комментарий берди.
Ынанымдуу далилдерге карабай, Москва Украинадагы карапайым калкты атканын моюнуна албай келет.