Russian Field компаниясы жүргүзгөн сурамжылоого катышкан орусиялыктардын 35% Украинага бастырып кирүүнү туура эмес деп эсептешет жана Путиндин чечимин колдошпойт.
The Moscow Times басылмасы жазгандай, бул орусиялыктардын Украинадагы согушка каршы экенин көрсөткөн рекорддук көрүнүш. Согуштун алгачкы айларында сурамжылоого катышкандардын 26-28%, былтыр декабрда 33% кошуна өлкөгө бастырып кирүүнү жактабай турганын билдиришкен.
Ошол эле учурда сурамжылоо Украинага кол салуу чечимин “жокко чыгарууну каалабагандар” 49% түзөт.
Сурамжылоого ылайык, согушка каршы маанай 18 жаштан 24 жашка чейинкилердин арасында басымдуулук кылат. Согушту колдогондордун көбү 45 жаштан ашкандар.
29-июнга караган түнү орус армиясы Украинанын Чугуев калаасына ракетадан чабуул жасады. Харьков облусунун аскердик админстрациясынын башчысы Олег Синегубов турак-жайлар жана автоунаалар зыян тартканын, киши өмүрү кыйылбаганын Телеграмга жазды.
Дээрлик күн сайын чабуулга кабылып жаткан Харьков облусунда шаршембидеги соккулар үч кишинин өмүрүн кыйган.
Донецк облусундагы Краматорск калаасында 27-июндагы ракета соккусунан кийинки издөө-куткаруу иштери бейшембиде аяктады. Бийлик бул калаада орус армиясынын чабуулунан 12 киши каза тапканын, үчөө балдар экенин маалымдады.
Украинанын Краматорск калаасына Орусиянын армиясы урган соккудан каза болгондор 12ге жетти, арасында үч бала бар. 29-июнь күнү эртең менен дагы бир кишинин сөөгү урандылардын алдынан табылды. Набыт болгондордун баарынын тек-жайы такталды. Украинанын Өзгөчө кырдаалдар кызматы издөө-куткаруу иштери аяктаганын билдирди.
27-июнь күнү кечинде орус аскерлери Краматорскт шаарын ракета менен аткылашкан. Украин президентинин кеңсесинин жетекчиси Андрей Ермактын айтымында, эки сокку урулган. Бири шаардын борборун, экинчиси калаадан сегиз чакырым алыстагы Беленькое айылын бутага алган.
Краматорск - Донецк облусундагы ири шаар. Ал жакта украин армиясынын аймактык штабы жайгашкан. Былтыр апрелде калаадагы темир жол вокзалына жасалган орус армиясынын аба чабуулунан 63 карапайым тургун мерт болгон.
Кремлдин расмий өкүлү Дмитрий Песков бул жолку кол салууга Орусия бир гана "аскердик түзүмдөргө тиешеси бар объектилерге" сокку урат деп комментарий берди.
Ынанымдуу далилдерге карабай, Москва Украинадагы карапайым калкты атканын моюнуна албай келет.
Бахмут багытында украиналык күчтөр алдыга жылып жатканын Украинанын Башкы штабы билдирди. Орусиялык күчтөр каршылык көрсөтүп, катуу кармаш жүрүп жатканы маалым болду.
Бахмуттан тышкары Мелитополь жана Бердянск багытында чабуулдар жүрүп жатат.
Орусиялык аскердик блогерлер бир канча күндөн бери украиналык бөлүктөр Олешек районунда плацдармды кармап турганын жазды. Аймак Днепрдин чыгыш жээгинде, Херсондон анча алыс эмес жерде жайгашкан.