Орусиялык ТАСС маалымат агенттиги Москванын жанындагы Кубинка шаарында аскер бөлүгү жайгашкан аймакка бир дрон кулап түшкөнүн, баштапкы маалыматка ылайык жабыркагандар, кыйроо болбогонун билдирди. РИА агенттиги бул учкучсуз аппарат атып түшүрүлгөнүн кабарлады.
Кубинка Внуков аба майданынан 36 чакырым алыстыкта жайгашкан. Орусиялык басылмалар бул аймакта 4-июлда эртең менен дагы эки дрон атып түшүрүлгөнүн жазышкан.
Shot Телеграм-каналы бир дрон, же анын урандысы Кривошиенко айылындагы чарбалык курулмага кулап, өрт чыкканын билдирди жана сүрөт, видео жарыялады. Кыштак Внуков аэропортунан анча алыс эмес жайгашкан. Ал арада аталган аба майданда каттамдар башка аэропортторго жөнөтүлүп жатканы тууралуу кабарлар чыкты. РИА Новости агенттиги аны "техникалык себептер" менен байланыштырды.
Дрондорго байланыштуу Коргоо министрлиги комментарий бере элек.
Орус бийлик өкүлдөрү 30-майда Москвага 25 дрон менен чабуул жасалганын кабарлашкан. Шаардын мэри Сергей Собянин эки учкучсуз аппарат үйлөргө кулап, айрым имараттар азыраак жабыркаганын билдирген.
Украинанын президенти Владимир Зеленский 3-июлда Орусиянын дрон чабуулунда зыян келтирилген эки имараттын бири коопсуздук кызматына тиешелүү экенин бышыктады.
3-июлда Украинанын Сумы шаарында учкучсуз учактын чабуулунан курман болгондор эки кишиге жетти, дагы 19 адам жараат алды. Бул тууралуу облустук аскер админстрациясы билдирди. Ооруканада жаткандардын экөөнүн абалы оор.
Мурдараак президенттик аппараттын жетекчиси Андрей Ермак орус күчтөрү дрон менен Сумыдагы беш кабаттуу турак жайга чабуул койгонун маалымдаган.
Калаа бийлиги элге дүрбөлөңгө түшпөй, баш калкалоочу жайларда калууну эскертти.
Орусия Украинага бастырып киргенден бери Сумы облусу такай орус аскерлеринин аткылоосуна кабылууда. Акыркы чабуулдардын биринде беш жашар бала жараат алган.
Украин жазуучусу Виктория Амелина 27-июнда орус армиясынын Краматорск шаарына жасаган ракеталык чабуулунда алган жараатынан улам ооруканада каза болду. Бул тууралуу жекшембиде Украинанын ПЕН-клубу кабарлады.
Муну менен Краматорск калаасындагы аткылоодон курман болгондордун саны 13кө жетти.
Ракеталык сокку урулган маалда Амелина Колумбиядан келген делегация - саясатчы Серхио Жарамило, жазуучу Гектор Абад жана журналист Каталина Гомес менен Ria Lounge пицца-барында болгон. Баары жараат алышкан.
Виктория Амелина 37 жашта болчу, эки романдын жана балдар китебинин автору, украиналык жаш жазуучуларга ыйгарылуучу Йозеф Конрад-Коженевский атындагы сыйлыктын ээси.
Орусия Украинага басып киргенден кийин, ал укук коргоочу Truth Hounds уюмуна кошулуп, орус армиясы басып алган, кийин бошотулган аймактардагы кылмыштарын иликтеген. Ал Украинанын чыгышында, түштүгүндө жана түндүгүндө иштеди.
Амелина акыркы кездери украиналык аялдар жана алардын согуштагы жашоосун баяндаган англис тилиндеги китебин жазып жаткан.