НАТОнун баш катчысы Йенс Столтенберг 4-июлда Түндүк Атлантика альянсын дагы бир жыл жетектей турганын билдирди.
"НАТОдогу өнөктөштөрдүн баш катчылык мөөнөтүмдү 2024-жылдын 1-октябрына чейин узартуу чечими мен үчүн сыймык", - деп жазды ал.
Столтенберг Европа менен Түндүк Американын ортосундагы трансатлантикалык альянс эркиндикти жана коопсуздукту дээрлик 75 жыл бою камсыз кылып келатканын кошумчалады.
"Барган сайын кооптуу дүйнөдө биздин альянс болуп көрбөгөндөй маанилүү", - деди ал.
Быйыл февралда Столтенберг мөөнөтү октябрда аяктай турганын билдирген. 3-июлда НАТОнун мүчөлөрү анын мандатын узарта турганы белгилүү болгон.
Норвегиянын 64 жаштагы мурдагы премьер-министри НАТОнун Брюсселдеги штаб-үйүндө 2014-жылдын 1-октябрында азыркы кызматына киришкен.
Ал альянсты бир нече эл аралык кризистердин тушунда жетектеди. Орусиянын Украинадагы согушун кескин сындап келет.
НАТОго 31 мамлекет мүчө.
Орусиянын Коргоо министрлиги Жаңы Москва аймагындагы жана Москва облусундагы объектилерге беш дрон менен "террордук чабуул" жасалганын жарыялады. Тышкы иштер министрлигинин өкүлү Мария Захарова да окуяны "террордук акт" деп атады.
4-июлда эртең менен Внуково-3 өкмөттүк аэропортуна жакын жерди учкучсуз учактар бутага алганы кабарланган.
Расмий маалыматта бардык дрондор жок кылынганы, жабыркагандар жана кыйроолор жок экени айтылат. Аэропорт эки саат иштебей турган. Орус бийлиги дрондордун чабуулун Украинадан көрдү. Киев буга комментарий бере элек.
Орус бийлигинин өкүлдөрү 30-майда Москвага 25 дрон менен чабуул жасалганын кабарлашкан. Шаардын мэри Сергей Собянин эки учкучсуз аппарат үйлөргө кулап, айрым имараттар бир аз жабыркаганын билдирген.
Орус аскерлери 4-июль күнү эртең менен Херсонду кайрадан аткылаганын Украинанын Башкы прокуратурасы билдирди.
Расмий маалыматтарга караганда, таңкы саат алтыларда артиллериялык аткылоодон эки тургун каза тапты. Укук коргоо органдары кылмыш ишин козгоп, иликтөө баштады.
Донецк облустук аскердик админстрациясы да шейшемби күнкү чабуулда Предтечине кыштагынын бир тургуну кайтыш болгонун маалымдады.
Харьков облусунун аскердик админстрациясынын башчысы Олег Синегубов да аймактагы бир нече район аткыланганын билдирди.
Ал эми Сумы калаасына 3-июлда жасалган дрон чабуулунда курман болгондордун саны үч кишиге жетти. Жараат алган 21 кишинин төртөө ооруканада жатат. Сумыда 4-июль - Аза күтүү күнү деп жарыяланды.
- Бахмут багытында кырдаал курчуп жатат. Бул тууралуу Украинанын Коргоо министрлиги билдирди. Сутка ичинде позициялар колдон колго өткөн. Шаардын өзүндө орус күчтөрү украин күчтөрүнүн логистикасын үзүү үчүн ок жаадырууда. Ошол эле маалда Таврическ багытында алдыга жылып жатканын "Азаттыктын" украин кызматы билдирди.