Орусиянын армиясы 6-июлга караган түнү Украинанын Львов шаарына ракеталык чабуул жасап, бери деген үч адам мерт болду, дагы сегиз тургун жараат алды. Шаар мэри Андрей Садовыйдын маалымдашынча, ракетанын сыныгы турак жайга тийген. Ал Телеграм-каналына куткаруучулар урандылардын алдынан адамдарды алып чыгып жатканын, мерт болгондордун саны дагы өсүшү мүмкүндүгүн жазды.
Садовый согуш башталгандан бери Львовго мынчалык калайман ракеталык чабуул жасалбаганын белгиледи.
Облустук администрациянын башчысы Максим Козицкий сөз көп кабаттуу үй тууралуу болуп жатканын тактады. Анын алдында чабуулдун айынан шаардагы маанилүү инфраструктуралык объект жабыркаганын кабарлаган. Бирок анын чоо-жайын тактаган жок.
Орусия бул чабуулга байланыштуу комментарий берген жок. Москва Украинанын жарандык инфраструктурасына, турак-жайларга сокку урулганы тууралуу дооматтарды четке кагып келет.
Киевде Шевченковский райондук сотунда "теракт уюштурууга" шек саналып соттолуп жаткан Игорь Гуменюк жардыруу уюштуруп өзү мерт болду жана эки полиция кызматкери жараат алды. Бул тууралуу Украинанын улуттук полициясы кабарлады. Гуменюк "Сич" батальонунун жоокери болгон жана сегиз жылдан бери тергөө абагында отурган.
Башкы прокурордун кеңсеси кылмышка шектүүнү сотко алып келгенде ал дааратканадан качууга аракет кылган. Андан соң жардыруучу затты жардырып жиберген. Бул окуяга байланыштуу кылмыш иши козголуп, тергөө башталды.
Гуменюктун адвокаты Александр Свиридовский "Грати" басылмасына кылмышка шектүүнүн тергөө абагындагы мөөнөтү дагы узартылганын, жардыруу маалында ал күзөтчүлөрдүн коштоосунда канцелярияда болгонун айтып берген. Адвокаттын билдиришинче, Гуменюк Орусия Украинага каршы согуш баштагандан бери аны фронтко жөнөтүү үчүн абактан бошотууну бир канча жолу өтүнгөн.
Гуменюк 2015-жылы 31-августта Жогорку Раданын жанында жардырууну ишке ашырган деп айыпталган. Анда жүздөгөн киши Донбасска өзгөчө макам ыйгаруу тууралуу Конституцияга өзгөртүү киргизүүгө каршы чыккан эле. Жардырууда Улуттук гвардиянын үч жоокери набыт болуп, 140тан көп киши жараат алган.
Бириккен Улуттар Уюму келишим эки апта ичинде жокко чыгып, азык-түлүк коопсуздугуна коркунуч жаралышы мүмкүн экенин, бул дүйнөнүн аялуу катмарын кооптуу абалга кептей турганын айтып, тынчсыздануусун билдирди.
Глобалдык азык-түлүк кризисин жумшартууга багытталган Кара деңиз аркылуу дан экспорттоо тууралуу келишимдин мөөнөтү 17-июлда соңуна чыгат. 4-июлда Орусиянын Тышкы иштер министрлиги дан боюнча келишимди узартууга негиз көрбөй турганын, дүйнө базарына Орусиянын азык-түлүгүн жана жер семиртичин экспорттоо боюнча абал жакшырбаганын белгилеген.
Украинадан Кара деңиз аркылуу дан экспорттоо тууралуу келишим 17-майда эки айга узартылган.
Орусия Украинага согуш ачкандан бир нече ай өткөндөн кийин Кара деңиз аркылуу дан экспорттоо токтоп калган. Бул жагдай дүйнөдө азык-түлүктүн кымбатташына алып келген.
Киев менен Москва Түркия жана БУУнун ортомчулугу алдында дан экспортун кайра жандантуу келишимине былтыр 22-июлда Стамбулда кол коюшкан. Келишимдин мөөнөтү улам узартылып келе жаткан. Андан бери Украинадан 30 миллион тонна буудай жана башка айыл чарба азыктары экспорттолду.
Европадагы коопсуздук жана кызматташтык уюмунун (ЕККУ) Парламенттик ассамблеясы Орусиядагы “Вагнер” менчик аскердик компаниясын террордук уюм деп тааныган резолюция кабыл алды. Бул тууралуу маалымат Парламенттик ассамблеянын сайтына жарыланды.
"Орус бийлигинин кызыкчылыгын көздөгөн "Вагнер" тобунун аракеттерин табияты жана мааниси жагынан террористтик уюм деп мүнөздөөгө болот", – деп айтылат билдирүүдө.
Андыктан уюмга кирген мамлекеттердин “Вагнер” тобун террористтик уюм деп таанышы негиздүү экени белгиленген.
Резолюцияда "Вагнердин" жалданма күчтөрү орус бийлигинин кызыкчылыгында иш кылганын, өткөн аптада президент Валдимир Путин компания мамлекеттен каржыланганын мойнуна алганы да айтылат. Документте "Вагнердин" башка өлкөлөрдөгү аракети үчүн "орус мамлекети жоопкерчилик алары" белгиленген.
Ассамблея ошондой эле "Вагнерди" өз аймагына киргизип, колдоо көрсөткөнү үчүн Беларусту айтыптап, бул "Балтика өлкөлөрүнүн коопсуздугуна коркунуч келтирип жатканы" белгиленет. 23-24-июнда "вагнерчилер" Орусияга козголоң салгандан кийин Беларустун авторитардык лидеринин чакыруусу менен коңшу өлкөгө кеткени кабарланган.
Быйыл жыл башында АКШ "Вагнерди" транс-улуттук кылмыштуу уюмдардын тизмесине киргизип, компаниянын өкүлдөрүнө санкция салган. Апрелде Европа Биримдиги компанияны "Украинадагы Орусиянын аскердик агрессиясына активдүү катышканы үчүн" санкциялык тизмеге киргизген.
30-июндан 4-июлга чейин Канаданын Ванкувер шаарында ЕККУнун Парламенттик ассамблеясынын сессиясы өттү. Ага уюмга мүчө 57 мамлекеттин ичинен 50 өлкөнүн, анын ичинде Кыргызстандын расмий делегациясы катышты.