Беларустун авторитардык лидери Александр Лукашенко «Вагнер» менчик аскердик тобунун башчысы Евгений Пригожин Беларуста эмес экенин билдирди.
«Евгений Пригожин тууралуу айтсам, ал Санкт-Петербургда. Бүгүн таңда ал кайда болот? Балким ал эртең менен Москвага кетип калгандыр», -деди Лукашенко 6-июлда чет элдик жана жергиликтүү журналисттер менен жолукканда.
Ал эми «вагнерчилер» тууралуу суроо берилгенде Лукашенко менчик аскердик компаниянын жоочулары өздөрүнүн туруктуу жайгашкан лагерлеринде экенин кошумчалады.
«Мендеги маалыматка караганда, «Вагнер» менчик аскердик компаниясынын аскерлери өзүлөрүнүн туруктуу лагерлеринде. Фронттон чыккандан кийин кайра калыбына келүүгө, дарыланууга жана эс алууга кеткен лагерлеринде эле",-деди Лукашенко.
Ал азырынча бул компаниянын жоочуларын Беларуска көчүрүү маселеси толук чечиле электигин, жакынкы арада орус президенти Владимир Путин менен жолукканда бул теманы сүйлөшөрүн кошумчалады.
Беларустун авторитардык жетекчиси "Вагнер" менчик аскердик компаниясынын башчысы Евгений Пригожин Беларуста экенин 27-июнда ырастаган. Ошол эле күнү Пригожин колдонгон Embraer 600 учагы (бизнес-жет) Минскинин жанындагы аскердик авиабазага конгону маалым болгон.
24-июнга караган түнү "вагнерчилер" "куралдуу козголоң" уюштуруп, Украинадагы базаларынан чыгып, Ростов-на-Дону шаарын эч кандай каршылыксыз басып алышкан.
Беларустун авторитардык лидери Александр Лукашенко менен сүйлөшкөндөн кийин ишембиде "куралдуу көтөрүлүштү" токтотуп, артка кайткан Евгений Пригожин өзү дагы Беларуска кетери маалымдалган.
Беларуста атайын "вагнерчилер" үчүн лагерь да курулуп жатканы кабарланган. Бирок 6-июлдагы билдирүүсүндө Лукашенко муну четке какты.
«Бир нече мурдагы аскердик шаарчаларды сунуштаганбыз», - деди Лукашенко.
Орусиянын президенти Владимир Путин 27-июндагы билдирүүсүндө "Вагнер" менчик аскердик компаниясы толугу менен мамлекеттен каржыланып келгенин моюнга алды.
Орусиянын Львовго чабуул койгон ракеталары Киевге да түшмөк
Украинанын Аба күчтөрүнүн спикери Юрий Игнат орусиялык армия Львовду аткан "Калибр" ракетасы Киевге карай учурулганын, бирок чыгышка бурулуп кеткенин билдирди. Бул тууралуу ал улуттук телемарафон маалында билдирди. Анын айтымында, өткөн түнү Кара деңизде орусиялык кемелерден атылган "Калибрлер" украиналык аскер аба күчтөрүнөн буйтап адегенде Днепрдин агымына жана жердин ыңгайына жараша учкан. Алардын жетөө атып түшүрүлгөн.
Львовдо жабыркагандардын саны 37ге жетип, төрт адам каза болгонун Украинанын ИИМи билдирди.
"Ракета Киевге барат деген ыктымалдуулук бар болчу, бирок алар Львовго чабуул коюшту. Согуштук учактар алардын маршрутуна көз салгандарды жок кылууга аракет кылышты, ошого карабай чыгыш тарапка багыт алган ракеталар атып түшүрүлдү", - деп билдирди Юрий Игнат.
Украин бийлигинин өкүлдөрү билдиргендей, Львов шаарына жасалган орус армиясынын ракеталык соккусунан кеминде төрт киши мерт кетти. 6-июлда Ички иштер министрлиги 34 адам, анын ичинде бир ымыркай түнкү аткылоонун натыйжасында жаракат алганын кабарлады.
Карапайым тургундар жашаган көп кабаттуу үйдүн үстүңкү эки кабаты жана чатыры талкаланган.
Шаар бийлиги маалымдагандай, канаттуу ракеталардын соккусунан 60 батир жана 50дөй автоунаа жабыркаган. Куткаруучулар урандылардын алдынан жети кишини алып чыгышты.
Украинанын президенти Владимир Зеленский набыт болгондордун үй-бүлөлөрүнө көңүл айтты.
"Душманга сөзсүз жооп кайтарылат", - деди ал.
Украинанын Куралдуу күчтөрү 6-июлга караган түнү абадан жети канаттуу ракета атып түшүрүлгөнүн билдирди.
5-июлда CNN каналын менен маекте Владимир Зеленский контрчабуул ал каалагандан кеч башталганын, буга Батыштын өз убагында курал-жабдыкты жеткирбегени себеп болгонун маалымдады. Президент кошумчалагандай, мындан улам орус аскерлеринде коргонууну бекемдөөгө убакыт болгон.
Орусиялык аскерлер Запорожье АЭСинин бир нече энергоблогуна жардыруучу зат койгонун Украинанын президенти Владимир Зеленский 4-июлда билдирген. Украинанын башкы чалгын кызматынын өкүлү Андрей Юсов 2022-жылы май айында, Орусия ЗАЭСке "бүлүндүрүүчү каражаттарды жайгаштырганын" муну менен алар "украиналык сокку катары көргөзгүсү келип", "аскердик аракеттерге мораторий" киргизүүнү талап кыларын жазган.
5-июлда Эл аралык атомдук энергия боюнча агенттиктин башчысы Рафаэль Гросси орусиялык бийликтен уюмдун эксперттерине станциянын III жана IV энергоблокторунун чатырын, турбиналык залын, муздатуучу системасы турган жайын көрүп чыгууга уруксат берүүнү суранган.
Орусиялык аскерлер ЗАЭСтин муздатуучу көлмөсүн миналап салганын Чалгын кызматынын башчысы Кирилл Буданов да айткан. Кахов ГЭСи бузулгандан кийин атайын дамба менен тосулган бул көлмө АЭС иштебей турган күндө дагы анын реакторлорун суутуп турган негизги булак бойдон калууда.