Кремль АКШнын Кыргызстанга карата ыктымал санкциялары тууралуу маалыматка комментарий берди.
Бул тууралуу Орусиянын президенти Владимир Путиндин басма сөз катчысы Дмитрий Песков билдиргенин "РИА Новости" агенттиги жазып чыкты.
"Кыргызстан биздин жакын өнөктөшүбүз жана союздашыбыз, андан тышкары албетте, бизди абдан өнүккөн интеграциялык процесстерге катышканыбыз да бириктирип турат", - деди. Анын айтымында, Москва бул кызматташууну өнүктүрүүнүн аракетинде.
АКШ президентинин администрациясы Кыргызстанга жаңы экономикалык чара көрүүгө камынып жатканын The Washington Post басылмасы жагдайдан кабардар аткаминерлерге шилтеме жасап 18-июлда жазган. Мындай кадам санкцияга туш болгон товарлардын Кыргызстан аркылуу Орусияга ташылуусуна бөгөт коюу үчүн жасалып жатканы белгиленген.
Макалада Кыргызстандын Орусияга экспортунун жалпы көлөмү Москва Украинага кол салгандан кийин 250% өскөнү көрсөтүлөт.
Кыргызстандын Вашингтондогу элчилиги буга комментарий берип, өлкөнүн бийлиги эл аралык эрежелерди сактай турганын, аткезчиликти жана мыйзамсыз сооданы токтотууга дилгир экенин билдирген.
Ошондой эле кыргыз элчилиги айрым сын көз караштагылар "реалдуу экономикалык жагдайды" көз жаздымда калтырып жатканын белгилеп, Орусия менен Кыргызстан Евразиялык экономикалык биримдиктин мүчөлөрү экенин, миллиондон ашык кыргыз жараны Орусияда иштеп жүргөнүн кошумчалаган.
19-июлга караган түнү Орусия Украинага "Шахед" жанкечти дрондору жана ракеталар менен чабуул жасады. Негизги сокку Одесса облусуна болду.
Москва Кара деңиз дан келишиминен чыкканын жарыялагандан кийин бул шаарга экинчи түн катары менен чабуул жасап жатат.
Кемеге каршы колдонулчу "Оникс" жана X-22 ракеталары Одесса жана Черноморск портуна жана маанилүү инфраструктурасын бутага алганын Украинанын армиясы билдирди.
Одесса портунун эгин жана мунай терминалдарында цистерналар жана жүктөөчү жабдуулар бузулган.
Маалымат каражаттары бир нече турак жай зыян тартып, алты киши ооруканага түшкөнүн, арасында тогуз жаштагы бала бар экенин кабарлашты.
Шаарда жардыргыч заттар сакталган кампа өрттөнгөнүн Телеграм каналдар жазды. Жергиликтүү бийлик фейерверк сакталган жерге ракета тийип, өрт чыкканын билдирди.
Орус армиясы Киев, Житомир, Днепропетровск жана Херсон облустарына да чабуул койгонун жергиликтүү бийликтер жарыялашты. Москва соңку чабуулдарга комментарий берген жок.
Киевдин эсебинде, шаршембиге караган түнү орус күчтөрү 60тан ашуун ракета, дрон менен чабуул коюп, алардын кыркка жакынынын мизи кайтарылды.
Крымда курал-жарак кампасы күйүп жатат, бийлик 2 миң адамды эвакуация кылды
Орусия аннексиялап алган Крымдагы полигондо чыккан өрттөн "Таврида" трассасы жабылды. Бул тууралуу жарым аралдын Орусия дайындаган башчысы Сергей Аксёнов билдирди. Өрттүн чыгуу себептери тууралуу кабарланган жок.
Аксёнов 2 миңдей жашоочу полигонго жакын аймактан эвакуация болушу мүмкүн экенин айтты. Кеп төрт калктуу конуш тууралуу болуп жатат. Аннексияланган Крымдын бийлиги автомобиль жана автобус жолунун схемасын өзгөрттү.
Темир жол транспорту эч өзгөрүүсүз жүрүп жатат.
Расмий ырастала элек маалыматтарда Эски Крым аймагындагы курал-жарак сакталган кампа күйүп жатат. Жарылуу жана детонация тууралуу кабарды биринчи болуп "Крым шамалы" Телеграм-каналы билдирди. Ал алыстан ири өрт жана жарылуунун учкундары тартылган үч түрдүү видео жарыялады. Божомол боюнча учкундар реактивдүү курал-жарактыкы болушу мүмкүн.
Жергиликтүү жашоочуларга таянган "Крым шамалынын" маалыматында кампага үч жолу ракета же дрон тийген. Полигон орусиялык армиянын фронттон 230 чакырым алыс тылында жайгашкан.
Буга чейин украин Телеграм-каналдары Эски Крымдагы курал-жарак сактаган кампада өрт чыкканын кабарлашкан.
Беларуска "Вагнер" менчик аскердик компаниясынын кеминде эки миңдей жалданма жоокери келди. Бул тууралуу "Беларускі Гаюн" мониторинг долбоору ачык булактардагы маалыматтарга таянып билдирди.
Иликтөөчүлөр 18-июлда эле каз-катар тизилген, 170-185 машинадан турган эки колоннаны байкашкан. Могилёвду көздөй багыт алган машиналарда өздөрүн “Донецк элдик республикасы” (ДНР) жана “Луганск элдик республикасы” (ЛНР) деп атаган жикчил аймактардын номурлары болгон.
Мунун алдында "Азаттыктын" беларус кызматы спутниктен алынган сүрөттөргө таянып Моглиёвдогу Цель деп аталган кыштактын жанында кароосуз калган аскер бөлүктө чатырлар тигилип жатканын жазган. Журналисттер кеминде 20-50 киши баткыдай 300дөн ашуун чатыр тигилгенин эсептеп чыгышкан.
Беларустун Коргоо министрлиги өткөн аптада "вагнерчилер" беларус асерлери менен бирге коргонуу жаатындагы машыгууларды өткөрөрүн билдирген.
Былтыртан бери Украинада согушуп жаткан "Вагнердин" жетекчиси Евгений Пригожин соңку кездери орус армиясынын жетекчилигин көп сындап жүргөн. 24-июнга караган түнү "вагнерчилер" Украинадагы базаларынан чыгып, Ростов-на-Дону шаарын эч кандай каршылыксыз басып алган. Москвага 200 чакырым калганда Пригожин "кан төгүүнүн алдын алуу үчүн" артка кайтууну чечкендигин жарыялаган.
Беларустун авторитардык лидери Александр Лукашенко менен сүйлөшкөндөн кийин "куралдуу көтөрүлүштү" токтотуп, артка кайткан Пригожин өзү дагы Беларуска кеткени маалымдалган.
Орусиянын президенти Владимир Путин "Вагнер" менчик аскердик компаниясы жок экенин билдирген. Буга чейин ал аталган компания толугу менен өкмөттөн каржыланып келгенин айткан эле.