Орусиянын армиясы 31-июлда украин президенти Владимир Зеленскийдин кичи мекени саналган Кривой Рог шаарындагы көп кабаттуу үйгө ракетадан сокку урду. Бул тууралуу Украинанын Ички иштер министрлиги билдирди.
Маалыматка караганда, ракеталардын бири университеттин төрт кабатуу имаратына тийген. Урандылардын алдына адамдар калышы мүмкүн экени кабарланды. Ал эми экинчи ракета тургундар жашаган тогуз кабатуу үйгө тийген. Соккунун натыйжасында өрт тутанды. Алдын ала-маалыматка караганда эки киши мерт кетип, 20 чакты адам ооруканага кайрылды. Зеленский жабыркагандардын жакындарына социалдык баракчалары аркылуу көңүл айтты.
Учурда өрт өчүрүү жана урандылардан кишилерди куткаруу иштери жүрүүдө.
30-июлда Украинанын Донецк аймагында орус армиясынын аткылоосунан эки жайкын тургун мерт кеткенин облус губернатору Павел Кириленко 31-июлда билдирди.
Ал арада Украинанын коргоо министринин орун басары Анна Маляр түштүктөгү Запорожье аймагында украин армиясынын контрчабуулу ийгиликтүү жүрүп жактанын кабарлады.
"Мелитополь жана Бердянск багыттарында акырындап, бирок ишенимдүү баратабыз", - деп жазды Маляр Телеграмга. Ал аскердик аракеттер контрчабуулдун баардык багыттарында уланып жатканын кошумчалады.
Daily Express басылмасы өз булактарына таянып Британияда эки миңден ашык украиналык жоокер контрчабуулга даярданып жатканын жазды. Алардын башкы максаты Орусия аннексиялап алган Крымды кайра кайтаруу операциясына катышуу экенин билдирди.
Британиядагы украин жоокерлеринин машыгуусу тууралуу расмий маалымат бериле элек.
Басылманын ырасташынча, машыгуу полигону Британиянын түштүк-батышындагы Дартмурда жайгашкан жана пресса үчүн жабык.
Британ адистери Украинанын Коргоо күчтөрүнүн "элиталык бөлүгүн" машыктырып жатат. Алар абадан жана жерден чабуул жасоо операцияларына катышат. Daily Express бул операция ушул жылдын аягына чейин ишке ашат деп билдирген.
Киев менен Лондон буга байланыштуу комментарий бере элек.
Ушул айдын башында Украинанын президенти Владимир Зеленский Киев контрчабуулга даяр экенин жарыялаган.
Жекшембиде, 30-июлда өлкөнүн коргоо министринин орун басары Анна Маляр “Телеграм” каналына украин күчтөрү Бердянск жана Мелитополь багытында “акырындап болсо да илгерилегенин” жазган. Ал "контрчабуулдун бардык багыттары боюнча кармаш уланып жатканын” айткан.
Ага чейин The New York Times басылмасы Пентагондогу булактарына шилтеме кылып, Украинанын армиясы күчүн Запорожье облусуна топтоп, контрчабуулдун негизги баскычын баштаганын маалымдаган. Анда башкы максаты - Орусия басып алган Украинанын түштүктөгү аймактарын аннексияланган Крым менен байланыштырган жолду алуу экенин белгилеген.
30-июлда Украинанын коргоо министри Анна Маляр “Телеграм” каналына украин күчтөрү Бердянск жана Мелитополь багытында “акырындап болсо да илгерилегенин” жазды.
“Контрчабуулдун бардык багыттары боюнча кармаш уланууда”,– деп жазды министр.
Жекшембиде украин аскерлери Херсон облусунун оккупацияланган бөлүгүн Крым жарым аралы менен бириктирип турган Чонгар көпүрөсү атышуудан жабыркаганын маалымдады. Херсондун оккупацияланган аймагынын бийлиги да маалыматты бышыктап, украиндердин ракеталык соккусунан темир жол системасы зыян тартканын билдирди.
2014-жылы Москва аннексиялап алгандан бери Крымда Орусиянын Кара деңиз флоту жайгашкан. Жарым арал – Москва басып алган Украинанын түштүк аймактарын Орусия менен байланыштырган стратегиялык канал.
Ушул тапта Беларуста турган Орусиянын "Вагнер" жеке аскер компаниясынын жүздөн ашык жоочусу Польша менен Литванын чек арасындагы Сувалки коридоруна жеткирилди. Бул тууралуу 29-июлда Польшанын премьер-министри Матеуш Моравецкий билдирди.
Моравецкий эмнеге таянып, мындай маалымат бергенин ачык айткан жок. Ал "вагнерчилер" Беларустун Гродно шаарына жайгашканын айтып, "бул Польшага чабуулга кадам" деп белгиледи.
Польшанын Сувалки шаарынын атынан "Сувалки коридору" деп аталган аймак Польша менен Литваны бириктирген 100 чакырымдай жер. Аймактын түндүк-батышында Орусиянын Калининград облусу жайгашкан, түштүк-чыгыш тарабында беларус чек арасы.
Моравецкий акыркы жылдары Беларустан Польшага жана Евробиримдиктин башка өлкөлөрүнө Азия жана Африка өлкөлөрүнүн жарандарынын мыйзамсыз өтүү аракеттери күчөгөнүн да эске салды.
Варшава мунун артында Минск менен Москва турат деп айыптап келет.
Моравецкий "Вагнердин" жоочулары мигранттарга чек арадан өтүүгө көмөктөшүү менен бирге эле өздөрүн да мигрант катары көрсөтүп, өлкөгө кирүүгө аракеттенет деп кооптонууда. Ал ошондой эле "вагнерчилер" беларус чек арачыларынын кийимин кийип алышы да ыктымал экенин айтууда.
"Вагнер" компаниясы жана Минск азырынча Моравецкийдин билдирүүсүнө комментарий бере элек. Азырынча поляк өкмөт башчысынын сөзүн тастыктаган көз карандысыз булактар да жок.
"Вагнерчилердин" кыймыл-аракетине да байкоо жүргүзгөн "Беларускi Гаюн" долбоору бул аптада Орусиядан чыгарылган жаңы аскер техникалары Беларустун борбордук бөлүгүндөгү Цель кыштагындагы талаа лагерине жеткирилгенин жазды. Жалданмалар тууралуу азырынча маалымат жок.
Бир күн мурун Польша Куралдуу күчтөрүнүн санын дээрлик эки эсе көбөйтүүнү чечкени маалым болгон. Коргоо министри Мариуш Блащак тиешелүү буйрукка кол коюлганын кабарлаган. Ошондой эле Варшава аскерлеринин бир бөлүгүн чыгыштагы чек арасына которууну чечкени маалымдалган.
"Вагнер" менчик аскер компаниясынын жоочулары Беларуска Орусиядагы "куралдуу козголоңдон" кийин көчө башташкан. Орус аскердик жетекчилигинин кызматтан кетишин талап кылган Евгений Пригожин жалданма аскерлери менен 23-24 июнь күндөрү Ростов-на-Дону шаарын басып алып, Москваны көздөй багыт алган. Орто жолдон күтүүсүздөн артка кайтарын жарыялаган. Буга анын телефондон Беларустун авторитардык башчысы Александр Лукашенко менен сүйлөшүүсү түрткү болгон.
Орусиянын бийлиги куралдуу жүрүшкө чыккандарга карата козголгон кылмыш иши токтотулуп, ал эми "вагнерчилерге", анын ичинде Евгений Пригожинге Беларуска чыгып кетүүгө жол берген.