Сауд Арабиясында 5-августтан Украинага тынчтык орнотууга байланыштуу эки күндүк жолугушуу башталды.
Жидда шаарындагы 40тай өлкөнүн өкүлдөрү катышкан сүйлөшүүгө Орусия чакырылган эмес. Айрым басылмалар жолугушуунун жыйынтыгы тууралуу Эр-Рияд Москвага маалымат берүүнү пландаштырып жатканын жазды.
Жолугушууда Украинанын президенти Владимир Зеленскийдин өз өлкөсүнүн аймактык бүтүндүгү тууралуу БУУнун уставын сактоо, өзөктүк, энергетикалык жана азык-түлүк коопсуздукка байланыштуу 10 жободон турган “тынчтык формуласы” талкууланары айтылган.
Жиддадагы жолугушууга Кытай өкмөтүнүн Евразия иштери боюнча өкүлү Ли Хуэй дагы катышып жатат. Киев Бээжиндин бул жолугушууга өкүл жөнөткөн “чон жетишкендик” катары сыпаттанган.
Москва Жиддадагы сүйлөшүүлөргө тыкыр көз саларын билдирген.
Украинанын коопсуздук кызматынын башчысы орусиялык кемелерге урулган соккулар үчүн жоопкерчиликти алды
Украинанын коопсуздук кызматынын башчысы Василий Маляр орусиялык кемеде жана Крым көпүрөсүндө болгон кандай гана жалын болбосун "душманга карата логикалык жана таасирдүү кадам" болуп саналат.
"Андан тышкары мындай атайын операциялар Украинанын аймактык сууларында болуп жатат жана алар толук мыйзамдуу. Эгер орусиялыктар "мындай учкундар" токтосун десе, алар жападан жалгыз мүмкүнчүлүктү колдонуп, Украинанын аймактык сууларынан жана жеринен чыгып кетиши керек. Канчалык эрте аракет кылса, өздөрүнө ошончолук жакшы. Анткени биз бул согушта душманды толук жеңебиз", - деди Маляр.
Путин аскерге чакыруу курагын 30 жашка чейин көтөргөн мыйзамына кол койду
Орусиянын президенти Владимир Путин орусиялыктарды 18 жаштан 30 жашка чейин аскерге чакырган мыйзамга кол койду. Ага чейин аскерге чакыруу мөөнөтү 27 жашка чейин гана болчу.
Кол коюлган документ 2024-жылдын 1-январынан тарта күчүнө кирет. 2023-жылдын аягына чейин 27 жашка толгондорго бул мыйзам иштебей турганы кабарланды.
Башында аскерге чакыруу курагын 18 жаштан 21 жашка чейин көтөрүү пландалган. Ага чейин Мамдуманын коргоо министри Андрей Картаполов комитет буга барбай турганын билдирген. Өзгөрүүлөрдү ал демографиялык абалдан улам армияга орусиялыктар аз чакырылып жатканы менен түшүндүргөн.
Мындан тышкары президент орус жарандарын аскерге чакыруу баргандан тарта чет өлкөгө чыгып кетүүгө тыюу салган мыйзамга кол койгон.
Орусия Керч кысыгында дрон чабуулунан SIG танкери жабыркаганын ырастады жана буга байланыштуу Киевди күнөөлөдү.
Мунун алдында бир катар украиналык жана орусиялык Телеграм-каналдары 5-августка караган түнү танкерге абадан жана суу алдынан чабуул болгонун жазышкан.
Росморречфлот федералдык агентиги танкердин машина бөлүгү тешилгенин, бирок май акпаганын жана экипаж коопсуз жайда экенин билдирди.
Расмий маалыматка ылайык, чабуул болгон маалда бортто 11 адам болгон жана алар эвакуацияга муктаж эмес. Айрымдары жеңил жараат алган.
ТАСС агенттиги жабыркаган танкерге эки буксир жөнөтүлгөнүн, экипаж тешилген жерди өз алдынча текшергени жатканын жазды.
SIG танкери аннексияланган Крымга жана Сирияга химиялык заттарды жана кара май ташыганы үчүн 2019-жылы АКШнын санкциясына илинген.
Ишембиге караган түндөгү дрон чабуулдарынан айынан Крым көпүрөсүндө жарык өчүрүлүп, каттам үч саатка токтотулду. Жарым аралдын айрым аймактарынын жашоочулары катуу жарылуу болгонун айтып чыгышты. Бирок бийлик өкүлдөрү ал жарылуунун Крым көпүрөсүнө тиешеси жоктугун билдиришти.