Кошмо Штаттар 8-августта Украинага курал-жабдык үчүн дагы 200 миллион доллар бөлөрүн жарыялары күтүлүүдө. Бул тууралуу Рейтер маалымат агенттиги жазды.
Бул жолку каражат "Пэртиот" зениттик-ракеталык комплекстерине ок-дарылар, HIMARS системалары үчүн реактивдүү ракеталар, миналарды иштен чыгаруу үчүн колдонулуучу жабдыктарга жана башка куралдарга жумшалышы керек.
Акча буга чейин берилген 6,2 миллиард долларлык курал-жабдыктын баасын эсептеп жатканда кетирилген бухгалтердик катадан улам ашыкча болуп чыккан.
Учурда АКШ президенти Жо Байдендин администрациясы Украинага дагы кошумча каражат бөлүү маселесинин үстүндө иштеп жатат.
Сунуш Конгресске күзүндө жиберилет. Бул тууралуу СNN телеканалы билдирди. Былтыр Ак үй Украинага жардам бөлүү сунушу менен Конгресске төрт жолу кайрылган.
Буга чейин Пентагон Киевге "Абрамс" танктарынын биринчи партиясын жиберүүнү расмий жактырганы маалым болгон.
Украин армиясы орус күчтөрүнө каршы өлкөнүн түштүк-чыгышында контрчабуулун улантууда. Бул тууралуу украин Куралдуу күчтөрүнүн башкы штабы 8-августта билдирди. Маалыматка караганда украин армиясы Запорожье облусунун Бердянск жана Мелитополь багыттарында орус күчтөрүн сүрүп чыгаруу аракетин көрүүдө.
Соңку бир суткада украин армиясы "орус күчтөрүнүн жеке курамы, курал-жабдыгы жана аскердик техникасы топтолгон райондорго" тогуз жолу сокку урганы Башкы штабдын билдирүүсүндө белгиленген.
Украин армиясы контрчабуулун ушул жылы жайда баштаган.
Ал арада Украинанын Ички иштер министрлиги Донецк облусунун Покровск шаарына орус армиясы жасаган ракеталык соккулардан жабыркагандардын санын жаңылады. Соңку маалыматтарга караганда, жети жайкын тургун мерт болуп, жетимишке чукул адам жараат алды. Алардын арасында полиция кызматкерлери, куткаруучулар жана эки бала бар.
7-августтун кечинде орус армиясы соккон ракеталардын бири Покровскидеги беш кабаттуу үйгө тийген.
Орусиянын армиясы 7-августта кечинде Донецк облусуна караштуу Покровск шаарын ракета менен аткылады. Украинанын Куралдуу күчтөрү анда бир ракета шаардын борборундагы беш кабаттуу үйгө тийгенин, бери дегенде жети адам мерт болуп, дагы 57 тургун жараат алганын кабарлады.
Дүйшөмбүгө караган түнү орус армиясы Херсонго бир нече жолу чабуул жасады. Анда дагы ракета көп кабаттуу үйгө тийип, бир киши мерт болуп, дагы бир нечеси жараат алган. Учурда чабуулга кабылган жерлерде куткаруучулар иштеп жатат.
Харьковдогу Купянск району дагы аткылоого кабылды. Анда бомба түшүп, эки адам мерт болуп, дагы төрт киши жараат алды.
Украина тараптын билдиришинче, бул аймакта "кош сокку" тактикасы колдонулган. Анда жарылуу болгон жерге куткаруучулар келгенде экинчи сокку урулган. Натыйжада эки куткаруучу менен бир полиция кызматкери жараат алып, жер тамдар жабыркап, өрт тутанган.
Орусия Украинанын аймагына күн сайын чабуул жасап жатат. Москва жарандык объекттерге жана турак жайларга сокку урганы тууралуу маалыматтарды четке кагып келет.
- автор Элвира Будайчиева
Орус армиясы 7-августка караган түнү Украинанын Херсон шаарын аткылап, Днепропетровск облусунун Синельниковский районуна ракета менен сокку урду. Чабуулдардан бир аял мерт кетма, бир нече жайкын тургун жараат алганы кабарланды.
Жекшембиде Крымды материк менен туташтырып турган эки көпүрө аткыланды. Учурда Чонгар жана Геническ көпүрөлөрү менен каттоо дээрлик мүмкүн эмес.
Киев ошондой эле Орусиянын туткунунан 22 украиналык жоокер кайтып келгенин кабарлады. Бирок орус тарап туткундарды алмаштыруу боюнча комментарий бере элек.
Херсон облусунун аскердик администрациясынын башчысы Александр Прокудиндин маалымдашынча, түнкү саат бирге чукул орус аскерлери карапайым тургундардын үйүнө кара ок чыгарды. Андан 59 жаштагы аял каза таап, дагы бир улгайган адам жарат алды.
"Түнү үй титирегенинен ойгондум. Экинчи кабатта жашайм. Анан сыртка чуркап чыктым. Карасам өрт чыгып атыптыр. Акырындап баарыбыз сыртка чыктык" дейт талкаланган үйдөн чыккан аял.
Жекшемби түнү орус армиясы Синельниковский районуна ракета менен сокку урганын Днепропетровск облустук администрациясынын башчысы Сергей Лысак Телеграмга жазды.
Көп кабаттуу үйдө өрт чыгып, таңга жуук өчурүлдү. Киев азырынча жабыркагандар тууралуу маалымат бере элек. Украин Куралдуу күчтөрүнүн башкы штабы билдиргендей соңку бир суткада өлкө боюнча элүүдөй куралдуу кагылыш катталды. Киев өткөн апта оор жана чыңалган абалда болгонун белгиледи.
Украинанын президентинин администрация башчысы Андрей Ермак орус тарап таңга маал дагы чабуулун улантканын билдирди. Украин армиясы былтыр ноябрда контрчабуулда Херсонду орусиялык күчтөрдөн бошоткон. Андан бери Орусия Херсон шаарына чектеш конуштарды тынымсыз бутага алууда.
Бул арада Андрей Ермак Орусиянын туткунунан 22 жоокер кайтып келгенин Телеграмга жазды. Украинага кайтып келгендердин арасында эки офицер, катардагы жоокер жана сержант бар экени кабарланды. Бирок Орусиянын Коргоо министрлиги туткундарды алмаштыруу боюнча комментарий бере элек.
Жекшембиде Украинанын армиясынын чабуулунда аннексияланган Крымды материк менен байланыштырган эки көпүрө жабыркады. Бул тууралуу жарым аралдын Москва дайындаган бийлиги кабарлады. Учурда талкаланган Чонгар жана Геническ көпүрөлөр менен каттоо дээрлик мүмкүн эмес.
Орусиялык булактар Киев британиялык Storm Shadow канаттуу ракетасын колдонгонун билдиришти. Киев ракеталарга байланыштуу азырынча маалымат бере элек.
Бирок дүйшөмбүдө Украинанын Куралдуу күчтөрү эки көпүрөгө сокку урулганын ырастады. Анда бул көпүрөлөр орус армиясын курал-жарак, ок-дары менен камсыздоодо негизги жол болгону айтылат.
краин аскерлери бул көпүрө аркылуу орусиялык армия Украинанын оккупацияланган түштүк аймактарына кошумча күч жөнөтүп келгенин билдирген.