Түркиянын бийлиги Орусияны Кара деңиздеги кырдаалды курчутпоо керектигин эскертти. Бейшембиде түрк президентинин канцеляриясы тараткан маалыматта, аталган деңизде нейтралдуу суудагы кемеге байланыштуу окуя тууралуу сөз болгон.
"Кара деңиздин эл аралык сууларындагы окуяга байланыштуу орус тарапка чыңалууну жаратуу аракеттерден алыс болуусу керектиги эскертилди",-деп жазылган Твиттерге жарыяланган маалыматта.
Орусиянын "Василий Быков" аттуу кайгуул кемеси 13-августта эртең менен Кара деңизде Палаунун желеги менен бараткан "Шукрю Окан" жүк ташуучу кемесин асманга эскертүү иретинде бир канча жолу ок атып токтоткон.
Орусиянын Коргоо министрлиги ал кеме Украинанын Измаил портун көздөй баратканын, орус кемеси аны текшерүү үчүн токтотууга аракет кылганын билдирген.
Деңиздеги кемелердин багытына байкоо салган Marine Traffic трекинг кызматынын маалыматына ылайык, жүк ташуучу кеме багытын өзгөртүп, Румынияны көздөй багыт алган. Бул кеме Грекиянын Халкида портунан чыккан.
Буга чейин орус армиясы Украинанын данын экспорттоого жол ачкан келишим иштебей калганына байланыштуу украин портторуна бараткан бардык соода кемелерин бутага алынуучу объект катары санай турганын билдирген.
АКШ Орусиянын дан келишиминен баш тартканын кескин сынга алып, орус күчтөрүнүн украин портторун блокадага алганын "аскердик агрессия" деп сыпаттаган.
Украинанын Аскер-аба күчтөрүнүн өкүлү Юрий Игнат Киев F-16 үлгүсүндөгү согуштук учактарын эмдиги жылы жазга чейин албашы мүмкүндүгүн айтты. Ал 16-августта телемарафондо сүйлөп жатып, мындай учактарга чоң үмүт артылганын, орусиялык ракеталардан коргонуунун, абадан коргонуунун бир бөлүгү болорун белгиледи. Ошол эле маалда украин учкучтарын мындай учактарды башкарууга үйрөтүү иштери илгерилегенин белгиледи.
Ушул жылдын июнь айында Украинанын коргоо министри Алексей Резников F-16 учактарын башкарууну үйрөтүүчү эл аралык программа жакын арада башталарын айткан.
Киев анда контрчабуулду баштап жаткан жана Москванын абадагы үстөмдүгүнө туруштук берүү үчүн Батыштын жаңы учактары зарыл экенин буга чейин бир нече ирет айткан.
НАТОнун мүчөлөрү Дания менен Нидерланд учкучтарды жана жардамчы кызматкерлерди окутуу, учактарды тейлөө жана F-16ны Украинага жеткирүү боюнча эл аралык коалициянын аракеттерин башкарып келет.
Европа Биримдигини тышкы саясат боюнча башкы комиссары Жозеп Боррел майда Киев F-16 учактарын колдоно баштаарын, учкучтар даярдыктан өтүп жатканын ырастаган.
General Dynamics F-16 Fighting Falcon — америкалык бир моторлуу, көп максаттуу кыргын салуучу согуш учагы. Же бомбалоочу, же кыргын салуучу болуп, бир гана милдетти аткара алган эски советтик учактардан F-16 универсалдуулугу менен айырмаланат. F-16 менен көптөгөн өлкөлөр куралданган: 2023-жылы дүйнө жүзүндө 2200гө жакын кыргын салуучу учактар колдонулуп турган.
Украинанын Коопсуздук күчтөрү алгачкы ирет 2023-жылдын июлунда Крым көпүрөсүнө жасалган чабуул үчүн жоопкерчиликти өз моюнуна алып, дрон менен аны жардырып жаткан видеону жарыялады. Бул тууралуу америкалык CNN каналы билдирди.
Аталган телеканалга курган маегинде украин коопсуздук кызматынын башчысы Василий Малюк Крым көпүрөсүнө, "Оленегорский горняк" десанттык кемесине жана SIG танкерине чабуул койгон деңиз дрондору Украинада чыгарылганын билдирди.
Малюк бардык операциялар украин мыйзамдарына жана эл аралык укуктун эрежелерине шайкеш келерин кошумчалады.
"Биз деңиздеги ар бир атайын операцияга олуттуу карайбыз. Жети жолу өлчөп, бир кесебиз. Бирок так жана ыкчам ишке ашырабыз. Душмандын жүрөгүнө муштайбыз", - деген Малюк атайын операцияларга чет элдик өнөктөштөрүнүн тиешеси жок экенин белгиледи.
Украинанын аннексияланган Крым жарым аралын Орусия менен байланыштырган Крым көпүрөсү 2020-жылы ачылган. Былтыр 8-октябрда алгачкы жардыруу болгон. Экинчиси быйыл 17-июлга караган түнү уюштурулган. Орусия бул көпүрөнү жарым аралдагы армиясын тамак-аш, курал-жабдык менен камсыздоо үчүн колдонуп келет.
Расмий Киев буга чейин көпүрөдөгү жардыруу үчүн ачык жоопкерчилик алган эмес. Украинанын Коопсуздук кызматы Крым көпүрөсүндө болгон окуянын чоо-жайы согушту жеңгенден кийин ачыкталарын билдирген.