Орус армиясынын Украинанын Чернигов шаарына чабуулунан жети киши курман болуп, 90у жараат алганы белгилүү болду.
Бул тууралуу украин ички иштер министри Игорь Клименко билдирди. Орусия Черниговдун борборуна 19-августта эртең менен сокку урган.
Каза болгондордун арасында алты жашар бала да бар. ИИМдин маалыматына караганда, жараат алып ооруканага кайрылган 90 адамдын ону полиция кызматкерлери, 12си балдар. 25 киши ооруканага жаткырылды.
"12 жаштагы кызды реанимобил менен Киевге алып баратышат. Анын абалы оор", – деди Клименко.
Орусиянын армиясы 19-августта эртең менен Украинанын Чернигов шаарын аткылады.
Чернигов облустук администрациясынын башчысы Вячеслав Чаус Телеграм аркылуу билдиргендей, шаар баллистикалык ракета менен аткыланды деген божомол бар.
Украин маалымат каражаттары өз булактарына соккуда каза тапкандар жана жараат алгандар бар экенин жазды.
Черниговдун мэринин милдетин аткаруучу Александр Ломако алты киши курман болуп, 11ден ашыгы ар кандай жараат алганын кабарлады.
Украинанын президенти Владимир Зеленский чабуулдун кесепеттери тартылган видеону жарыялады.
"Орусиянын ракетасы шаардын борборуна түштү. Аянт, Политех, театр. Кадимки ишембини Орусия жоготуу менен кайгыга айлантты. Каза болгондор жана жаракат алгандар бар", – деп жазды ал.
Буга чейин Украинанын Аскердик аба күчтөрү Чернигов, Полтава, Сумы облустарына ракеталык чабуул болушу ыктымалдыгын эскерткен. Кийинчерээк Чернигов облусуна дрон соккусу күтүлүп жатканы тууралуу кабар тараган.
Москва соккулар тууралуу билдирүүлөргө комментарий бере элек.
Согуш шартында тараптардын билдирүүлөрүн көз карандысыз булактардан тактоо мүмкүн эмес.
Украинанын армиясы 19-августка караган түнү Орусия 17 жолу ирандык "Шахед" дронун учуруп, анын 15и атып түшүрүлгөнүн билдирди.
"Бул теракттын кесепеттери тууралуу маалымат такталууда", - деп айтылат маалыматта.
Украин армиясынын маалыматы боюнча, орус күчтөрү Курск тараптан учкучсуз учактарды учурушкан. Түндө Украинанын борбордук жана батыш аймактарында эскертүү жарыяланды.
Украинанын Куралдуу күчтөрүнүн Башкы штабы ошондой эле өткөн суткада орус армиясы Украинанын аймагына үч ракеталык жана 41 жолу абадан сокку урганын билдирди. Карапайым калктын арасында каза болгондор жана жарадар болгондор бар экени айтылууда. Курмандыктар жана кыйроолор боюнча так маалымат азырынча жок.
Кремль орус президенти Владимир Путиндин Ростов-на-Донудагы орусиялык аскерлер тобунун штаб-үйүнө барганын жарыялады.
19-августтагы маалыматка караганда, Путин Ростов-на-Дону шаарында Украинадагы согушка катышкан орусиялык аскерлер тобунун штабында жыйын өткөргөн. Башкы штабдын төрагасы Валерий Герасимов менен башка жогорку даражалуу офицерлердин отчетун уккан.
Башка маалымат берилген жок.