Украинадагы согуш башталгандан бери эки тараптан тең жарадар болгондордун жана каза тапкан аскерлердин саны 500 миңге чукулдаган.
Бул маалыматты The New York Times гезити АКШнын администрациясындагы атын атабаган булактарга таянып билдирди.
Администрациянын баамында Орусия майданда Украинага караганда көп адамын жоготкон. Болжол менен 120 миң орусиялык согушта өлүп, 170-180 миңи жарадар болгон. Украина тараптан 70 миң адам өлүп, 120 миңдейи жараат алган.
New York Times бул анык маалымат эмес экенин белгилеп, америкалык мекемеде эки тараптын согуштагы жоготуулары тууралуу ар башка маалымат бар экенин жазган. Ушул жылы ачыкка чыгып кеткен Пентагондун документинде орусиялык армиянын жоготуусу 43 миң, Украинаныкы 17 миңден ашык деп көрсөтүлгөн.
Согушкан эки тарап тең жоготуулары тууралуу маалымат бербейт. Москва каза болгон аскерлеринин санын бир жыл мурда расмий жарыяласа, Киев бул маалымат согуш бүткөндөн кийин гана берилерин айткан.
Ошол эле маалда эки тарап тең каршылашы чоң жоготууга учураганын белгилеп келет. Украина 250 миңдей орусиялык аскер жок кылынганын айтса, орусиялык расмий адамдар Украинанын жоготуусу сегиз эсе жогору экенине ишендиргенге аракет кылат.
Согуштагы жоготууну ар кандай байкоочулар жана ЖМК да ачык булактарга таянуу менен баалаганга аракет кылып келет. Би-Би-Синин орус кызматы менен "Медиазона" социалдык булактардагы билдирүүлөргө жана ачык булактарга таянып, орусиялык армиянын катарында каза болгон 30 миң адамдын аты-жөнүн аныктаган. Өлгөндөрдүн реалдуу саны мындан да жогору болушу мүмкүн. Буга чейин Евгений Пригожин "Вагнер" тобу эле Бахмутту курчоого алганда 20 миң адамынан айрылганын билдирген.
New York Times орусиялык армия жоготууга учураганы менен согуш талаасында украин күчтөрүнө караганда басымдуулук кыларына токтолгон. Орусиянын калкынын саны Украинаныкына караганда үч эсе көптүгүн эске салып, мобилизациялык ресурсу жетиштүү экенине көңүл бурган.
Украина оккупацияланган Энергодарга сокку урулганын билдирди
Украинанын башкы чалгын кызматы Запорожье облусундагы орусиялык күчтөр басып алган Энергодар шаарында полициянын имаратында жарылуу болгонун билдирди.
Жарылуу Орусия дайындаган полиция жетекчилери жыйын өткөрүп жатканда болуп, бир катар жогорку кызматтагы офицерлер жараат алган.
Мекеме жарыялаган видеодон сокку учкучсуз учак менен урулганын көрүүгө болот.
Жарадар болгондор арасында шаар полициясынын Орусия дайындаган жетекчиси, Чувашиядан которулуп келген полковник Павел Чесанов, анын орун басары жана бир катар жетекчилер бар. Украина тарап жарадарлар реанимобиль менен Мелитополго жеткирилгенин, имаратта өрт чыкканын билдирди.
Орусия басып алынган Мелитополдун мэри Иван Федоров Эноргодарда катуу жарылуу болгонун билдирип, имараттын сүрөтүн жарыялады.
Айрым орусиялык Телеграм-каналдар сокку урулганын ырастап, "жабыр тарткандар" жок экенин жазышты. Орусиянын расмий адамдары бул окуяга комментарий берген жок.
Энергодарды орусиялык күчтөр 2022-жылы мартта ээлеп алган. Шаарда Запорожье АЭСи жайгашкан.
"Озоди" радиосу Орусиянын Калуга облусундагы Медынь шаарындагы ИК-4 түрмөсүндө жазасын өтөп жаткан тажик жарандары Украинадагы согушка баруу үчүн Коргоо министрлиги менен келишимге күчтөп кол койдуртуп жатканын жазды.
Алардын эсебинде, абактагы 150дөй тажикстандык согушка айдалышы мүмкүн. Тажикстандын Орусиядагы элчилиги бул боюнча текшерүү башталганын билдирди.
Аты-жөнүн жашырган абактагы адам "Озодиге" бул жолу аларга Орусиянын Коргоо министрлигинин өкүлдөрү келгенин айтып берген. Жолугушуу 11-августта болгон.
"Былтыр бизге ар кандай жеңилдиктерди убада кылып, согушка азгырышкан, эч кандай мажбурлоо болгон эмес. Азыр "каалайсыңарбы же жокпу, согушка барасың" деп айтышты", - деген ал.
Былтыр орус абагында жатып "Вагнер" аскердик менчик компаниясына кошулган 20дай тажикстандык Украинадагы согушта курман болгону аныкталган. Медынь шаарындагы түрмөдө отурган тажик жарандардын ырасташынча, 2022-жылы "Вагнерге" жүздөй тажик жараны кошулган. Алардын көбү Бахмуттун жанындагы салгылашта набыт болгон.
Тажикстандыктар жакынкы жумаларда аларды Украинага алып кетиши мүмкүн экенин айтып, расмий Дүйшөмбүдөн жардам сурашты.
"Бул жактагылардын көбү алты айдан бир жылга чейин кесилген. Украинада өлгүбүз келбейт. Бийлик бизди аман алып калсын", -деп өтүнгөн алардын бири.
Орус түрмөлөрүндө канча тажикстандык жазасын өтөп жатканы так белгисиз. Айрым маалыматтарга караганда алардын саны 10 миңге жетет.
Тажикстандын ички иштер министри Рамазан Рахимзода Орусиянын абактарында отурган жүздөй тажикстандык Украинадагы согушка жөнөтүлгөнүн ырастаган.
Орус абактарынан Украинадагы согушка азгырылып, фронтто мерт болгон кыргызстандыктар тууралуу "Азаттык" атайын берүү даярдаган.
Орусиянын Коргоо министрлиги 18-августта таңга маал Москва шаарындагы объекттерге чабуул жасоого аракет кылган дрон атып түшүрүлгөнүн билдирди. Мунун алдында шаар мэри Сергей Собянин дрондун сыныгы Красноречинск районунан түшкөнүн кабарлаган.
Чукул кызматтардын маалыматына караганда, анда "Экспоборбордогу" павильондордун бири жабыркаган. Жарадар болгондор тууралуу маалымат берилген жок.
Орусия мындай чабуулдарга байланыштуу Украинаны айыптап келет. Киев адатта Орусиянын ичиндеги мындай окуяларга комментарий бербейт жана жоопкерчилик албайт.
Орусиянын бийлиги буга чейин дагы Москвага дрон аркылуу чабуул жасалганын бир канча жолу билдирген.