БУУ Орусия согуш ачкан былтыркы февралдан бери Украинада 9 миң 511 карапайым кишинин өмүрү кыйылганын, жалпы 21 миңден ашуун жайкын тургун жапа чеккенин билдирди.
Уюмдун мониторинг миссиясы тараткан маалыматка караганда, 1-27-август күндөрү ар кыл чабуулдар 585 карапайым кишинин, арасында жашы жете элек беш баланын өмүрүн кыйды. Эксперттер уруш жүрүп жаткан айрым жерлерден маалымат алуу кыйын болгондуктан, курмандыктардын санын так аныктоо мүмкүн эмес деп эскертишет.
Маалыматка караганда, жөн-жай адамдар негизинен артиллерия, танк, баллистикалык жана кадыресе ракеталардын аткылоосунан, абадан урулган соккулардын, анын ичинде дрондордун кесепетинен каза табууда.
Ал эми Украинанын Башкы прокуратурасы былтыркы жылдын 24-февралынан бери 503 бала өмүр менен кош айтышты, 1117ден көбү жараат алды деп билдирди. Кеңсе бул маалымат дагы толук эместигин белгилейт.
Украинанын чыгышында акыркы 24 саатта кеминде беш карапайым киши каза тапканын 29-августта аймактык бийлик өкүлдөрү билдиришти. Донецк облусунун губернатору Павел Кириленконун айтымында, дагы беш киши жарадар болду.
Маалыматка караганда, Мариупол жана Волноваста да мерт кеткендер бар, бирок алардын так саны азырынча белгисиз.
Бир күн мурда орус аскерлери Полтавадагы заводду аткылаганда үч жай тургун окко учкан. Дагы бир киши Херсондо каза болгон.
Украин армиясынын Башкы штабы шейшембиде билдиргендей, майдандын чыгыш жана түштүк тилкелеринде айыгышкан салгылашуулар уланууда, куралдуу күчтөр Мелитопол багытында чабуул коюп жатышат.
Башкы штаб украин аскерлери буга чейинки ийгилигин бекемдеп жатышканын кошумчалады. Запорожье облусундагы сөз болгон шаар орус аскерлери үчүн Москва аннексиялап алган Крым менен Украинанын оккупацияланган аймактарын туташтырган маанилүү транзит хабына айланган.
Орусиянын Коргоо министрлиги 29-августта маалымдаганына караганда, Тула облусунда украиналык эки дрон атып түшүрүлдү. Бирок окуя качан болгону жана так жери, келтирилген чыгым айтылган жок.
Буга чейин министрлик Белгороддо дагы эки дрон жок кылынганын билдирген. Киев бул маалыматты комментарийлеген эмес.
Крымды Орусия аннексиялап алгандан бери Украинанын 106 жараны "Хизб ут-Тахрир" иши боюнча куугунтуктоонун курмандыгына айланды.
Бул тууралуу "КрымSOS" укук коргоо уюмунун өкүлү Евгений Ярошенко 28-августта билдирди.
"Камалгандардын төртөө жаза мөөнөтүн өтөп бүттү, сегизден жыйырма жылга чейин кесилген 84 киши учурда түрмөдө отурат. 2019-жылы камалган крым татары Жемил Гафаров быйыл 10-февралда абакта көз жумду", - деди ал.
Өткөн аптада орус полициясы крым татарларынын үйүндө тинтүү жүргүзүп, "террордук уюмду уюштуруу жана анын ишмердигине катышуу" деген айып менен алты кишини кармап кеткен.
Украина президентинин Крымдагы өкүлчүлүгү (анын кеңсеси азыр Киевде жайгашкан) маалымдагандай, жарым аралда учурда 182 саясий туткун бар. Алардын жүздөн көбү - крым татары.
2015-жылдан тартып Крымдын орусиячыл бийлиги мусулмандарды "Хизб ут-Тахрир" уюмуна тиешеси бар деген айып менен жапырт кармап келет. Бул уюмга Украинада тыюу салынган эмес. Бирок ал Орусияда 2003-жылдан тартып террордук уюмдардын катарына кирет.
Крым татарларынын көбү Орусиянын жарым аралды аннексиялап алышына каршы чыгышкан.
