Украинанын түштүк-чыгышындагы Запорожье облусунда айыгышкан салгылаш күч алды. Бул тууралуу украин аскерлери билдирди.
Алар Донецк облусундагы Бахмуттун жанындагы кармашта орус армиясы чоң жоготууга учураганын кошумчалашты.
Согуш маалында эки тараптын тең билдирүүлөрүн көз карандысыз булактардан ырастоо мүмкүн эмес.
Ал арада Орусиянын Коргоо министрлиги 31-августта билдиргендей, абадан коргонуу күчтөрү Москваны карай багытталган украин дронун атып түшүрдү. Орус баш калаасынын мэри Сергей Собянин маалыматты ырастап, жабыркагандар жок экенин Телеграм аркылуу билдирди.
Москвадагы Внуково жана Домодедово аэропортту түнү убактылуу жабылып, 31-августта эртең менен кайра ишин жандантты.
30-августта Украинанын Донецк облусунда ракеталык аткылоонун алдында "Эркин Европа/Азаттык" радиосунун кабарчылары аман-эсен экени, автоунаа олуттуу жабыркаганы кабарланды.
Орусиянын расмий өкүлдөрү өлкө согуш башталгандан берки эң ири дрон соккуларына туш болгонун 30-августта билдиришти. Орус Тышкы иштер министрлигинин басма сөз катчысы Мария Захарова бул чабуулдар “жазасыз калбасын” эскертти.
Эң кыйратуучу соккуга украин чек арасынан 660 чакырым алыс жердеги Псков облусу туш болгону кабарланды. Украин дрондору деген жабдуулар аэродромду бутага алып, Ил-76 үлгүсүндөгү төрт аскердик жүк ташыган учак жок кылынды.
Маалыматты жергиликтүү бийлик өкүлдөрү жана ТАСС агенттиги таратышты. Зыяндын өлчөмүн аныктоо үчүн аэродром 31-августка чейин жабылды.
Украин Коргоо министрлигинин чалгын кызматы Псковдо төрт учактын жок кылынышын тастыктады. Бирок сокку үчүн жоопкерчиликти өзүнө алган жок.
Брянск, Калуга, Орлов, Рязань жана Москва облусунда да жарылуулар болгону кабарланды.
Брянскинин губернатору Александр Богомаздын айтымында, украиналык учкучсуз учактар шаардагы телемунарага сокку урууга аракеттенген. Ал эч ким жапа чекпегенин кошумчалады.
Москвадагы Домодедово жана Внуково аэропорттору кыска убакытка жабылды.
Орусия аннексиялап алган Крым жарым аралындагы Севастополь шаары да соккуга туш болгону маалымдалды.
Эксперттер соңку чабуулдар Киев душмандын аймагындагы алыскы жерлерге чабуулдарын күчөтүп жатканынан кабар бере турганын белгилешет.
Ошол эле маалда орус аскерлери Киевди аткылаганда эки киши каза тапты, үчөө жаракат алды. Украинанын башкалаасы жаздан бери мындай ири соккуларга кабыла элек болчу.
Ал арада украин армиясынын Башкы штабы куралдуу күчтөр Мелитополдун айланасында чабуулун улантып жатышканын билдирди.
Орусиянын армиясы 30-августка караган түнү Киевди тынымсыз аткылады. Облустук аскердик администрация мындай чабуул жаз айынан бери болбогонун, орус армиясы дрондор жана ракеталар менен бир убакта аткылаганын билдирди.
Түнкү чабуулда бери дегенде эки адам набыт болуп, дагы эки тургун жараат алды. Ракеталардын жана дрондордун сыныгы кулап, шаардагы Дарницкий жана Шевченко райондорунда өрт чыкты.
Шаршембиге караган түнү Украинанын бардык аймагында абадан эскертүү берилди. Одесса менен Кривой Рогдо дагы жардыруулар болгону кабарланды. Одесса облусунун башчысы Олег Кипр абадан коргоо системалары иштегенин билдирди.
Согуш маалында бул маалыматтарды бейтарап булактардан тактоо мүмкүн эмес. Мосва чабуулдар тууралуу комментарий берген жок.
Орусиянын Псков шаарында 30-августка караган түнү дрондор менен чабуул жасалганы кабарланды. Айрым маалыматтарга ылайык, анда аэродром бутага алынган жана чабуулда Ил-76 үлгүсүндөгү төрт аскердик учак жабыркады. Аэропорт 31-августка чейин жабылганы белгилүү болду.
Бул шаар Украинанын чек арасынан 800 чакырым алыстыкта жайгашкан. Аймактын губернатору шаршембиге караган түнү чабуул болгонун ырастады жана анын кесепети такталып жатканын билдирди.
Орусиянын Коргоо министрлиги 30-августка караган түнү Москва шаарына, Калуга, Рязань, Брянск облустарына жана аннексияланган Севастополго дагы дрондор менен чабуул болгонун, анын айрымдары атып түшүрүлгөнүн билдирди. Москвадагы "Внуково" жана "Домодедово" аэропорттору кайра жабылды.
Москванын мэри Сергей Собянин шаарды көздөй учурулган дрондор жок кылынганын, баштапкы маалыматка ылайык жараат алгандар, жабыркагандар жоктугун билдирди.
Соңку кездери Орусия Украина менен чектеш аймактары такай чабуулга кабылып жатканын маалымдап, буга байланыштуу Украинаны күнөөлөп келет. Киев буга байланыштуу адатта комментарий бербейт.