Орусия абадан коргонуу системасын Куриль аралдарынан алып кеткенин "Майнити симбун" жапон басылмасы жазды. Орусия системаны украин дрондору чабуул койгондо абадан коргонуу күчтөрү жетишпей жаткандан улам алып кетиши мүмкүн.
Басылма Итуруп жана Кунашир аралдарын Maxar Technologies компаниясынын спутниктери космостон тарткан сүрөттөрдү изилдеген Токио университетинин окутуучусу Ю Коидзумиге шилтеме берген.
Орусия С-300 ракеталык комплексин Итуруптагы Касатка жана Кунаширдеги Түштүк-Куриль аймагындагы булуңга 2020-жылы жайгаштырган. 2022-жылы тартылган сүрөттө ал жерде ракета менен атылуучу транспорттук жабдууларды, радар жана башка жабдыктарды көрүүгө болот. Коидзуми азыр алар жок экенин айтууда.
Ракеталык комплекстер Украинага жакын аймактарга жеткирилиши мүмкүн. Коидзуми Сахалин аралынын түштүгүндөгү аскердик базадагы эски танк жана гаубицалар ремонттон өткөндөн кийин Украинага жеткирилиши мүмкүн деген божомолду айткан.
Москва облусунда Люберцы шаарына жакын жерде дрон атып түшүрүлдү. Жергиликтүү аэропорттордо учууга чектөө кирди. Учкучсуз учак Курс облусундагы Курчатов шаарына чабуул койгонун жергиликтүү бийлик кабарлады. Ал жерде Курск атомдук электростанциясы жайгашкан. Административдик имарат жабыр тарткан. Москванын аэропортторунда чектөө киргизилди.
Псков облусунда дрондордун чабуулуна аскердик аэродром да кабылып, абадан коргонуу күчтөрү иштеди. Бийликтер "белгисиз объекттер зыянсыздандырылганын" билдирди.
Украинанын армиясы Бахмут жана Мелитополь багытында чабуулду улантууда. Запорожье облусунда украин аскерлери турумун бекемдей баштаганы маалымдалды. Ал эми Москва аннексияланган Крымда украин ракетасын атып түшүргөнүн айтса, Киев бейшембиге караган түнү баш калаага багытталган чабуулдун мизи кайтарылганын билдирди. Ал тапта украин өкмөтү согуш шартында да билим берүүнү токтотпош үчүн окуучуларга метро-станцияларда класстарды ачып жатат.
Москва жана Пхеньян активдүү сүйлөшүү жүргүзүүдө. Сүйлөшүүнүн максаты - Орусия түндүк кореялык каруу-жаракты жана ок-дарыны алгысы келет. Бул тууралуу шаршембиде Ак үйдүн өкүлү Жон Кирби америкалык чалгын кызматына таянып билдирди.
Кирбинин айтымында, каруу-жарак жеткирүү Орусиянын коргоо министри Сергей Шойгу ушул жылдын июль айында Пхеньянга иш сапар менен барганда талкууланган. Ак үйдүн өкүлү Орусияга курал сатуу БУУнун Коопсуздук кеңешинин резолюциясын бузууга жатарын, Түндүк Корея бир канча жолу Москвага курал жеткирүү ниети жок экенин айтканын эске салды.
Март айында Ак үй Москва Пхеньянга курал-жаракты азык-түлүккө айырбаштоону сунуштаганга аракет кылганын билдирген.