Орусиянын армиясы 4-сентябрга караган түнү Украинанын Одесса облусуна учкучсуз аппараттар жана «Калибр» ракеталары менен чабуул койду. Аткылоого жарандык инфратүзүмдөр кабылып, эки киши жаракат алганы кабарланды. Жергиликтүү бийлик билдиргендей, 17 «Шахед» дрону атып түшүрүлдү.
Одесса облустук аскердик администрациясынын башчысы Олег Кипер ушуну менен орус армиясы соңку бир апта ичинде төртүнчү жолу чабуул коюп жатканын билдирди.
«Тилекке каршы Одесса облусундагы агроишканалардын бириндеги дан терминалдарына сокку урулду. 100 тонна буурчак жана 20 миң тонна арпа жок кылынды», -деп жазды Кипер Телеграмга.
Жардыруулардын үнү Измаил портунда да угулду. Жергиликтүү бийлик тургундарды жер төлөлөрдө калууга чакырды.
Ал эми 4-сентябрдын таңында дрондордун чабуулуна Днепропетров облусу кабылды. Аймак башчысы Сергей Лысак билдиргендей, алты учкучсуз аппарат абадан кулатылды.
Орусия украин данын Кара деңиз аркылуу экспорттоого жол берген келишимден июль айында чыккандан бери күн алыс Одесса облусун аткылап, дан кампаларын бутага алып келет.
2022-жылдын февраль айынын соңунан бери Украина эл аралык өнөктөштөрүнөн 100 миллиард доллардын тегерегинде аскердик жардам алды. Бул тууралуу Украинанын кызматтан кетип жаткан коргоо министри Алексей Резников “Укринформ” маалымат агенттигине берген интервьюсунда айтты.
Ал сөз курал-жарактар, техникалар, снаряддар жана ок-дарылар тууралуу болуп жатканын жана Украинага көрсөтүлгөн жардамдын 60 миллиард долларга жакыны Америка Кошмо Штаттарына туура келерин билдирди.
Киев Батыш өлкөлөрүнөн куралдын жаңы түрлөрүн, анын ичинде орто аралыкка учуучу ракеталарды жана учактарды сурап жатат.
Украинанын өнөктөштөрү берген аскердик жардам Орусиянын армиясынын бир жылдык чыгымынан эки эсе көп. Бул мамлекеттин аскердик бюджети болжол менен 43,5 миллиард долларды түзөт.
Украинанын президенти Владимир Зеленский контрчабуул боюнча айтылып жаткан сындарга жооп берип, украин аскерлери эч нерсеге карабастан алдыга жылып кетип баратышканын билдирди. 2-сентябрда Telegram каналына жарыялаган билдирүүсүндө ал «Украин күчтөрү алдыга кетип баратат. Эч нерсеге карабастан, ким эмне десе да, биз илгерилеп баратабыз. Бул эң негизгиси» деп айтты.
Анын алдында АКШнын өзүн ачык атагысы келбеген айрым расмий адамдары Киевди үч айдан бери Батыштын аскердик техникасы жана окутуп, үйрөткөн жардамына карабастан Орусия басып алган аймактарды кайтаруу боюнча контрчабуулу жакшы жүрбөй жатканын айтып сындашканы белгилүү болгон.
Бирок АКШнын жана Улуу Британиянын расмий өкүлдөрү Украинанын түштүк-чыгышында ийгилик бар экенин, аскерлер Орусиянын катуу бекемделген коргонуу тилкесин бузуп жатышканын билдирүүдө.
1-сентябрда Ак үйдүн улуттук коопсуздук боюнча өкүлү Жон Кирби “Алар Орусиянын экинчи коргонуу тилкесине каршы ийгиликтерге жетишүүдө” деп, “Контрчабуулга объективдүү көз караш менен байкоо жүргүзгөн ким болбосун, алар прогресске жетишкенин тана албайт. Анонимдүү чиновниктердин айтканы эч нерсеге татыбайт” деп кошумчалаган.
2-сентябрда Улуу Британиянын Коргоо министрлиги чалгын маалыматына таянып украиналыктар түштүк тарапта Орусиянын негизги коргонуу тилкесине жетип калышканын маалымдаган.
3-сентябрга караган түнү орусиялык аскерлер Украинанын түштүгүндөгү Одесса облусуна учкучсуз учактар менен жапырт чабуул жасаганын украин тарап билдирди. Жалпысынан чабуулга 25 "Шахед" учагы катышканы, алардын 22син атып түшүрүүгө үлгүрүшкөнүн Украинанын Аскердик-аба күчтөрүнүн башкы командачылыгы маалымдады.
Жээктеги порттордун биринин инфраструктурасы жабыркап, өрт чыкканы, ал дароо өчүрүлгөнү, эки жай тургун жараат алганы, аларга медициналык жардам көрсөтүлгөнү кабарланды.
Башка облустардын да жетекчилери өткөн түнү Орусиянын чабуулуна кабылганын билдирип жатышат. Алардын айтымында, Херсон облусунда бир адамдын өмүрү кыйылды, алты адам жараат алды. Донецк облусунда эки адам каза болду, дагы эки адам жараат алды.
2022-жылдын 24-февралында кол салган Орусия соңку күндөрү Украинанын аймактарын күн сайын аткылоодо. Коргоо министрлиги аскердик гана объектилерди бутага алып жатканын айтып, миңдеген жай тургундардын өлүмүнө комментарий бербей келет.