Британ өкмөтү орусиялык "Вагнер" менчик аскердик компаниясын жакын арада террордук уюм деп тааныйт. Бул тууралуу 6-сентябрда Улуу Британиянын Ички иштер министрлиги билдирди.
13-сентябрдан тарта күчүнө кирет деп күтүлүп жаткан чечимге ылайык, "Вагнерди" колдоо, анын символун коомдук жайларда көрсөтүү кылмыш катары каралат. Ага баш ийбегендер камакка алынат.
Ички иштер министри Суэлла Браверман "Вагнер" тобун “ырайымсыз жана кыйратуучу” деп атап, ал Владимир Путин жетектеген Орусиянын куралы катары чет өлкөлөрдө иш жүргүзүп жатканын белгиледи.
"Украинада, Жакынкы Чыгышта жана Африкада "Вагнердин" жалданма аскерлери талап-тоноого, кыйноого жана ырайымыз адам өлтүрүүгө катышкан”, - деп айтылат министрликтин билдирүүсүндө.
“Вагнер” жеке менчик аскер компаниясын Евгений Пригожин жана Дмитрий Уткин негиздеген. Сирияда бул топтун жалданмалары өзгөчө мыкаачылыгы, дагы башка толгон аскердик кылмыштары аркылуу таанылган. Орусиянын Украинадагы согушуна жоочуларды жалдаган.
Пригожин менен Уткин бараткан учак 23-августта Тверде кулап, мүрт кетишкен. "Вагнердин" аскерлери уюмдун ишмердиги улана берерин билдиришкен.
Орусиянын президенти Владимир Путин аталган компания өкмөттөн каржыланып келгенин айткан.
Шаршембиге караган түнү Украинада жапырт абадан эскертүү жарыяланды.
Киев шаардык аскер башкармалыгынын башчысы Сергей Попко Украинанын борборуна орус күчтөрү ракеталык чабуул койгонун, баарынын мизи кайтарылганын билдирди.
Баштапкы маалыматтарга караганда, ракеталар Ту-95МС стратегиялык учактарынан атылган.
Баш калаада жабыркагандар жана кыйроолор жок. Киев облусунда ракетанын сыныктары кулап түшкөн соода ишканасынын аймагында өрт чыкты.
Одесса облусуна дээрлик үч саат бою орусиялык учкучсуз учактар чабуул койгону кабарланды. Бир адам каза болгонун облустук аскердик администрациясынын башчысы Олег Кипер билдирди.
Анын айтымында, бир нече конуштарда кыйроолор бар. Порттогу кеңсе имараттары, айыл чарба ишканалары зыян тартты.
Херсон облусун аткылоодо үч киши жараат алганын облустук аскердик админстрациянын башчысы Александр Прокудин маалымдады.
Куралдуу күчтөрдүн Башкы штабы билдиргендей, бир сутка ичинде орус армиясы Украинанын аймагына 40 жолу абадан сокку уруп, бир нече ракеталык системадан 51 жолу аткылады. Москва буга комментарий берген жок.
Орусиянын Брянск облусунун губернатору Александр Богомаз шаршембиде Украинанын учкучсуз учагы Навлинский районунун үстүнөн атып түшүрүлгөнүн жарыялады. Анын айтымында, жабыркагандар жана кыйроолор болгон жок. Киев бул тууралуу комментарий бере элек.
Украинанын Жогорку Радасы Алексей Резниковдун коргоо министри кызматынан кетүү тууралуу арызын колдоду. Бул тууралуу шейшембиде депутат Ярослав Железняк билдирди.
4-сентябрда Резников кызматтан кетүү тууралуу Жогорку Радага кайрылганын билдирип, Фейсбукка арызынын сүрөтүн жарыялаган. Ушул эле күнү анын отставкасын парламенттин Улуттук коопсуздук, коргоо жана чалгындоо комитети кабыл алган.
Президент Владимир Зеленский бир күн мурунку кайрылуусунда коргоо министрин алмаштыруу чечимин кабыл алганын айтып, Резниковдун ордуна крым татары, мурдагы депутат Рустем Умеровду сунуштаган.
Буга чейин Коргоо министрлигинин айланасында талаш жаралган. Жыл башында министрлик "украин армиясынын арткы бөлүктөрүнө азык-түлүктү базар баасынан эки-үч эсе кымбат сатып алды" деп сынга кабылган. Бир канча чиновник иштен кеткен.
Коргоо министрлигин 2021-жылдын ноябрынан бери жетектеп келген Александр Резников курал-жарак жеткирүү боюнча эл аралык сүйлөшүүлөргө катышкан. Ал кызматтан кеткенден кийин Украинанын Британиядагы элчиси болот деген маалымат бар.
Орус армиясы акыркы бир суткада Украинанын Запорожье облусундагы 26 шаар жана кыштакка 88 жолу сокку урду.
Бул тууралуу 5-сентбярда эртең менен облустук аскер администрациясынын башчысы Юрий Малашко билдирди. Жергиликтүү бийлик аткылоодо Малая Токмачка айылында 74 жаштагы аял каза болгонун, 47 турак жай талкаланганын маалымдады.
Орехово, Преображенец, Степногорск, Новодаровка, Малый Щербак, Степное калктуу конуштары 80 жолу артиллериялык чабуулга, дрон соккуларына кабылганы айтылууда.
Шейшембиде расмий маалыматтарда Донецк облусундагы чабуулдарда эки жайкын тургун жараат алганы, Херсондогу калктуу конуштарга сокку урулганы айтылат.
Харьков облусунун башчысы Олег Синегубов эки авиабомба Изюм жана Чернещина райондорунда балдар бакчасы менен мектепти талкалаганын билдирди.
Москванын мэри кайра үч дрон атып түшүрүлгөнүн билдирди
Далилдерге карабай Орусия Украинанын калктуу конуштарына чабуул коюлганын моюнга албайт жана аскердик объектилерге гана сокку урулуп жатканын белгилейт.
5-сентябрга караган түнү жана эртең менен Москвага чабуул коюуга аракет кылган үч дрон атып түшүрүлгөнүн калаанын мэри Сергей Собянин билдирди.
Бир учкучсуз аппарат Калуга облусунда, экинчиси Москва облусунун Истра районунда жок кылынган. Истранын жергиликтүү бийлиги бир чарбалык имарат күйүп кеткенин маалымдады.
Үчүнчү дрон Тверь облусунун Завидово районунда президент Владимир Путиндин резиденцияларынын бири жайгашкан аймакта атып түшүрүлгөн. Тверь облусунун губернатору Игорь Руденя жабыркагандар жоктугун айтты.
Кийинчерээк Орусиянын Коргоо министрлиги дрондор чабуулун тастыктады.
Түндө жана эртең менен Москванын аэропортторунда 50дөн ашык рейс убактылуу токтотулуп, кайра жанданды.
РБК агенттигинин эсебинде Кремль Украинага ачкандан бери Орусиянын аймагына 500дөн ашуун дрон чабуулу болду. Москва бул үчүн Киевди күнөөлөйт. Украина расмий комментарий бере элек.