Литвада дрон коркунучунан улам айгай жарыяланды

Украинанын контрчабуулу кандай жүрүүдө?

Орусиянын Украинага толук кандуу согуш ачканына 18 ай болду. Украин күчтөрү үч ай мурда орус армиясы ээлеп алган аймактарды бошотууга киришти. Бул убакыт ичинде украин аскерлери бир катар тоскоолдуктарга туш болушту, ал эми айрым батыш аткаминерлери контрчабуул жай жүрүп жатканын сынга алууга үлгүрүштү. Анткен менен азыр украин армиясы контрчабуулда чоң секирик жасачудай болуп турат.

Запорожье облусундагы Работино жана Вербовое айылдарынын ортосундагы айдоо талаасы артиллериялык снаряддардан оюлуп-казылып калган.

Бул талаада азыр катары менен жер төлөлөр (траншеялар) казылып, үч бурчтуу бетондон жасалган блоктор коюлган. Аларды "ажыдаардын тиштери" деп коюшат. Андан тышкары көп сандагы миналар көмүлгөн. Бул үч баскычтан турган коргонуу системасы орусиялык генерал Сергей Суровикиндин буйругу менен курулгандыктан "Суровикиндин сызыктары" деген атка конгон.

Контрчабуул башталган үч айдан кийин украин армиясы Запорожье облусундагы Орехово шаарынын жанындагы кармашта алдыга карай секирик жасап, "Суровикиндин сызыктарын" жырып өтүүгө даяр экени кабарланууда.

Эгер украин аскерлери бул секирикти жасай алса, Вербовой калктуу конушун алып, андан ары Ореховодон Работиного бараткан жолду ээлеп, олуттуу тоскоолдуктардан өтүү менен тогуз жолдун тоомунда жайгашкан, темир жол түйүнү бар Токмак шаарына карай багыт алышмак.

Ал жакка көзөмөл орноткон соң "крымдын дарбазасы" делген ири Мелитополь шаарын бошотуп, Крым жарым аралын Запорожье облусу менен байланыштырган кан жолду ээлешет.

"Азыр украин аскерлери душмандын коргонуусунун биринчи баскычынан эле өтүп токтобой, экинчи баскычтын ичинде кармаштар жүрүп жатат. Орус командачылыгы кармаштын куну кандай болорун жакшы билет. Ошондуктан Токмак үчүн салгылаш оор болот. Алар болгон такоолдогу күчтөрүн ошол жакка салышты. Азыр кимдин такоолу биринчи бүтөт деген суроо турат. Бул чабуулда биз дагы, орустар дагы чоң жоготууларга учурап жатат", - дейт "Айдар" батальонунун мурдагы офицери Евгений Дикий.

Польшалык аскер аналитиги Мацей Коровайдын айтымында, орус армиясы контрчабуулдан жана Запорожьеде көзөмөлдүн жоктугунан кооптонуп турушат.

"Украина чап, бас, ачарчылыкка кепте деген принцип менен согушуп жатат. Дал ушул украин тактикасынан орустар коркуп, каршы турууга аракет кылышууда", - дейт ал.

The Guardian басылмасында 2-сентябрда жарык көргөн маекте украиналык генерал Александр Тарнавский анын аскерлери Работинонун жанында "Суровикиндин сызыктарынын" алгачкы баскычтарын жырып өткөнүн билдирди.

"Душман бир гана Украинадагы эмес, Орусиядагы резервдерин да тартып жатат. Бирок эртеби-кечпи орустардын мыкты жоокерлери калбайт. Бул бизге ыкчамыраак чабуул койгонго шарт түзөт. Баары алдыда", - дейт Тарнавский.

Украин аскерлеринин ийгиликтери тууралуу кабарларды спутниктен алынган сүрөттөр жана ачык булактардан алынган маалыматтар ырастайт. Орусиялык аскердик блогерлер да Киевдин фронттогу ийгиликти белгилеп жатышат.

Бир нече айга созулган даярдыктан кийин украин армиясы 5-июнда 1200 чакырымга созулган фронт тилкесинин үч жеринде контрчабуулун баштаган.

Украин жоокерлери орус күчтөрүнүн коргонуусун жырып өтүүдө Батыш берген техника жардам берерине үмүттөнүшкөн. Анткен менен контрчабуул башталган бир нече күндөн кийин украин аскерлери "Суровикиндин сызыктарына" туш болушту. Аларды Орусия бир нече ай бою курган.

Андан бери контрчабуулдун ыргагы сезилерлик төмөндөдү. Украин аскерлери шашпай, акырындан айыл-кыштактарды бошотуп келатышат. "Болжол менен ар беш күндө 700-1200 метр алдыга жылууда" деп жазылат маалыматтардын биринде.

Ореховодон 100 чакырым түндүк-чыгыштагы Мокрые Ялы дарыясынын жээгиндеги эки айылды украин аскерлери үч жумадан ашуун убакытта өз карамагына алууга жетишти.

Баш кеңсеси Вашингтондо жайгашкан Согушту иликтөө инситутунун аналитиктеринин жана башка эксперттердин айтымында, 4-5 сентябрь күндөрү украин аскерлери Вербовой айылы тарапта жок дегенде "Суровикиндин сызыктарынын" бирин жырып өтүштү.

АКШнын мамлекеттик катчысы Энтони Блинкен Америка Кошмо Штаттары Украинага 1 миллиард долларга чейин жаңы жардам топтомун берерин билдирди.

Украинанын тышкы иштер министри Дмитрий Кулеба менен болгон брифингде ал пакеттин 665 миллион доллардан ашыгы аскердик жана жарандык коопсуздук үчүн жумшаларын айтты.

"Жалпысынан, орус агрессиясы башталгандан бери биз коопсуздукту камсыздоого 43 миллиард доллардан ашык каражат бөлдүк", - деди Блинкен.

Энтони Блинкен мурда жарыяланбаган сапар менен Киевге 6-сентябрда келди. Анын алдында Украинанын баш калаасы жана Киев облусу Орусиянын ракеталык чабуулуна туш болду.

Блинкен Украинага акыркы жолу 2022-жылдын сентябрында келип кеткен.

Орус армиясы акыркы бир суткада Украинанын бир канча аймагын аткылады. Запорожье облусунда 68 жаштагы пенсионер соккудан набыт болгонун аймактын башчысы Юрий Малашко билдирди. Ал баллистикалык курал менен чабуул жасалганын, зыяндын көлөмү такталып жатканын Телеграмга жазды.

Одесса ооблустук аскердик администрациянын башчысы Олег Кипер аймакты бир нече саат бою "Шахед" жанкечти дрондору бутага алганын, бир адам жарадар болуп, калктуу конуштардагы турак-жай, имараттар зыян тартканын кабарлады.

Украин армиясы бейшембиге караган түнү Сумы облусуна да чабуул коюлганын, 33 дрондун 25и кулатылганын билдирди. Андан тышкары, Харьков облусу да аткыланып, онго жакын турак жай зыянга учурады.

Бир күн мурун Донецк облусунун Константиновка шаарындагы борбордук базар бутага алынганда 16 адам өлүп, 30дан көбү жарадар болгон.

Москва бул чабуулдарга комментарий бере элек.

Орусиянын бир катар аймактарынын бийликтери да 7-сентябрга караган түнү учкучсуз учактар чабуул жасаганын кабарлашты. Ростов облусунда мизи кайтарылган дрон Ростов-на-Дону шаарынын борбордук бөлүгүнө, президент Владимир Путин жана коргоо министри Сергей Шойгу дайыма келип турган Түштүк аскер округунун штабынын жанына кулаганын губернатор Василий Голубев билдирди. Ал бир киши жараат алганын, бирок ооруканага баруудан баш тартканын, автоунаалар, имараттардын тосмолору зыян тартканын белгиледи.

Москванын мэри Сергей Собянин Раменский шаарчасында дрон атып түшүрүлгөнүн маалымдады. Mash Телеграм каналы учкучсуз аппараттын сыныктары Жуковский аэропортуна жакын жерге кулаганын жазды.

Брянск облусунун губернатору Александр Богомаз үч дрондун мизи кайтарылганын, алардын бири Брянск шаарынын борборуна кулаганын айтты.

Кремль дрон чабуулдары үчүн Киевди күнөөлөйт. Украин бийлиги комментарий бербейт.

Украин башкалаасы кайрадан соккуга кабылгандан кийин ал жерге АКШнын мамлекеттик катчысы Энтони Блинкен барды. Киевден тышкары шаршембиге караган түнү Одесса да аткыланды. Бир күн мурда украин президенти Владимир Зеленский майдандагы жоокерлер менен жолугушуп келди.

Киев аткылангандан көп узабай ал жерге барган АКШнын мамлекеттик катчысы Энтони Блинкен Вашингтон Украинанын контрчабуулун мындан ары да колдой турганына ишендирди:

"Украин армиясынын контрчабуулунда ийгиликтерди байкап атабыз. Бул абдан кыйын иш. Биз Украинанын контрчабуулу ийгиликтүү болушу үчүн гана эмес, узак мөөнөттүү келечектеги бардык муктаждыктарын канааттандыруу, өлкөнүн коргонуу дараметин чыңдоо менен болочокто мындай агрессиялардын кайталанбашы үчүн да болгон аракетибизди жумшайбыз".

Мамлекеттик департамент Блинкендин сапары “АКШ Украинанын эгемендигин, аймактык бүтүндүгүн жана демократияны, өзгөчө орусиялык агрессиянын тушунда жактай турганын көргөзүүнү көздөйт" деп билдирди.

Атын атабаган америкалык расмий адамдар Associated Press агенттигине жана CNN телеканалына буга чейин маалымдагандай, Блинкен 175-200 миллион долларлык аскердик жардамдын жаңы топтомун жарыялаары күтүлүүдө.

Украин баш калаасында Блинкен Даниянын премьер-министри Метте Фредериксен менен кездешти. АКШнын тышкы саясий мекемеси башкы дипломат ага украиналык учкучтарды F-16s учактарын башкарууга машыктыруу жана Киевге согуш учактарын берүү сунушу үчүн ыраазычылыгын айтканын кошумчалады.

Украин парламентинде сүйлөгөн премьер украиналыктарга кайрылып, “сиздердин күрөш – биздин күрөш" деп билдирди.

Москва согуш ачкан былтыркы февралдан бери Блинкен ушуну менен Украинага төртүнчү жолу барды.

Түнкү чабуулдар

Мунун алдында, 6-сентябрда Киевдин аскердик администрациясынын башчысы Сергей Попко орус аскерлери украин баш калаасына ракеталардын бир нече түрүнөн сокку урушканын, Ту-95МС учактарынан атылган ракеталарды Абадан коргонуу системасы жок кылганын айтты. Попко борбор шаардын өзүндө курман болгондор жана кыйроолор болбогонун кошумчалады. Ал эми Киев облусунда ракетанын сыныктары кулаганда соода борборунун аймагында өрт тутанды.

Одесса облусуна дээрлик 3 саат бою орусиялык согуштук дрондор чабуул коюшту. Аймактык администрациянын жетекчиси Олег Кипер бир киши каза тапканын, бир нече айыл-кыштакта кыйроолор жана өрт катталганын маалымдады. Кипер кошумчалагандай, бир нече жерде порт жана айыл чарба инфраструктурасы – элеватор, административдик имараттар, ишканалар зыянга учурады.

Украинанын Куралдуу күчтөрүнүн Башкы штабы шейшембиден шаршембиге чейин Орусия абадан 40 жолу сооку урганын жана 51 жолу өлкө аймагын реактивдүү системалардан аткылаганын билдирди. Украин армиясынын аба күчтөрүнүн маалыматына ылайык, өткөн түнү каршы тарап 33 ракета жана учкучсуз учактардан, анын ичинен "Искандер-М" баллистикалык ракетасынан сокку урду, абадан коргонуу системасы бардык ракеталарды жана 25 дронду атып түшүрдү.

Орусиянын өкүлдөрү түнкү чабуулду комментарийлеген жок.

Москва кол салгандан бери Киев жарандык жайлар бутага алынганын айтып келатат. Орусия муну танууда.

Брянск облусунун губернатору Александр Богомаз Навлин районунда украиналык дрон атып түшүрүлгөнүн, жабыркагандар жана кыйроолор болбогонун билдирди.

Зеленский: жоокерлердин суроо-талаптары аткарылат

Бир күн мурда кечинде Украинанын президенти Владимир Зеленский Донбасс жана Запорожье аймактарынан кайтып келди.

"Жарадар болгондон кийин позицияларына, майдандагы үзөңгүлөштөрүнө кайтып барган жоокерлерибиз менен сыймыктанабыз. Жоокерлерибиздин мүдөөлөрү, суроо-талаптары жөнүндө жогорку генералдарды, өкмөт мүчөлөрүн жана тышкы өнөктөштөрдү кабардар кылам. Армияны керектүү нерселер менен камсыздайбыз, эң негизгиси, курал-жаракты өзүбүз чыгара баштайбыз. Аскерлерге тиешелүү бир катар артыкчылыктуу багыттарды аныктадык. Мунун бардыгын ишке ашыруу зарыл. Биз бул иштин өтөсүнө чыгабыз", - деп айтты президент майдандагы 13-бригаданын аскерлери менен жолугушкандан кийин.

Украин армиясынын Башкы штабы 5-сентябрда 20 салгылашуу жүргөнүн билдирген.

Ошол эле күнү Зеленский Донецк облусунун губернатору Павел Кириленкону кызматынан алуу тууралуу буйрукка кол койду. Өлкөдө коргоо министри да алмашты.

Жакында аты аталбаган америкалык расмий адамдардын бири украин аскерлеринин контрчабуулу жай жүрүп жатканын айтып, түндүк-чыгыш багытындагы тактика "канчалык ийгиликтүү болууда?" деген собол салган.

Ошол эле маалда ал түштүк-чыгыш аймагында алга жылуу байкалганын белгилеген. Кийинчерээк Вашингтон сын айтуу “жардам бербесин”, АКШ Киевдин аскердик “ийгилигин” байкаганын билдирди.