Орусиянын армиясы 11-сентябрга караган түнү эки ирет Украинанын Кривой Рог шаарын аткылады. Таңкы саат 4кө жакын калаада коркунуч тууралуу эскертүүнүн добушу жаңырды. Украинанын Куралдуу күчтөрүнүн башкы штабы билдиргендей, шаарга алгач канаттуу ракеталар, кийин учкучсуз аппараттар менен чабуул коюлду.
Украинанын президенти Владимир Зеленскийдин кичи мекени саналган Кривой Рог шаарына 8-сентябрда жасалган орус армиясынын аба чабуулунан ондогон адам жаракат алып, бир кишинин өмүрү кыйылган.
Жалпысынан 11-сентябрга караган түнү орус армиясы Украинанын аймагына беш ракеталык жана 26 жанкечти-дрон менен сокку урганын, алардын көбү абадан жок кылынганын Башкы штаб билдирди.
Соңку бир аптада украин армиясы өлкө чыгышындагы Бахмут шаарынын жанындагы эки чарчы чакырым аймакты орус күчтөрүнөн бошотконун дүйшөмбүдө коргоо министринин орун басары Анна Маляр билдирди. Ал ошондой эле украин жоокерлери Авдеевка шаарынын түштүгүндөгү Опытное айылынын жарымын өзүлөрүнө кайтарганын кошумчалады.
Ал эми Орусиянын Коргоо министрлиги 11-сентябрга караган түнү Белгород облусунда дрондор атып түшүрүлгөнүн билдирди.
Аймак губернатору Вячеслав Гладков эки дрон абадан кулатылганын, эч ким жабыркабаганын маалымдады. Учкучсуз аппараттардын сыныгы жайкын тургундар жашаган үйдүн жанына кулаганы кабарланды.
Согуш маалында тараптардын билдирүүлөрүн көз карандысыз булактардан ырастоо мүмкүн эмес.
Украинанын куралдуу күчтөрү Авдеевканын жанындагы Опытное айылынын бир бөлүгүн көзөмөлгө алганын кабарлады. Бул тууралуу Авдеевканын шаардык аскер администрациясынын башчысы Виталий Барабаш билдирди. Анын айтымында, Опытное айылын бошотуу үчүн салгылашуулар уланууда.
Барабаш белгилегендей, Авдеевканын түндүгүндөгү аймактарда кырдаал курч бойдон калууда. Орусиянын армиясы ал жерде чабуулдарын токтотпой жатат.
Орусия Украинага бастырып киргенден бери Опытное айылы согуш майданындагы очоктордун бири болуп калды. 2022-жылдын ноябрында анын басымдуу бөлүгү оккупацияланган, бирок анын чет жакасында салгылашуулар уланып жаткан эле.
Украинанын Донецк облусунда Road to Relief деген гуманитардык уюмунун машинеси аткыланганда чет элдик эки жаран окко учту. Бул тууралуу уюм жана испаниялык El Mundo гезити жекшембиде билдирди.
Road to Relief тараткан маалыматка ылайык, чет өлкөлүк төрт жаран отурган автоунааны Часов Яр деген жерде орусиялык аскерлер аткылаган. Славянск шаарынан Бахмутка бараткан автоунаага дүрмөт тийгенде ал аңтарылып кетип, күйүп кеткен. Уюм окуяга байланыштуу маалымат чогултуп жатканын коушмчалады. Орусия тарап комментарий бере элек.
Маалыматка караганда, канадалык Энтони Игнат жана Испаниянын жараны Эмма Игуаль каза тапты. Оор жараат алган дагы эки ыктыярчы-медицина кызматкерлери – Германия жана Швециянын жарандары ооруканага жеткирилди.
Road to Relief уюму былтыркы марттан бери иштеп келатат. Би-Би-Си жазгандай, ыктыярчылар майдан тилкесиндеги украин айылдарына гуманитардык жардам жеткирүү жана салгылашуулар жүргөн жерлерден калкты көчүрүү менен алектенет.
НАТОнун мүчөсү Румыниянын аймагында бир жумада экинчи жолу орусиялык дрондун сыныктары табылды.
«Азаттыктын» румын редакциясы маалымдагандай, сыныктар Орусия Украинанын Одесса облусуна сокку ургандан кийин түшкөн болушу ыктымал.
Украина менен чектеш айылдардын тургундары орусиялык учкучсуз учактар тууралуу даттанганда жергиликтүү бийлик убактылуу эвакуацияны сунуш кылганын Digi-24 каналы буга чейин кабарлаган.
Президент Клаус Йоханнис Орусиянын мындай аракети кабыл алынгыс экенин, өлкөнүн суверендүү аба мейкиндигин бузуп жатканын эскертти. Президент Украинанын калкына жана жарандык жайларга, анын ичинде чек аралаш райондорго коюлган чабуулдарды согуш кылмышы деп эсептей турганын кошумчалады.
Румын мамлекет башчысы Орусиянын соккулары өлкө жашоочуларына коркунуч жаратарын, маселе НАТОнун жетекчиси Йенс Столтенберг менен талкууланганын билдирди. Баш катчы Бухарест менен тилектеш экенин бышыктады.
Столтенбергдин X социалдык тармакка жазганына караганда, орусиялык дрондор Румыниянын аймагына атайлап учурулган деген далилдер жок, бирок ал соккулар кырдаалды туруксуз кылууда. Ал ошондой эле чек араны көзөмөлдөө үчүн F-16 учактарын жөнөтүү боюнча АКШнын буга чейинки чечимин кубаттады.
Румыниянын аймагына Орусиянын согуштук жабдыктарынын сыныктары түшкөнүн Бухарест 6-сентябрда биринчи жолу моюнга алган. Коргоо министрлиги жаңы калдыктар ошол эле дронго таандык деп болжолдоп, ошол эле маалда алар бири-биринен алыс жерлерде табылганын да белгилейт.