Орусиянын күчтөрү Украинанын Запорожье облусун аткылаганда 27 айыл жарыксыз калганын Энергетика министрлиги 12-сентябрда билдирди. Жылуулук электр станциясындагы бир блок иштен чыкканы айтылууда.
Ошол эле учурда адистер өндүрүлгөн электр энергиясы керектөөчүлөрдүн муктаждыктарын канааттандырууга жетиштүү экенин белгилешүүдө.
Андан тышкары, Донецк, Харьков, Херсон, Сумы жана Чернигов облустарындагы айрым кыштактарда да электр энергиясы өчүп калды. Бригадалар бузулган станцияларды оңдоп жатканын "Азаттыктын" украин кызматы жазды. Херсондогу аткылоолор энергетиктер ишине тоскоолдук жаратууда.
2022-жылдын 10-октябрынан тарта орус армиясы Украинанын маанилүү энергетикалык инфраструктурасын аткылай баштаган. Натыйжада үйлөргө жарык жетишпей маселе жаралган.
2023-жылдын мартында Орусия энергетика тармагына чабуулдарын азайтып, Украина бузулган шаймандарды калыбына келтире баштаган.
АКШнын Мамлекеттик департаменти: Путин менен Ким Чен Ын курал-жарак жеткирүүнү макулдашса, Вашингтон жаңы санкцияларды киргизет.
Түндүк Кореянын башчысы Ким Чен Ындын чопкутталган поезди Орусиянын аймагына кирип, Владивостокту көздөй кетип баратканы кабарланды.
РИА Новости билдиргендей, Ким Чен Ын Владивостоктогу Чыгыш экономикалык форумунун алкагында орус президенти Владимир Путин менен жолугушат.
Кездешүү качан болору так белгисиз.
АКШ Ким менен Путин Орусиянын армиясы үчүн Түндүк Кореядан ок-дары жеткирүү маселесин талкуулайт деп эсептейт.
Орусиянын армиясы 11-сентябрга караган түнү эки ирет Украинанын Кривой Рог шаарын аткылады. Таңкы саат 4кө жакын калаада коркунуч тууралуу эскертүүнүн добушу жаңырды. Украинанын Куралдуу күчтөрүнүн башкы штабы билдиргендей, шаарга алгач канаттуу ракеталар, кийин учкучсуз аппараттар менен чабуул коюлду.
Украинанын президенти Владимир Зеленскийдин кичи мекени саналган Кривой Рог шаарына 8-сентябрда жасалган орус армиясынын аба чабуулунан ондогон адам жаракат алып, бир кишинин өмүрү кыйылган.
Жалпысынан 11-сентябрга караган түнү орус армиясы Украинанын аймагына беш ракеталык жана 26 жанкечти-дрон менен сокку урганын, алардын көбү абадан жок кылынганын Башкы штаб билдирди.
Соңку бир аптада украин армиясы өлкө чыгышындагы Бахмут шаарынын жанындагы эки чарчы чакырым аймакты орус күчтөрүнөн бошотконун дүйшөмбүдө коргоо министринин орун басары Анна Маляр билдирди. Ал ошондой эле украин жоокерлери Авдеевка шаарынын түштүгүндөгү Опытное айылынын жарымын өзүлөрүнө кайтарганын кошумчалады.
Ал эми Орусиянын Коргоо министрлиги 11-сентябрга караган түнү Белгород облусунда дрондор атып түшүрүлгөнүн билдирди.
Аймак губернатору Вячеслав Гладков эки дрон абадан кулатылганын, эч ким жабыркабаганын маалымдады. Учкучсуз аппараттардын сыныгы жайкын тургундар жашаган үйдүн жанына кулаганы кабарланды.
Согуш маалында тараптардын билдирүүлөрүн көз карандысыз булактардан ырастоо мүмкүн эмес.