Крым: Севастополдогу Кара деңиз флотунун штабына сокку урулду
Аннексияланган Крымдын Севастопол шаарындагы Кара деңиз флотунун штабына 22-сентябрда ракеталык сокку урулду. Орусиянын Коргоо министрлиги бир аскер мүрт кеткенин кабарлады.
«Ракеталык чабуулдун мизин кайтарууда абадан коргонуу системасы беш ракетаны атып түшүрдү. Кол салуунун жыйынтыгында Кара деңиз флотунун тарыхый штабы жабыркады. Маалыматка караганда, бир аскер мүрт кетти» - деп билдирди мекеме.
Алгач окуя тууралуу кабарлаган Севастополдун Москва дайындаган мэри Михаил Развозжаев Луначарский атындагы драма театрдын жанына «ракетанын сыныгы» түшкөнүн Телеграм-каналга жазды.
Крым.Реалий сайтынын кабарчысы билдиргендей, үч катуу жардыруунун үнү угулган. Жарым аралды Орусия менен байланыштырган негизги Крым көпүрөсүндө кыймыл убактылуу токтотулду.
Украинанын Аба күчтөрүнүн командачылыгынын өкүлү Юрий Игнат Севастополдогу окуя тууралуу «Крымда көптөн бери тынч эмес. Бир жума ичинде эле бир катар кызыктуу окуялар болду. Бардык коргонуу күчтөрү, бардык кызматтар баскынчылар тынч жашоодо өмүр сүрбөшү үчүн бирге колунан келген аракетин жасап жатышат» - деп айтты.
Севастополдогу Кара деңиз флоту буга чейин 31-июлда жана 20-августта дагы дрон чабуулуна кабылган.
Орус армиясы Украинанын Херсон облусуна 21-сентябрга караган түнкү чабуул койгондо үч тургун мерт болуп, бешөө жараат алды. Бул тууралуу Херсон шаарынын аскердик админстрациясынын башчысы Роман Мрочко билдирди. Набыт болгондордун бири - 81 жаштагы аял. Чабуул маалында ал батиринде болгон.
Ички иштер министрлиги орус күчтөрү көп кабаттуу үйлөрдү, автоунаа жана базарды бутага алганын маалымдады.
21-сентябрда эртең менен орус армиясы Украинага жапырт чабуул жасаганы тууралуу эки ирет абадан эскертүү жарыяланды. "Азаттыктын" украин кызматы Черкассы, Харьков, Киевде жарадар болгондор бар экенин кабарлады.
Далилдүү көрсөтмөлөргө карабай, Москва Украинада карапайым калк бутага алынганын моюнга албайт жана аскердик объектилерге гана чабуул коюп жатканын билдирет.
Орусиянын Коргоо министрлиги Кара деңизде жана аннексияланган Крымда 19 дрон жок кылынганын, Курск, Белгород жана Орел облустарында бирден учкучсуз учак атып түшүрүлгөнүн билдирди.
21-сентябрга караган түнү Крымдын көптөгөн аймактарына дрондор чабуул койгонун жергиликтүү каналдар кабарлады. Анын кесепети тууралуу маалымат берилген жок.
Киев азырынча бул маалыматка реакция жасай элек. Украинанын куралдуу күчтөрү аннексияланган Крымда, анын ичинде Севастополь менен Евпаторияга жакын жердеги буталарга бир нече ирет сокку урган.
Бейшембиге караган түнү Орусия Украинанын бир катар аймактарына чабуул койгон. Киев соккуда Хресондун үч тургуну каза тапканын билдирди.
Орус армиясы 19-сентябрда Украинанын бир катар аймактарына чабуул койгондо бери дегенде тогуз киши каза болду.
Украин тарап тараткан расмий маалыматтарга ылайык, дрон чабуулунан Львовдо 300 тоннадан ашуун гуманитардык жүк сакталган кампа өрттөлүп, бир адам каза тапкан.
Харьков облусунун чыгышындагы Купянск шаарында авиабомбадан алты адам набыт болгонун аймактын башчысы Олег Синегубов билдирди.
Херсон шаарында эл ташып бараткан троллейбуска тийген артиллериялык соккуда эки адам набыт кеткенин жергиликтүү бийлик маалымдады.