АКШда Өкүлдөр палатасында 3-октябрда спикер Кевин Маккартини отставкага кетирүүгө байланыштуу маселе добуш берүүгө коюлду. Бул сунушту 216 конгрессмен колдоп, 210у каршы болду. Бул Кошмо Штаттарында Өкүлдөр палатасынын тарыхында спикерди отставкага кетирген биринчи окуя болуп калды.
Reuters агенттиги бул чечим Маккарти менен анын республикачыл айрым кесиптештери талашып-тартышкан жагдайдан улам кабыл алынганын жазды. Республикачылардын араздашуусу Конгресстин эки палатасында тең убактылуу, 45 күнгө эсептелген бюджет жактырылгандан кийин көп өтпөй күчөгөн.
CNN Маккартинин ордуна убактылуу спикер болуп Түндүк Каролинадан шайланган республикачыл конгрессмен Патрик Макгенри дайындалганын кабарлады.
Кевин Маккарти ушул жылдын башында төрт күнгө созулган 15-жолку добуш берүүдө гана Өкүлдөр палатасынын спикери болуп шайланган.
Соңку жүз жыл ичинде Өкүлдөр палатасы добуш берүүнүн биринчи айлампасында эле шайлап келген. Мындай окуя туура 100 жыл мурда, 1923-жылы болгон жана анда палатанын башчысы тогуз турдан кийин гана шайланган.
Былтыр 8-ноябрдагы шайлоодо АКШда Өкүлдөр палатасынын жаңы курамы жана Сенаттын үчтөн бири шайланган. Анын жыйынтыгында Конгресстин төмөнкү палатасында республикачылар көпчүлүктү түзгөн.
2018-жылкы шайлоодо 435 орундун 235ин демократтар, 199ун республикачылар алган. 2020-жылы өткөн шайлоодо демократтардын саны 222ге түшүп, республикачылардын саны 213кө жеткен.
Орус армиясы Украинанын Херсон аймагын акыркы бир суткада 500дөн ашык снаряд менен аткылады. Облустук аскердик администрациясынын башчысы Александр Прокудин эки адам набыт болуп, жетөө жараат алганын билдирди.
Прокудин орус күчтөрү калктуу конуштардагы турак жайларды, билим берүү мекемелерин, чиркөөлөрдү, гуманитардык штабдарды, соода борборун, заводду жана Херсондогу маанилүү инфраструктуралык объектилерди бутага алганын айтты.
3-октябрга караган түнү Днепропетров облусу да ракеталык чабуулга кабылганын жергиликтүү бийлик маалымдады.
Далилдүү көрсөтмөлөргө карабай, Москва Украинада карапайым калк аткыланганын танып, аскердик объектилерге гана чабуул коюп жатканын белгилейт.
Донецк облусунун оккупацияланган бөлүгүндөгү Енакиево-Углегорск тилкесинде жүк ташуучу поезд менен зениттик-ракеталык комплекс ташыган аскердик унаа кагылышканын ASTRA Телеграм каналынын жазды. Анда үч орус аскери каза болгону айтылууда. Расмий маалымат таратылган жок.
Украин армиясынын Башкы штабы билдиргендей, 2-октябрга караган түнү Орусия дрондор менен жапырт аткылады.
Украинанын 150дөн ашык айыл-кыштагы артиллериялык аткылоо алдында калды.
Башкы штабдын маалыматына караганда, Ирандан чыккан "Шахед" дрондору Донецк, Запорожье, Луганск, Харьков жана Херсон облустарына сокку урду. Ушул эле аймактар жана Сумы, Чернигов облустары ракета менен аткыланды.
Түнкү аткылоолордо Харьков облусунун Волчанск шаарында карапайым тургун курман болду. Шаарды өрт чалып, жер үйлөр, ишканаларга зыян келтирилгенин аймактын башчысы Олег Синегубов кабарлады.
Херсондо жер үй өрттөнүп кетти. 13 жаштагы кыз жараат алган, эжеси катуу коркуп калган. Алардын энесине осколканын сыныктары тийген.
Орусия аткылоолор тууралуу комментарий берген жок.
Киевде Европа Биримдигине мүчө мамлекеттердин тышкы иштер министрлеринин бейформал жолугушуусу 2-октябрда өтүп жатат.
Жолугушуу тууралуу шаркеттин тышкы саясий мекемесинин башчысы Жозеп Боррел бүгүн эртең менен билдирди. Ал өзү Киевге кечээ барды. Министрлердин сапары тууралуу алдын ала маалымдалган жок.
Боррел кездешүүнү "тарыхый" деп атады жана биринчи жолу шаркеттин аймагынан тышкары жакта өтүп жатканын белгиледи. Анын айтымында, министрлер Украинанын элине тилектештик жана колдоосун билдиришмекчи.