5-октябрга караган түнү орус армиясы "Шахед" жанкечти дрондору менен Украинага сокку урду. Москва болсо украин күчтөрү Орусиянын чек ара аймактарына да чабуул койгонун билдирди.
Украин армиясынын маалыматына караганда, Орусия аткан 29 учкучсуз учактын 24ү Кировоград, Николаев жана Одесса облустарынын үстүнөн атып түшүрүлдү. Жабыркагандар жана кыйроолор болгон жок.
Орусиянын Курск облусунун губернатору Роман Старовойттун айтымында, украиналык дрондор Суджа, Коренев, Глушков райондорундагы инфраструктурага чабуул койгондо электр энергиясы үзгүлтүккө учурады.
Shot Телеграм каналы өз булагына таянып, 67 калктуу конуш электр жарыгысыз калганын жазды.
Украина чек арадагы Рыльск шаарын учкучсуз учактардан тышкары кассеталык ок-дары менен атканын Старовойт кошумчалады. Жараат алган бир тургун ооруканага жаткырылды.
- Украинанын Defence Express маалымат-консалтинг компаниясынын болжолдуу эсебинде Орусия согуш баштагандан бери Украинага 500дөн ашуун "Шахед" дрону менен сокку урду.
Украинанын атайын даярдыктагы аскерлери оккупацияланган Крымдагы орус күчтөрүнө чабуул койгонун Башкы чалгындоо башкармалыгы билдирди.
4-октябрда Крымдын Орусия дайындаган башчысы Сергей Аксенов Федералдык коопсуздук кызматкерлери (ФСБ) украин күчтөрү менен кагылышканын айтып, бирөө кармалганын маалымдаган.
"Азаттык" радиосу азырынча бул маалыматты өз алдынча текшере албайт.
Украина аннексияланган Крымдын Севастополь шаарындагы Кара деңиз флотунун штабына 22-сентябрда ракеталык сокку урган. Орусиянын Коргоо министрлиги бир аскер мүрт кеткенин кабарлаган. Орусия Крымды 2014-жылы аннексиялап алган.
Украина Евробиримдикке кирсе, шаркеттин бюджетинен келерки жети жылда 186 миллиард еврого жакын каражат алууга укук берет. Мындай божомол Financial Times таанышкан Евробиримдиктин ички изилдөөсүндө жазылган.
Басылма бул изилдөөнү блоктун кеңейиши менен өзгөртүлүшү мүмкүн болгон учурдагы эрежелердин экстраполяциясы экенин белгиледи.
Киевдин Евробиримдикке кирүү маселеси чечилсе, Украина биримдиктин бюджетинен эң көп каражат алчу өлкө болуп калат. Бул Украина Европа биримгинин эң жакыр мүчөсү жана анын эң ири айыл чарба өндүрүүчүсү экенин айгенилейт.
Азыркы эрежелерге ылайык, Биримдиктин Фондунан жакыр мүчөлөргө төлөмдөр жана Жалпы айыл чарба саясатынын алкагындагы чегерүүлөр бар. Алардын көбү түздөн-түз фермерлерге берилет. 2021-2027-жылдарга бул бюджеттин 62% түзөт.
Учурда тогуз өлкө Евробиримдикке кирүүнүн түрдүү баскычтарында турат: Украина, Босния жана Герцеговина, Молдова, Албания, Черногория, Сербия, Түндүк Македония, Түркия талапкер макамын алган. Грузияга мындай макам азырынча бериле элек.
Учурдагы эрежелерге ылайык, аларды Евробиримдикке кошуу жети жыл ичинде 256,8 миллиард еврону талап кылат, анын 72% ашыгы Украинага кетет.
Евробиримдиктин кеңейиши бир нече жылга созулушу мүмкүн. 6-октябрда блоктун азыркы мүчөлөрү талкууга чогулушат.
Литва Украинанын данын Балтика деңизиндеги порттор аркылуу ташуу үчүн коридор ачты. Бул тууралуу өлкөнүн тышкы иштер министри Габриэлюс Ландсбергис Х социалдык тармагындагы баракчасына жазды.
"Орусия азык-түлүктү талкалап, бүлүндүрүп жатат. Литва болсо аларды жеткирип жатат. Балтикадагы порттор аркылуу дан ташууга коридор ачуу макулдашылды жана жактырылды. Бул украин чек арасындагы басымды жеңилдетет жана Африкага жана андан ары дан ташууну көбөйтөт. Кызматташуу жемишин берип жатат",-деп жазды министр.
Муну менен катар Украинанын, Польшанын жана Литванын айыл чарба министрлери эки күндүн ичинде украин-поляк чек арасындагы санитардык жана ветеринардык көзөмөлдү Литванын Клайпеда портуна көчүрүүнү макулдашты. Бул Польша аркылуу дан жана башка айыл чарба өнүмүн ташууну тездетмекчи.
Литва июль айынын аягында Украинадан Европа Биримдигине дан ташуу үчүн кошумча жол катары Балтикадагы портторду колдонууну сунуштаган.
Украина – дан азыктарын ири көлөмдө экспорттогон өлкө. 2022-жылы февралда Орусия Украинага кол салгандан кийин анын Кара деңиздеги портторун флот аркылуу бөгөттөп, Киевдин дан азыктарын экспорттошуна мүмкүнчүлүк бербей койгон.
2022-жылы 22-июлда Стамбулдагы сүйлөшүүлөрдө Украина, Орусия жана Түркия Бириккен Улуттар Уюмунун ортомчулугу менен дан экспортун кайра жандантуу боюнча келишкен эле. Украина Түркия жана БУУ менен өзүнчө келишимге кол койгон. Ал эми ушул келишимди Орусия тарап Түркия жана БУУ менен өзүнчө түзүп, милдеттенме алган.
БУУнун маалыматына караганда, ошондон бери Украинанын түштүк портторунан чыккан кемелер текшерүү үчүн Түркияга токтоп, миллиондогон тонна азык-түлүктү дүйнөнүн башка өлкөлөрүнө ташып турган. Дан келишими жалпысынан үч жолу узартылды. Соңку келишимдин мөөнөтү 17-июлда аяктап, Москва аны узартуудан баш тарткан.